記人生第一次先達放 iPhone!一日歷盡興奮、期待、失望

左定坤 (Cho Ting Kwan) 2020-11-13 16:40 | Apple
凡事都有第一次。那些年,仲係有得炒 iPhone 嘅年代,嗰陣版主仍年輕,青春嘅我從來無諗過要炒 iPhone,當時我仲喺度想,做乜啲人要炒 iPhone,一部手機咋喎。但隨着年紀漸長,成家立室,尤其經濟環境不景嘅情況之下,任何有可能賺到一千幾百,風險又唔高嘅,都想試下。眼見 iPhone 12 Pro 有得炒千幾二千,版主就心郁郁買咗部 12 Pro Max,但求搏一點額外小收入。於是,就踏出了我的第一次,買咗部 iPhone 12 Pro Max。

喺 ePrice 做咗五年,首次以一個賣機者嘅角色,踏進先達廣場。環境相當「墟冚」,望望身邊嘅人,第一次感覺大家都係同路人,然後周圍睇下邊度好價,考慮放機。版主去沙田 Apple Store 攞機時間話遲唔遲,話早又唔係早,12:45 有得攞,Apple Store 畀我 12:20 已經入去拎機,返番去先達接近 1 點。出發去沙田嘅途中,版主留言網上報價,依舊尚有大約 $900 水位,可惜版主回到先達時,已經無咗呢個價,甚至好多都暫時停收。

IMG_9811.JPG

順帶一提,今次 iPhone 12 Pro Max 開賣,應該係先達近年比較多人嘅一次,每個人手上拿着一部,甚至幾部嘅 iPhone 12 Pro Max,懷着期待嘅心情,等待放機。但事實上,見到咁多人,其實都沒有甚麼期待可言,大家已經唔係等收錢,而係等同人鬥快甩手離場,有賺當贏。

來到啱啱 3 點幾,先達人海依舊不斷,但見唔少店舖已經收夠咗機,好多型號都唔再收,而當中 512GB 藍色,更已經跌穿建議零售價,即日見紅。而呢個時候我好慶幸,一早就已經脫手,至少唔會損手爛腳離場,雖然炒賣 iPhone 就好似股票一樣,可升可跌,隨時下星期可能會反彈,但與其心驚膽戰,或者早點放機是一個解脫。

IMG_9813.JPG

IMG_9810.JPG

最新新聞