機身設計好特別
機身設計方面，iPhone Duo 摺埋嗰陣厚度係 11.3mm，打開之後就只有 5.2mm，機身重量係 254g。雖然數字上比起 iPhone 18 Pro Max 仲要重多 5g，不過因為機身較闊同較矮，重量分佈同手感都更加平衡。外框採用咗 Grade 5 鈦金屬物料，有 Night Sky 同 Star White 兩種顏色揀，同時具備 IP68 防水防塵標準。鉸鏈結構由超過 100 個零件組成，支援多角度懸停，放喺枱面就可以直接用全新嘅 StandBy 模式睇片或者開視訊會議。
▲ 打開 7.6 吋內屏，Widget 一頁排晒，資訊量真係同一般 iPhone 唔同級
螢幕尺寸方面，外芒係 5.4 吋，顯示比例係 1.4:1，Apple 指出顯示面積達到 iPhone 18 Pro 嘅 90%；打開之後嘅內芒就達到 7.6 吋，同樣係 1.4:1 比例。為咗處理摺痕問題，Apple 喺內芒用咗超過 10 層超薄結構，底層加咗鈦金屬板支撐，表面再加入 Nano-texture 霧面塗層，透過漫反射光線嚟減低摺痕嘅顯眼程度。呢層霧面塗層日後如果整爛咗，亦都可以單獨更換。
▲ 打開似足 iPad Mini
▲ 合上嘅 iPhone Duo 擺喺白色展示底座上，外屏有 5.4 吋，面積大約係 iPhone 18 Pro 嘅 90%，所以單手用都唔會太吃力。屏幕入面見到天氣、股市、尋找、家庭、書籍、翻譯等 App，右邊有 Dock，相片 Widget 擺中間。機身左下角有條金屬邊嘅疊層位，就係合上時嘅鉸鏈位置。要留意，呢部機合上之後會厚過一般 iPhone，唔少評測都話佢偏重。
給摺機的 iOS 27
系統運行專門適配嘅 iOS 27，因應較闊嘅螢幕比例，將 Dock 同埋好多 App 嘅操作選單搬咗去畫面右邊，如果將部機垂直擺放，選單就會自動變返喺底部。內芒亦都正式加入 Split View 分芒多工處理功能，可以左右並排兩個唔同嘅 App。第三方 App 支援方面，用 iOS 27.1 SDK 寫嘅 App 可以完美填滿畫面，而舊版本嘅 App 就需要透過黑邊或者浮動視窗嘅方式去運行。核心規格採用 A20 Pro 晶片，內部加入咗均熱板同石墨散熱設計。為咗平衡機身配重，內部採用咗雙電池架構，官方數據顯示外芒睇片續航力達到 44 小時，內芒睇片就去到 31 小時。比較特別嘅係，iPhone Duo 抽起咗 Face ID，改為喺側邊電源鍵加入 Touch ID，同時支援 Apple Watch 輔助解鎖。機身配備咗 Camera Control 實體鍵，但係就冇咗 Action Button。
▲ 屏幕形狀近似長方形，右邊兩角做咗圓角，左邊貼住鉸鏈位置，右上角係前置鏡頭同時間、電量圈。畫面上有四粒一行嘅 App 圖標，右邊係電話、Safari、訊息同音樂嘅 Dock，下面相片 Widget 影住笑容幾甜嘅示範相。呢個尺寸喺日常回覆訊息、睇通知已經夠用，需要睇多啲嘢先至展開。Apple 資料顯示外屏影片播放時間最長 44 小時。
▲ iPhone Duo 展開之後嘅完整主畫面：左上係音樂同月曆 Widget，月曆顯示 10 月 23 日（九月十四）；右上係天氣、股市、尋找、家庭、書籍、翻譯等 App；中間左邊係 FaceTime、相機、郵件、備忘錄、App Store、地圖等，右邊嘅相片 Widget 同 Dock 同樣整齊。內外屏用相同比例，內容喺兩個屏幕之間可以自然縮放，加上 Apple 提供分割檢視多工，大屏嘅價值就喺呢度體現。不過起價 HK$17,499 唔平，值唔值，就睇你有幾多時間用到大屏。
鏡頭一齊睇
鏡頭配置方面，iPhone Duo 就未有配備潛望式長焦鏡頭。機背搭載 48MP 主鏡頭同埋 48MP 超廣角鏡頭，外芒配備 12MP 鏡頭，而內芒就採用咗 4MP 嘅芒下鏡頭。用家可以利用機身摺疊嘅特性，打開部機之後用外芒做 Viewfinder，直接用機背 48MP 主鏡頭嚟自拍。iPhone Duo 嘅出現標誌住 Apple 正式踏入摺芒市場，喺體積同大螢幕視野之間開闢咗新嘅使用方式，為日後嘅行動裝置形態確立咗清晰嘅發展路線。
▲ iPhone Duo 只有雙主鏡頭，除了主鏡，第二個鏡頭就是 Super Wide Angle 了，是沒有長蕉鏡頭。
▲ 可以見到前置鏡頭開咗個圓孔，旁邊係時間 11:07 同充電指示。再上面係兩粒長形按鍵同一排孔位。Apple 資料顯示外屏前置係 1,200 萬像素 Center Stage 相機；至於內屏嘅 FaceTime 相機，就收埋喺屏幕下面，所以展開後係睇唔到鏡頭孔。圖標方面見到天氣、股市、尋找、家庭等 App，字體同圖標都好清晰。