講緊嘅係九龍灣一間叫 HKPCMALL 的商店,呢間舖又係不時都搞開倉優惠,而今次版主嘅焦點去咗 iPad mini 2 Wi-Fi 32GB 上,寫住係「#New」,咁理論上係全新無錯,不過但又無保養,原因係乜,可能係水貨,可能係後門機 (即港水機)。然而,佢寫到明係無保養,咁有乜問題你都吹佢唔漲,但正如開頭個頭盔咁講,買得呢啲貨,風險是必然,只能說碰下運氣啦,平平地當玩下,係 OK 的。重點是,個價賣 $598,粗粗地玩下都可以。
但版主你標題又話四百蚊,你係咪寫錯咗呀?唔係!但有條件。佢網站寫明,18 / 1 當日首 100 名入場買蘋果產品,可以即減 $200,咁減完之後,就只係 $398,睇到個價,真係明知可能有風險,都心郁想搏下啦!
呢間舖另有一大堆產品會有優惠,而且好公開地講哂有乜產品,唔使好似豐澤咁要去到先知有乜買,按這裡可以睇到開倉清貨貨品 (賣出咗就會從網站裡消失)。但更重要的是,每次呢啲開倉活動,都排隊排到水蛇春咁長,如果想有得享即減 $200 買 Apple 產品,可能就要早啲去定排隊了!
開倉詳情
日期:1 月 18 - 19 日時間:10:30 - 20:00 (星期五), 11:00 - 19:00 (星期六)
地址:九龍灣德福大廈 5 樓 501 室