001：將你的 iPhone 備份到 iCloud
呢個係最簡單備份 iPhone 嘅方法，因為你唔需要用其他裝置，已經可以做到備份，只需要你嘅 iPhone 連上咗網絡就得，算係一個「一勞永逸」嘅備份方式，而且都足夠可靠。要將 iPhone 備份到 iCloud，你需要進入「設定」>「你的名字」>「iCloud」>「iCloud 備份」，並啟用「iCloud 備份」。當你的 iPhone 充電、鎖定並連接到 WiFi 網絡時，就會自動將所有資料備份到 iCloud。
不過，備份去 iCloud 會有兩個主要缺點，第一就係你要付費，免費版嘅 5GB 根本就唔夠用，不過你只需要每月 $8，就可以有 50GB 容量，但多數人最終都會升級到更高嘅級別，就好似版主我咁，我已經升級到去 $78 2TB，後續再唔夠嘅話，仲有 $238 6TB 以及 $468 12TB 嘅選項。
另一個缺點就係，iCloud 係一個同步服務，而唔係真正嘅備份方案，意味住如果你喺裝置 A 刪除一張相片，呢張相片都會喺所有裝置上刪除。所以你要小心唔好刪除你真正需要嘅文件，如果唔係就乜都無。
002：將 iPhone 備份到 Mac
Apple 亦允許你將 iPhone 備份到 Mac 上，你只需要嘅係一條 USB 線，連接 iPhone 同埋你嘅 Mac，並且你嘅 Mac 要有足夠嘅可用空間去儲存備份。準備好之後，喺你嘅 MacBook 上開啟「Finder」，然後喺左側窗格嘅側邊欄中，選擇你嘅 iPhone，之後揀「一般」，然後「將 iPhone 上所有資料備份到這台 Mac」。最後，按一下「立即備份」開始備份。你甚至可以加密呢個備份，咁樣任何人都無法存取。不過，如果你加密咗而又唔記得咗密碼，咁你個備份就會唔見咗。同第一個方法唔同，今次呢個方法係真正嘅備份，變相就算你 iPhone 刪除咗某些內容，同時亦喺 iCloud 刪除咗呢啲內容，你都可以喺 Mac 度透過恢復 iPhone 搵返。
003：將 iPhone 備份到 Windows PC
你需要喺 Window 度安裝 iTunes，以備份你嘅 iPhone。下載並安裝應用程式之後，利用 USB 線將 iPhone 連接到 Windows 電腦，然後轉到 iTunes，你會喺左上角見到一個 iPhone 圖示，點撃 iPhone 圖示並選擇「摘要」。最後，按一下「立即備份」，開始備份你嘅資料。
來源：LifeHacker