AlipayHK x Mastercard
今次 AlipayHK 開通 Apple Pay，其實可以理解為，AlipayHK 入面嘅餘額，唔一定要靠掃 QR Code、用傳統支付寶方式付款。反而你可以透過 Mastercard 嘅 Apple Pay，喺支援 Mastercard 嘅拍卡收款機上面，用 AlipayHK 入面嘅餘額付款。簡單嚟講，就係你 AlipayHK 入面嘅錢，而家多咗一個渠道可以用。所以有人話，AlipayHK 可以「扮 Apple Pay」使用，某程度上又真係可以咁理解。三大賣點功能
● 第一，iPhone 用戶可以直接將呢張虛擬卡加入 Apple Pay。● 第二，全球通用。呢張卡支援 Mastercard 網絡，覆蓋全球超過 220 個國家及地區，包括歐美、日本、韓國等地方，只要商戶支援 Mastercard 拍卡付款就可以使用。不過中國內地就唔包括喺內。
● 第三，就係自動扣款。消費嘅時候，款項可以直接由你嘅 AlipayHK 戶口餘額扣除
簡單四步：開通並加入 Apple Pay
● 第一步：更新 App：首先將 AlipayHK App 更新到最新版本，確保你見到最新嘅功能介面。● 第二步：進入開通頁面，打開 AlipayHK App，喺主頁點擊進入「收／付款」頁面。入到去之後，搵返「加入 Apple Pay」或者相關嘅功能入口，就好似下面張圖咁。
● 第三步：加入 Apple 錢包。直接點擊介面上面嘅「加入 Apple 錢包」按鈕，跟住按照畫面指示，就可以將呢張虛擬卡加入 Apple Pay。
● 第四步：用 iPhone 拍卡付款。完成加入之後，去便利店、超市或者餐廳付款，就可以好似平時用 Apple Pay 俾錢咁。只需要雙擊 iPhone 側邊按鈕，或者使用 Face ID 解鎖，叫出 Apple Pay，然後將 iPhone 靠近商戶嘅 Mastercard 收款機，輕輕一拍，就可以完成付款。
限時迎新優惠
配合今次功能升級，AlipayHK 官方亦推出咗迎新優惠，有高達 $88 迎新現金券，或者 $1 換購 $20 優惠券等優惠。成功開通之後，記得順便入 App 嘅「獎賞」或者優惠券中心睇吓，睇吓自己有冇符合資格可以領取。有著數就梗係唔好白白錯過。注意事項
不過有幾樣嘢大家要留意。今次 AlipayHK 同 Mastercard 合作，透過 Mastercard 嘅付款網絡，令 iPhone 用戶可以經 Apple Pay，使用 AlipayHK 入面嘅餘額去付款。換句話講，以後唔一定要喺支援支付寶 QR Code 嘅環境先可以用到 AlipayHK 嘅錢，去到支援 Mastercard 拍卡付款嘅商戶，同樣有機會可以使用。不過，呢張 Mastercard 同香港其他電子錢包，例如 Tap & Go 同八達通錢包入面嘅虛擬 Mastercard，係有少少唔同。其中一個比較明顯嘅限制，就係你搵唔到呢張卡嘅完整卡號。所以如果係 Online 購物，並唔係話見到 Mastercard 就一定用得。基本上要視乎個網站或者 App 有冇支援 Apple Pay，先可以透過 Apple Pay 付款。另外，加入 Apple Pay 亦唔代表見到「只支援 AlipayHK」嘅商戶，突然之間就可以用 Apple Pay。例如一間舖頭本身只接受支付寶 QR Code 付款，而唔支援 Mastercard 拍卡，咁你就唔可以因為張 AlipayHK 卡已經加入 Apple Pay，就直接攞部 iPhone 出嚟拍卡。仲有一點要特別留意，就係呢個港版 AlipayHK 嘅功能，去到中國內地之後，係用唔到嘅。至於 Android 用家，其實本身已經可以透過 NFC Tap 嘅方式，做到類似嘅功能，所以 Android 用戶就唔需要特登將呢張卡加入 Google Pay 呢回事。