iPhone Fold 傳聞規格全面睇：書本式設計、雙屏幕、重點消滅摺痕！
根據多位知名分析師同爆料人嘅消息，呢部 iPhone Fold 將會採用類似三星 Galaxy Z Fold 嘅書本式摺疊設計，而唔係好似 Galaxy Z Flip 咁上下摺。摺埋時厚度大概 9 至 9.5mm，打開後就會薄到 4.5 至 4.8mm 左右。屏幕方面，傳聞指外面會有一塊約 5.5 吋嘅副屏幕，等你可以好似用緊普通 iPhone 咁操作；打開裡面，就會見到一塊約 7.8 吋、接近 iPad mini 咁大嘅主屏幕，用嚟睇片、打機或者做多工處理就一流。而家摺屏機最被人詬病嘅「螢幕摺痕」問題，據說 Apple 已經用咗液態金屬鉸鏈同特殊金屬板去分散壓力，目標係要做到 「幾乎看不到摺痕」 ，如果成真，絕對係一大突破！
機身物料亦都落足料，傳聞會用上鈦金屬 或者混合不鏽鋼與鈦去做中框同鉸鏈，唔單止更堅固，仲可以防止機身彎曲。相機方面，好大機會係後置雙 4800 萬像素鏡頭，而前置鏡頭就會有兩組，分別對應摺埋同打開時使用，其中內屏可能用上屏下鏡頭技術，保持屏幕完整。
至於解鎖方式，為咗節省內部空間，好可能唔會有 Face ID，而係將 Touch ID 整合到側邊按鈕。網絡方面，預計會用上 Apple 自家第二代 C2，並且可能唔設實體 SIM 卡槽。電池就會用上高密度電芯，全力提升續航力。顏色方面，初期可能只提供 黑、白 兩種經典選擇。
來源: Mac Rumours