大快活抽水 iPhone 17 Pro「宇宙橙」！免費送 6 部「快活橙」智能手機，教你獲得方法
左定坤 (Cho Ting Kwan)
2025-09-15 18:10
|
Apple
最近 iPhone 17 系列就成為全城熱話，但最搶眼的唔係 AI 新功能，而係 iPhone 17 Pro 嘅全新「宇宙橙」配色！呢個橙色 sharp 到爆，網民一見就聯想到香港連鎖快餐店大快活嘅標誌性橙色，戲稱佢做「大快活橙」或者「快活橙」。有網民笑言：「蘋果開發團隊嚟大快活食飯攞靈感？」甚至有二創圖將 iPhone 變成大快活餐牌！不過，大快活官方唔單止冇嬲，反而即刻宣布免費送出 6 部橙色 iPhone 17 Pro，讓粉絲齊齊「快活」！呢個活動簡直係品牌宣傳神來之筆，慳咗好多廣告費。想知詳情，睇下文啦！
大快活隆重推出三大精彩的「快活橙」優惠活動，當中包括:
第一擊：「識玩梗係快活橙」有獎網上遊戲 最後召集！
於 2025 年 9 月 15 日下午 5 時前，大家只需親身前往大快活分店門市，與「快活橙」打卡合照，並 follow 大快活 Fairwood Facebook 專頁，留言上傳圖片並回答「邊款大快活食品最令你快活？點解？」，同時標籤 3 位朋友，最具創意的 3 位參加者就可以免費獲得「快活橙」智能手機 256GB一部（價值 HK$9,399）！得獎名單將於2025 年 9 月 17 日或之前於大快活 Fairwood Facebook 專頁內公佈，得獎者需自行 inbox 大快活提供聯絡方式以便安排領獎。
第二擊：大快活App會員消費贏「快活橙」智能手機
一眾大快活 App 會員有福了！於 2025 年 9 月 19 日至 9 月 30 日期間，會員只要於大快活 App 落單或於收銀處或自助點餐機付款前掃瞄會員二維碼登入，並消費滿 $35（以折後金額計算），即可自動參與活動，每張會員消費訂單可獲一個名額。活動完結後，大快活會以合資格的會員交易時序，數出第 50,000；第 100,000 及第 150,000 單交易（合共 3 單，會員不可重複，如遇重複情況將以進行第 200,000 單交易之會員補上，如此類推）；會員只需正確回答指定問題，即可免費獲得「快活橙」智能手機 256GB 一部（價值HK$9,399）。消費次數越多，得獎機會越大！
第三擊：9月19 「快活橙日」 穿「快活橙」服飾消費可享全單減$3
大快活宣布將 2025 年 9 月 19 日定為「快活橙」日！凡於當日穿着「快活橙」服飾到全港大快活分店消費，可享全單減 $3優惠（優惠不適用於自助點餐機、手機以及網上點餐，不可與其他優惠同時使用，亦不適用於購買外賣餐具，每張帳單只可獲優惠減免一次，請於收銀處向員工說明使用此優惠），誠邀大家於 9 月 19 日齊齊到大快活享受快活的一天！
