華為 P8 Max 開箱！外型比拼同門 P8
今次上手試玩的 P8 Max 日暉金其實係大陸的 P8 Max 移動聯通雙 4G 版本，用到香港 4G 頻段之外仲有雙卡雙待支援，而係整體規格上同已經係香港推出的 P8 亦有少少唔同。除左屏幕大左之外，係處理器上都用左比 P8 更高階的 Kirin 935 八核配 3GB RAM 以及 64 GB 內置容量。相機方面就同 P8 一樣有 1300 萬像素主鏡頭而前鏡就只有 500 萬像素。電量方面亦都算唔少，有成 4360mAh。以規格來講可以話係比起 P8 好少少，而且有成 64GB 內置容量同埋支援最大 128GB 插卡相信都夠大部份朋友使用。再講講 P8 Max 的開箱細節，雖然版主都做過好幾次大陸手機開箱，明白到有些牌子係會用豪華的包裝來襯托手機，不過 P8 Max 都算係得上係幾誇張，除左包裝盒用左同 P8 一樣有型的設計外，充電器、耳機、 USB 線一律有齊，而且仲送多個「磁力點陣皮套」，果然定價高自然配件都高檔啲。
▲ 包裝盒同 P8 一樣相當簡約。
▲ 除左有 USB 線、耳機同充電器呢啲基本配件之外，仲有送多個保護套。
係外型手感方面，之前 P8 Max 係發佈時版主都有即時拎上手試玩過，就提到係屏幕尺吋上 P8 Max 同平板差不多，但係使用時感覺都仍然比較像係手機。今次再開箱試玩後，版主相信係厚度上控制得宜係 P8 Max 其中一項做得相當不錯的地方。因為厚度只有 6.8mm 的關係，一般用家來講單手拎著手機仍然是勉強做到的。雖然係 p8 Max 上面未有用到不少朋友都好想要的窄邊框設計，但 P8 Max 係整體大小來講都尚算控制得不錯。
另外就係材質方面，發佈的時候華為特別提到 P8 Max 係有 94% 係用左金屬，當時我都好好奇點解華為會特別提到呢點（一般牌子都係提全金屬機身就算）。今次開箱時版主就特地帶埋 P8 出來做個比對，發現原來係外型細節上兩部機的確係有所不同，至於點樣不同法呢大家睇左下圖就會明白啦！
▲ 正面來睇大家可能仲未意會到 P8 Max 有幾大部。
▲ 可以見到，P8 Max 機頂同埋機底兩部份係有兩截色的，其實機頂的 USB 插口同機底的喇叭附近係用左塑膠材質，而邊框同背蓋就係金屬，相信呢個就係華為強調 P8 Max 有 94% 係金屬的原因啦！
▲ 作為一部雙卡手機， P8 Max 可以話「有辣有唔辣」好處係 4G 可以自由切換，但唔好處就係一貫「有中國特色的雙卡」，即係要 SD 卡槽同 Sim 卡槽共用。
▲ 將 P8 拍埋落 P8 Max 到比一比，可以見到 P8 Max 真係大幾個碼，不過機面設計兩者基本上無乜分別。
▲ 係機背上可以見到 P8 鏡頭附近係有可能係天線的塑膠材質包圍住，而 P8 Max 的塑膠材質就係機底。
▲ 兩部機厚度相近， P8 的 6.4mm 厚度會薄少少，但以旗艦機種來講兩部手機都算幾薄。
FHD 解像度其實都夠用，效能方面中規中矩
係屏幕方面，本身版主其實都幾期待 P8 Max 的 6.8 吋芒用上 2K 解像度，雖然最終只係有 FHD 解像度但用過後版主都認為在 P8 Max 上用返 FHD 屏幕其實更好的。因為係硬件上華為的 Kirin 935 八核其實要推 2K 芒相信會有點吃力同時又會更耗電，而且 FHD 屏幕在 P8 Max 上表現亦不算差，可視角度同細緻度都算不錯。
▲ 可以見到，係話就過係 6.8 吋芒 FHD 解像度，但細緻度都算不錯。
▲ 可視角度方面都無問題，低角度之下沒有偏色或更暗的情況。
至於係效能方面， P8 Max 用上左華為自家 Kirin 935 處理器，同 P8 所用上的 Kirin 930 相比，兩者係架構上其實一樣，只係 Kirin 935 時脈更高，有 2.2GHz 。所以係跑分上 P8 Max 相比 P8 係有所進步，但同今年 Qualcomm 的 S810 相比都係有少少距離，但總體而言都屬於高階手機的水平。今次跑分大家可以同 YK 之前所做的華為 P8 評測作一個比對，咁就大約可以知道 P8 Max 的表現啦！
▲ 係安兔兔上 P8 Max 的得分係 46669 ，比起上次 Yk 測試 P8 時的 41747 過約五千分。
▲ 係 Vellamo 方面，P8 Max 成績大約叫做中規中矩，跟 P8 差不多。
▲ 40.55 FPS 以旗艦機來講不算是一個好出色的成績，但係日常使用來講就夠用嘅。
相機配備 Sony IMX278 1300 萬像素鏡頭質素不俗，用巨芒手機影相頗吃力
有關 P8 的賣點相信大家都知道係在於夜拍方面，之前 YK 都示範過係晚上低光環境下 P8 的表現都相當出色。而 P8 Max 跟 P8 一樣用左 Sony IMX278 F2.0 光圈 1300 萬像素鏡頭，係夜拍表現方面理論上應該都係不錯的，由於借用時間有限的關係只能試到日拍了。最後再講講使用感受，雖然相機的質素不俗但係用 6.8 吋巨芒係街上影相真係不容易啊！
總結：表現平均，可能係 Z Ultra 後最好的巨芒機選擇
係而家缺乏巨屏旗艦級手機的情況下，版主聽聞 P8 Max 即使賣價頗為高昂，要 $4980 即係近五千蚊，但係都仍然有不少朋友有入手的意欲，可以見到巨屏手機係香港其實係有不少支持者的。至於 P8 Max 能否滿足到大家的要求呢？版主就覺得呢部機的表現都算幾平均，雖然係用左自家處理器但用落又唔覺比起其他高階機差好遠。另外華為係 P8 Max 上其實係套用左不少平板常用到的功能，呢點相信對一般用家來講使用時會更方便的。
▲ 雖然而家大部份人都會用 Google Chrome 而不會用手機內置的瀏覽器，但可以見到華為係將 P8 Max 的瀏覽器變得更類近平板風格，例如頂部有 Tab Bar 。另外就係有 Split Windows 功能，對於接近 7 吋的手機來講是非常岩用的。
鳴謝：Lucky Digital Store 好運數碼 ( 5465-5886 )
在文章發佈時，華為 P8 Max 仍未有開賣日期及價錢，按此看詳細規格及最新賣價。