iPhone 12 支援北斗導航系統!個人資料會送中嗎?

YKer 2020-10-16 23:23 | Apple
beido.jpg

iPhone 12 四個新款,至少香港版本,係導航系統功能上面,見到支援中國開發嘅「北斗導航系統」,根據中國官方指,相關的產品已經出口超過 120 個國家,非常威威。我哋發覺,暫時未發現有媒體可以好清晰、又簡單咁講得出北斗係乜、有乜用途、點樣用、點樣唔用、有乜風險、有乜好處之類。最重要係,我用 iPhone 12 做導航,我嘅個人資料,會唔會「送中」?


北斗衛星已係第三代

其實北斗衛星系統唔係新野嚟,從 1994 年第一代開始,就已經射呀射呀,中國每年都射啲衛星上太空,逐步建構完整的衛星網絡,跟住 2004 年開啟第二代,到2009 年啟動第三代,前後一共發射 59 粒,最後組合出完整 30 粒在軌道的衛星的北斗三號導航系統。

其他導航系統

世界上最出名的全球定位系統叫 GPS,係美國軍用系統,其後下放到民用,一共係 31 粒在軌道衛星。而歐盟的定位系統叫做伽利略,在軌道衛星有 24 粒;前蘇聯的定位 GLonass 在軌道衛星數目一樣係 24粒,解體後自然由俄羅斯擁有。 當然啦,定位有分民用、軍用版,普通民用就無咁精確喇。

全球定位最有用係除咗你個 Google Map 導航之外,其實更重要係天文臺要用、通信基站會用、各種大型工程勘探、城區規劃繪圖,甚至科技化農業管理等都會用到,衛星定位系統就有如上帝的眼睛一樣。

從 1994 開始到宜家,中國的衛星覆蓋面越來越大,其他定位系統依賴就越來越減少,到最後 2020 年終於北斗30星齊章啦! 一旦邪惡的美國打算 shut down 個 GPS,中國依然有辦法發射導彈過去美洲大陸!

導航系統有乜用

咁作為普通的地球人嚟講,北斗衛星有乜意義呢? 

令你個定位準確啲囉,無其他功能架啦

你部手機唔需要刻意打開個北斗衛星,手機係會自動根據廠商預設的算法黎選擇用邊一套衛星定位系統,到底用 GPS,用俄佬野,歐盟野,定中國衛星。優先次序就係系統軟件決定,一般而言用戶係無得自己選擇。 中國手機就自然係北斗優先啦,身處香港用住台灣 HTC 手機,我見到係繼續用 GPS 囉。

可以選擇無北斗嗎?

咁有無辦法唔用北斗?其實你可以留意你智能裝置的官方網站規格表,只要上面寫住beidou 呢個字,即係你部野一早支持呢個定位系統喇,只係你唔知咋。而新推出嘅 iPhone 12 都支援。

可以 OFF 咗唔用佢?

有網友可能好八卦問,有無辦法知道自己部機係咪真係可以見到 北斗星星呢? 有辦法,你去 app store play store 下載一個衛星檢測 app,就可以見到晒你手機偵測到邊D衛星啦。 好似我咁,見到美國、俄羅斯、歐盟 、放部電話出少少露臺就見到埋中國北斗啊~ 不過,提醒大家,好多聲稱衛星檢測的app,都會獲取你不明的資料權限,又或著令你無啦啦數據流量出現莫名其妙的消耗,所以自己搵一個開源安全的衛星 app 呀! 點下載? PM 我啦

最新新聞