iMobile 出 100GB 5G 月費計劃 每月 128 蚊包 1Mbps 慢速無限同免行政費

左定坤 (Cho Ting Kwan) 2026-09-14 16:49 | Apple

周大福媒體娛樂旗下嘅 iMobile 最近推出全新 5G 本地流動數據月費計劃，主打大容量數據，希望用相對平民嘅月費吸引一班高用量，但又唔想比太貴月費嘅用家。

每月 128 蚊綁 36 個月 免收 18 蚊行政費

iMobile 今次推出嘅全新 5G 本地流動數據服務，每月收費係 128 蚊，合約期設定為 36 個月。呢個計劃其中一個吸引之處，係直接豁免每月 18 蚊嘅牌照同行政費，換言之用家喺成個合約期入面，每個月實質支出就係 128 蚊，唔需要額外畀行政成本。喺數據用量方面，用家每個月會有 100GB 5G 本地全速數據可以用，即係話，嗰個地區提供 1GBps 速度，你有機會真係用 1Gbps 速度上網，唔會有上限。如果喺月結日前用晒呢 100GB，系統會自動轉為無限本地數據模式，傳輸速度上限為 1Mbps。呢種做法確保咗用家就算用凸咗都唔會突然斷網，或者俾電訊商額外按量收費，繼續保持基本網絡連線。

專攻出街睇片打機重度用家

而家好多香港人出街無論搭車定食飯都要上網，對數據量嘅要求自然越嚟越高。資料提到，呢個計劃特別針對平時出街搭車鍾意碌 Instagram 同 Threads、去做 gym 踩機睇片、行街去遠啲要開地圖搵路，或者要即時覆公司 email 嘅高用量朋友。100GB 嘅 5G 全速數據容量，基本上應付日常睇高清影片、打機都非常夠用，甚至開個人熱點分享畀平板電腦或者手提電腦做嘢都無問題。即使去到用晒全速數據嘅階段，1Mbps 嘅速度雖然唔適合睇高畫質片，但用嚟覆訊息或者開地圖依然維持到基本操作。

36 個月長約鎖客策略

今次 iMobile 揀咗用 36 個月嘅長合約期推出呢個計劃。長約期嘅好處係用家可以喺三年內鎖定呢個月費水平，同時享受免收行政費優惠，不過相對嚟講換台彈性就會低咗。而家香港 5G 市場競爭好激烈，各個品牌都各出奇謀吸客。iMobile 今次用 100GB 全速配 1Mbps 無限慢速嘅組合，加上免行政費作為招徠，好明顯係想喺高用量同平價市場之間爭取更多實際型用家支持。留意嘅係 iMobile 本身係租中國聯通香港嘅線路，而中國聯通香港，又係租 csl 或和記電訊嘅 5G 線，係租上加租。