基本上而家你用 iPhone 影張相，大部份內容都非常清晰，但你有無見過有啲攝影師，例如影瀑布嗰啲流水影到好模糊，或者影城市街道影到好有藝術感嘅車軌相，你知唔知呢類相係點做出嚟㗎呢？排除用軟件後製，就係用長時間曝光技術影出嚟，透過將快門速度降低到幾秒鐘，去實現專業相機上嘅效果。iPhone 其實唔係無呢個功能，但並唔係十分明顯，特別對於休閒攝影愛好者嚟講，根本唔知點樣調整虛擬快門速度。而下面我哋就會同大家介紹，點樣喺 iPhone 上使用長曝光功能。
001: 使用原況照片 (Live Photos)
雖然 iPhone 無專業模式，無辦法手動拍攝長曝光相片，但透過「原況照片」功能，可以做到相近嘅效果，步驟如下：第一步 - 打開相機。
第二步 - 確保打開咗即時照片，如果無打開，就點選右上角嘅圓形圖示。你仲可以喺屏幕向上滑動，打開更多相機設定。
第三步 - 點擊屏幕底部嘅「拍照」鍵，並盡量保持靜止。
第四步 - 拍攝完後，點擊左下角嘅預覽方格，將相片打開。
第五步 - 從屏幕左上方點擊「原況照片」選項。
第六步 - 從下拉式選單中選擇「長時間曝光」。
002: 使用第三方應用程式
雖然 iPhone Live Photos 可以做到長曝光效果，但你始終無辦法更好咁控制快門速度，但你可以透過一啲第三方應用程式達成呢個目標。有啲應用程式提供嘅功能，多過 iPhone 相機原生嘅功能，等你可以控制快門速度，從而更輕鬆拍攝長曝光嘅相片。例如 Slow Shutter Cam (US$2.99) 可以做到運動模糊、光跡、手動快門速度等選擇，並可以增加或者減少模糊嘅效果。對於希望完全可以控制曝光設定嘅專業人士嚟講，ProCam 8 (US$9.99) 還支援 RAW 照片，而且更可以提供調整對焦距離、白平衡、ISO、快門速度和影像解像度等選項。
當然，App Store 上可能會有些免費的替代品，但不如付費的有效，例如 Spectre Camera 僅免費提供三秒的曝光。
來源：SlashGear