購買方法幾直接，在 Logic Pro 選單進入 Intelligence Features > Show Usage，用完每月額度後就會見到「Buy More Usage」。目前只有 Logic Pro 可以直接購買，其他 Creator Studio App 預計會陸續加入。
$49.99 唔係月費 用唔晒可以留低
Intelligence Usage Pack 採用一次性購買形式，唔係另一個月費。買入之後未用完的額度可以逐個月保留，但會在購買 12 個月後到期，而且只有當月本身的免費 AI 額度用完之後，系統先會開始扣用量包。用量包亦只屬於購買時登入 iCloud 的 Apple Account，唔支援 Family Sharing。現階段只限美國、英國、加拿大、巴西、法國、德國、印度及墨西哥的 Creator Studio 訂閱用戶購買。
每月本身已有 AI 額度
Apple Creator Studio 月費為 US$12.99，年費 US$129，入面包括 Final Cut Pro、Logic Pro、Pixelmator Pro、Motion、Compressor、MainStage，以及 Keynote、Pages、Numbers、Freeform 的進階功能。換句話講，今次 US$49.99 的用量包，價錢已經接近 4 個月 Creator Studio 月費。每月基本額度方面，單計其中一項功能，可生成最多約 50 張圖片、250 個圖形、50 份簡報，或者約 700 頁講稿備註。至於 Logic Pro Assistant 就冇固定次數，實際消耗會按對話複雜程度計算。
問題就係，Apple 暫時冇公開講清楚 US$49.99 究竟買到幾多額外用量。即係大家知道價錢，但買之前未必可以準確計到究竟夠用幾耐。
香港暫時連相關功能都未有
對香港用戶來講，今次暫時可以睇住先。除了 Intelligence Usage Pack 本身只限上述 8 個國家購買之外，Apple 支援文件亦列明，部分由 Google Cloud 驅動的 Creator Studio AI 功能目前在 香港、中國大陸及澳門等地並不提供。所以香港現階段唔係單純「用爆之後冇得課金」，而係 Logic Pro Assistant 等相關雲端 AI 功能本身已受到地區限制。
另外要分清楚，今次收費只係 Creator Studio 入面的額外 AI 用量，並唔代表 Siri、Image Playground 等一般 Apple Intelligence 功能突然開始收費。Apple 目前只表示部分伺服器端 AI 功能日後會設用量上限，增加用量亦會提供付費選項。