甚麼是「Apple 產品好賞分期計劃」？
今次我想分享的，是豐澤 (門市 + 網店)、衛訊 (門市) 同 WeLab Bank 推出的「Apple 產品好賞分期計劃」，透過呢個計劃，你有機會買 iPhone 14 系列，甚至其他型號 iPhone、iPad、MacBook Air、Apple Watch，申請免息分期。不過留意，佢唔係傳統銀行嘅免息分期，其實係循環貸款產品，提供 24 / 36 個月的分期服務 (iPhone 或 Apple Watch 計劃期限為 24 個月，而 iPad 或 Mac 產品則為 36 個月) 。而 WebLab Bank 聲稱可以提供低至 0% 息及手續費 (需要申請批核，視乎信貸評級)。睇完一大段唔明，用 Point Form 列一次重點
001：向 WeLab Bank 申請分期買 iPhone 14 系列，佢哋叫做「Apple 產品好賞分期計劃」
002：呢個計劃，不但只包 iPhone 14，也包括最新 MacBook Air、iPad 及 Apple Watch
003：iPhone 或 Apple Watch 分期為 24 個月
004：iPad 或 Mac 產品則為 36 個月
005：WeLab Bank 要求你用手機 App 申請 「Apple 產品好賞分期計劃」，輸入資料後，佢地會話俾你知批核嘅息口，最低係零息、零手續費。ePrice 幾位好友申請過，有人零息零手續費，有人是 3.99% 年息加零手續費，有人直接被佢哋 Reject (申請唔到)，視乎你嘅信貸評級。
006：相反，佢唔 Offer 免息俾你，你 Reject 佢嗰計劃就得。成本就是你申請及通知銀行取消 Offer 的時間，係咁多。
「先扣後供」又係乜東東
以前的免息分期，好簡單張單價除月費就得，WeLab Bank 嘅「Apple 產品好賞分期計劃」，加入咗 Trade In 元素，佢哋叫「先扣後供」，即是在你購買 Apple 產品的時候，預先扣除產品最高 Trade-in 換購價值，低至七折，然後進行分期，但最後一期有特別安排。以 iPhone 14 Pro 128GB 喺豐澤網店發售為，你供款嗰陣，會先扣起 「最高 Trade-in 換購價值」唔駛供住，即係 $2407.96 (約機價 $8,599 的 28%) 。
首 24 個月月供：$257.96 x 24 = $6,191.04
如果 24 個月後，你想換機，只要歸還你買下 iPhone 14 Pro 128GB 予 Apple 授權經銷商，「最高 Trade-in 換購價值」即係 $2407.96，你就唔駛再俾，變相機價變左七折左右 (28%)。
留意嘅係，到時佢會唔會用 $2407.96 收你部機，睇下部機用成點，爛到花晒，一定被扣減，同出面收機佬一様。官方就咁寫嘅；「Trade-in資格及換購價值將根據每部裝置的實際情況和損壞程度而有所不同。如裝置符合產品換購商之產品驗收標準，產品換購商將保證以最高trade-in換購價值回購有關裝置。」
如果你唔放部 iPhone 14 Pro 128GB，24 個月供機款項如下：
第 1－23 個月：$257.96
第 24 個月: $257.96 + $2407.96 = $2665.92
如果是我，我會建議照樣繳付那個「最高 Trade-in 換購價值」，部手機擁有權依然屬於你，到時你再決定自己高價賣出去又得，繼續自用都得。留意嘅係，呢個供機價，係假設 WeLab Bank 俾到免息免手續費安排俾你。
申請「Apple 產品好賞分期計劃」圖文教學
好了，大體介紹到這裡，那如何可以做到免息分期呢？版主會以圖文方式，一步步教大家怎去做。而你首先需要準備的，是先申請一個 WeLab Bank 帳戶以及豐澤易賞錢帳戶 (都是免費的)，當你已經擁有了一個 Welab Bank 戶口，就繼續看下面程序：001: 最簡單的方法，就是到豐澤網店，選擇你喜歡的 Apple 產品。網店你可以慢慢攪，唔駛有 Sales 煩住晒
