中階手機平價鬥!Sony、HTC、LG 唔使二千,邊部啱你心水?
|
HTC
又係 Sony XA Ultra!細舖跌穿二千,又會唔會改變你心意呢?
講 HTC、LG 中階手機之前,都係要講番 Sony XA Ultra 先!上回就提到,XA Ultra 大舖臨尾都要跌價,跌到落 $2298,呢個價錢有網友就話,覺得都係唔夠誠意,去到二千樓下先得。而家機會來了,隨着 XA Ultra 大舖減價,細舖逼於無奈之下,唯有跟住減,由放假前的 $2298,一減減多三百,最新賣價為 $1998。拿拿拿,如網友所願,跌穿左二千,你又會唔會改變心意呢?
▲ 大舖喺放假前一日就減價至 $2298,網友覺得唔夠誠意,而家細舖跌穿二千,落到 $1998,網友又點睇呢?
嫌 16GB 太過少?HTC 中階機大舖劈價,揀佢定揀 Sony?
HTC 中階機,大舖真係剩番唔係好多,來來去去都係 E9、X9 果堆。當中的 E9,其實 12 月開始已經在百老匯做緊滙豐信用卡優惠,只需 $1498 就可以入手,不過始終平極都係不夠細舖抵玩,加上 MTK U 仲要得 2GB RAM + 16GB ROM,所以版主一直都無提。反而 X9 仲值得提下,當版主不在香港放假的時候,X9 在大舖由原來的 $2198,跌到落 $1998,而細舖暫時都係差不多價錢,雖然係 MTK U,但至少有 3GB RAM + 32GB ROM,你又會唔會考慮呢?
▲ Sony XA Ultra 係就係有 6 吋巨芒,但始得 16GB ROM,放到今日真係唔會夠用。而 HTC X9 呢幾日大舖就跌到落 $1998,你又會唔會考慮?
LG 5.7 吋中階機仲有筆,都係唔使二千,又入唔入得過?
講到有筆的 LG 中階機,好自然網友會想到的是 Stylus 2 Plus。版主個人會覺得,呢部機真係可以挑機 Sony XA Ultra,雖然芒無佢咁大,但至少都有 5.7 吋,已經算係唔細,而且有 3GB RAM + 32GB ROM,仲有埋支筆,用來 jot notes 都好方便。大舖最新賣價為 $2098,而細舖則保持 $1980,唔知網友又認唔認同,呢部比 XA Ultra 抵玩呢?
▲ 版主覺得,Sony XA Ultra 的最大對手,反而會係 LG 呢部 Stylus 2 Plus,雖然芒細少少,但都有 5.7 吋,最重要係有 32GB ROM,仲有埋支筆可以玩下,算係幾有特色,大舖而家跌到落 $2098,而細舖則保持 $1980,你會揀佢定揀 Sony XA Ultra 呢?
Sony Xperia XA Ultra 在文章發表時,大舖賣價為 $2298,按這裡有詳細規格及最新賣價。
HTC One X9 在文章發表時,大舖賣價為 $1998,按這裡有詳細規格及最新賣價。
LG Stylus 2 Plus 在文章發表時,大舖賣價為 $2098,按這裡有詳細規格及最新賣價。