第一期消費劵四月派最多 $5000!版主分享電子產品考慮入手清單
|
Apple
版主我之前係用 AliPay HK 領取消費劵,所以今次都係一樣,而第一期派 $5000,話多唔多,話少唔少,平時多數留喺屋企,又無乜特別地方需要消費,除咗買個囡嘅 BB 用品,我話哂都係鍾意「搞機」嘅人,都會諗住會買啲平時想買但又唔捨得買嘅電子產品。其實講起真係覺得可惜,如果早知佢今年會派更多,我就等 2022 年先買新 MacBook Pro,不過有早知無乞衣,唔買都買咗,四月又有 $5000,都係時候規劃一下,到時收到消費劵買啲乜好。
版主都諗定咗個考慮入手嘅清單,記低有乜嘢想買,好好利用呢 $5000 去買,下面都同大家分享一下:
001: iPhone 13 mini 256GB 建議零售價 $6799 (網絡商 / 大舖網店有時會再平)
(其實啱啱出嗰陣我都用過大半個月左右,好鍾意,一直都想整返部,不過有考慮緊有無實際需要,畢竟我自己手上 iPhone 都有 2 部,Android 手機仲有一堆𠻹。不過就算真係打算買,我都會買 256GB,呢個 GB 數對我嚟講都夠用,但就都要補多千零蚊左右)
002: iPad mini 256GB WiFi 建議零售價 $5199
(呢樣我反而會比 iPhone 更加考慮,一來我鍾意佢外型,我又無需要用到 iPad Air / iPad Pro 咁大個芒,細細部啱我多啲,二來我手上部第 5 代 iPad mini 儲存容量唔太夠我用,換部大容量少少嘅,都算合理嘅,用完第一期都係補多 $199)
003: AirPods Pro 建議零售價 $1999 (市面 / 網店價大約賣 $1599 左右)
(頭三樣我想買嘅都係 Apple 產品,無計因為我手上都多蘋果裝置,又 iPhone 又 MacBook 又 iPad,而 AirPods Pro 係我一直想買,但成日又覺得用千幾二千蚊買耳機好不捨得,都或者會考慮用消費劵買,叫做自我感覺良好少少。如果第一期消費劵我買咗佢,咁 iPhone 13 mini / iPad mini 就會考慮第二期先再諗)
004: Maxcare 無線肩頸按摩帶 建議零售價 $1680 (豐澤價 $899)
(我唔一定係會買呢款產品,但都可能會考慮按摩裝置,但可能會出去大舖或者按摩用品嘅專門店真係試啱咗,先至決定買邊款。因為版主長期坐喺度唔郁打文睇電腦,無論係頸部、肩部定係背脊,總之成個上半身都成日唔舒服,原本有諗過小米新出嗰支按摩槍,其後有網友介紹另一枝畀我,都係平平地,不過如果有消費劵嘅話,咁我可能會再試啱啲,搵款最適合自己、最令自己舒服嘅按摩產品會好啲,唔使咁慳住慳住。當然,其實呢啲痛症,最有效都係靠自己拉筋,我明嘅,不過無動力啫 )
005: InAndOn 點歌系統 $4699 - $5999 不等
(其實大約 2 年前版主屋企人喺深水埗影音舖買過一款 InAndOn 點歌系統連音響裝置,諗住喺屋企唱 K 唔使下下出去唱,嗰陣 Neway 仲未執,計返可能仲慳唔少,不過佢哋自己買,唔知點解又無雲端無得 update 新歌咁,諗諗下如果最後揀唔掂,幫屋企換過款新嘅點歌機仲好 )
====================================
以上就係我初步考慮嘅入手清單,應該理論上兩期共 $10000 消費劵入面,多少都會從上面買至少一樣嘢,當然到最後唔排除,有大部分消費劵都用哂嚟買快速檢測劑啦! 我知有啲人會諗住買 PS5 之類,不過呢啲唔係我心水,唔知大家心入面又有無個 List,可以留言同大家分享一下呢?