大家都知，版主同唔少大舖嘅店員都幾熟，有時吹下水佢哋可能會透露下，又或者佢哋有咩消息，又會同我分享下。而最近佢哋就講開，佢哋內部聽聞今年 iPhone 16 系列有大把貨，而大把貨背後代表啲乜，相信大家都唔難估到，就係好大機會無得炒。不過，目前未知佢話大把貨嘅意思，係指 iPhone 16 同 iPhone 16 Plus 大把貨，定係就連 iPhone 16 Pro 同 iPhone 16 Pro Max 都一樣大把貨，如果係後者，就無炒機嘅可能，如果係前者，則仲有啲機會。
根據目前傳聞資料顯示，今年 iPhone 16 同 iPhone 16 Plus 尺寸分別為 6.1 吋同埋 6.7 吋，具有重新設計嘅相機模組、操作按鍵，並且仲會有個拍攝拍鍵，而 Pro 以及 Pro Max 則有更大嘅屏幕，同時除咗支持空間視訊，Pro 型號上嘅超廣角鏡頭亦會有所升級。另外，而家好多時講 AI，iPhone 16 系列多個應用程式會支持生成式 AI，包括相片以及 Notes App。而處理器方面，預期應該會用 A18 或者 A17 Pro 晶片，並支持 WiFi 7 / 6E 規格。