002: 就用返上面 iPhone 14 Pro 128GB 為例，撳到入去除了底部有「加到購物車」選項，上方還有一個選項叫「豐澤智易購 Apple 產品好賞分期計劃」，並寫住低至 $257.96 / 月，旁邊有個按鍵「選用 WeLab Bank 結賬」，按它一下，剔選「本人確認已閱讀並同意以上內容，並同意前往 Welab Bank 網站」，然後按繼續。
003: 這個時候，你應該已經見到 iPhone 14 Pro 128GB 已加入購物袋。進入購物袋，你會見到寫住每月 $257.96 起，而下面有行小字寫住「24 個月後 trade-in 換購價值高達 $2408」。而因為這個計劃是採用「先扣」的方式：
[$8599 (建議零售價) - $2408 (最高 Trade-in 換購價值)] / 24 個月 = $257.96 (取至小數點後 2 個位)
數字就是這樣計算出來，24 個月後如果你想保留 iPhone，就要繳回 $2408 最高 Trade-in 換購價值 + 最後一期的 $257.96，即 $2665.92。
004: 按下結帳，你會見到 QR Code，這個時候你需要用手機的 QR Code 掃描程式，去掃描該 QR Code。這裡有少少提示，版主試過用 iPhone 內置的相機，是無法掃描到這個 QR Code，需要另外下載一些第三方 QR Code Scanner 應用程式。
005: 掃描後，你會首先見到關於 Welab Bank 「循環貸款產品資料概要」，碌到最底選擇「我已閱讀及同意」。
006: 開始申請，你首先需要填寫你的手提號碼以及電郵地址，之後你會收到 SMS 驗證碼。如果你本身有 Welab Bank 戶口，填完驗證碼後就會彈出「你所提供的資料已於 WeLab Bank 登記」，按下「登入以繼續」，登入回你的 WeLab Bank 戶口，之後可能需要你補回一些資料，例如學歷、收入等等，然後按提交申請。
007: 之後會顯示「你的申請有待進一步批核」，表示會在 1-2 個工作天或更早，透過短信或電郵通知你批核結果。而事實上，我是幾乎即時彈出獲得了批核，繼續按「檢閱訂單」。
008: 填寫你的姓名、收貨人電話、收貨人住址等資料。之後會問你是否需要除舊服務，再按下一步就可以見到你實際需不需要付利息。好可惜的是，版主自己可能成日忘了交卡數，影響到信貸評級，導致我需要 3.99% 的利息，無資格申請到「0% 免息分期」。但如果大家平時屬於準時交卡數的一群，相信應該可以做到 0%。確定好一切資料後，就剔除底部的方格，再按「確定購買及提取貸款」，因為版主不是真的打算購買，所以這裡我就沒有按下最後一步了。
是否值得使用？
Welab Bank 這個「Apple 產品好賞分期計劃」是否值得用呢？我覺得如果你信貸評級是好，可以做到 0% 免息分期，我認為都幾值得使用，因為市面上的大舖做不到長達 36 個月 Apple 產品免息分期 (iMac 除外)。如果好像版主我，要 3.99% 利率，其實都算低息，比起豐澤用信用卡分期的 5% 都要低，而且買 iPad MacBook 可以分到 36 個月，其實對於不想一炮過付款，中意慢慢攤長來買的我來說，都依舊有一定吸引力，除非你信貸評級低到，只批到 9.49% 給你吧。
不過，最後都是要提醒一下大家，如果你最後沒有打算使用這筆循環貸款，建議大家打電話上 Hotline 取消，因為如果你不取消，在你的信貸報告中，會一直顯示你申請了 WeLab Bank 循環貸款，而有 $40000 的信用額度未用。所以，不用就取消它，比較穩妥。