iPhone 17 系列新特色一覽
今次 iPhone 17 系列有唔少亮點，特別係全新嘅 iPhone Air，主打超薄機身，配備 6.5 吋 Super Retina XDR OLED 屏幕同 120Hz ProMotion 技術，兼有 Ceramic Shield 2 保護，耐用度再升級！iPhone 17 Pro 同 Pro Max 就用上 A19 Pro 晶片，配備三個 48MP Fusion 鏡頭同全新 Center Stage 前置鏡頭，影相同拍片能力再上一層樓。而 iPhone 17 則有五款新色選擇，包括紫、綠、藍、黑、白，主打年輕市場。不過，對於炒家黎講，機身設計同規格升級只係其次，最重要係市場需求同供貨情況。究竟今次 iPhone 17 系列有無得炒？小編即刻同大家深入分析！
旺角先達：三禾電氣店主話「單咭設計好大風險」
喺旺角先達，小編搵到三禾電氣嘅店主 Simon，佢同我哋分享咗對 iPhone 17 系列嘅炒賣前景嘅看法。Simon 提到：「今年 iPhone 17 系列變單咭（eSIM），真係好大不確定因素，至少到今日為止仍是這樣。」版主認為，iPhone Air 雖然係全新系列，但因為定位中階，吸引力可能不及 Pro 系列：iPhone Air 雖然薄得誇張，但大陸果邊好多用家鍾意 Pro Max 大屏幕同頂級規格，Air 可能只係吸引一班追求新鮮感嘅果迷，炒價空間未必大。
深水埗：樺峯數碼話「Pro Max 最有機會有得炒」
深水埗深之都嘅樺峯數碼店主就認為，iPhone 17 Pro Max 應該係今次系列入面最有可能有得炒嘅款式。Pro Max 向來係大陸市場嘅寵兒，大屏幕、高規格，仲有新色（Sky Blue、Silver、Black）好吸引。雖然 eSIM 設計可能影響大陸市場，但新機推出頭幾日，炒價應該有得升。至於 iPhone Air，佢哋就唔太睇好：「iPhone Air 喺大陸真係唔岩用，大陸聯通先啱用 eSIM，其他營運商仲係靠實體 SIM 卡，不過新款應該都可以炒到幾日嘅。」
炒家攻略：買邊部最穩陣？
綜合店主意見同市場趨勢，總結以下幾點建議：1. iPhone 17 Pro Max 係首選
Pro Max 憑藉大屏幕同頂級規格，喺大陸同香港市場依然最有需求。特別係 2TB 版本，供貨量少，炒價空間較大，建議優先入手。
2. iPhone Air 炒價短暫
iPhone Air 雖然新鮮，但 eSIM 設計同中階定位可能限制大陸市場需求，炒價可能只得幾日，之後快速回落。炒家要快進快出。
3. 搶眼新色或有機會
iPhone 17 Pro Max 嘅宇宙橙色可能會吸引眼球，炒家可以考慮搶購新色款式。