零售策略轉型：放慢盲目擴充 集中現有門市升級
根據 Bloomberg 嘅 Mark Gurman 喺專欄 Power On 透露嘅消息，Apple 計劃喺未來幾年加快門市嘅翻新工程，而且會喺店面設計上作出好大嘅調整。其實過去五年 Apple 已經唔再盲目快速開新舖，而係轉為更加審慎咁揀選合適地點，同時將精力放喺現有門市嘅升級、搬遷，甚至喺個別情況下關閉部分舊店。報道提到，之後新開或者翻新嘅 Apple Store 將會有三大主要變化：重新設計兩側嘅「Avenue」專區、正式帶返獨立嘅「Genius Bar」維修吧，同埋拆除而家好多旗艦店都有配備嘅巨型電視牆。「Avenue」專區重整：劃出獨立木製 Bay 處理取貨與工作坊
具體改動會先由兩側靠牆嘅「Avenue」區域開始。內部會劃出兩個大概 10 呎闊、稱之為「Bay」嘅木製獨立空間，分別用嚟處理網上訂單取貨，以及舉辦「Today at Apple」工作坊。而家好多門市都係喺店內擺放專門嘅取貨長檯，或者留出好大個空位畀用家坐低上堂，日後呢兩項功能都會搬去兩邊靠牆位置。
▲ AI 示意圖
網上取貨專用嘅「Avenue Bay」會全以木質製造，上半部印有低調嘅 Apple 標誌，下半部就設有防盜抽屜用嚟存放用家訂購嘅產品，前面亦有一張長桌方便員工處理交收。至於用作「Today at Apple」嘅空間同樣用木質打造，上方三分之二會裝上一部類似特大電視嘅顯示螢幕，下方抽屜就畀導師擺放 iPad、MacBook 等器材，現場仲會配備固定講台同埋矮凳。
告別巨型電視牆 經典全木 Genius Bar 正式回歸
今次改裝嘅另一重點，就係拆走店舖後方嘅大型電視牆。巨型影片牆當初係前零售總監 Angela Ahrendts 掌管時期引入，原本諗住將 Apple Store 塑造成公眾聚會嘅社區地標。不過 Apple 而家打算淡化呢種概念，將店面重心放返去實用嘅零售銷售、顧客服務同埋取貨流程。正因如此，好多門市原本放巨型螢幕嘅位置，將會由全木製嘅專屬 Genius Bar 取代。新設計除咗重現當年經典嘅櫃檯造型，檯面亦提供兩種高度以符合無障礙標準，背後牆身就設有儲物抽屜同展示新產品嘅大型海報。除咗門市對外區域，員工嘅後勤空間同休息室亦都喺翻新名單之內。
▲ AI 示意圖
▲ AI 示意圖
店面管理轉趨嚴格 晨會全程企立兼拍手迎賓
店面管理方面，報道指 Apple 開始對員工早會執行更嚴格嘅規矩。所有員工喺開舖前開會必須全程企立，期間唔可以飲嘢或者用裝置；而且喺門市開門前五分鐘，全體團隊成員不論職位，都要喺第一批顧客入舖嗰陣一齊拍手歡迎。
▲ AI 示意圖
今次披露嘅零售策略調整，喺過去一年已經喺海外少數店舖低調試行，未來幾年將會逐步推展至全球各地嘅新店同升級門市。整體方向反映出實體店面正由過去主打聚會交流嘅空間，逐步回歸到以用家服務與取貨效率為先嘅實用路線。
來源：Power On 專欄