華為公佈智能手機成績表!P 系、Mate 系邊款好賣 + EMUI 10 升級消息

管理員 2020-01-08 20:48 | Huawei
大家有無睇過 ePrice 早前嘅統計?華為喺香港係 2019 年推出咗唔少手機,計計埋埋,有成十部咁多,仲未計平板電腦喎!2019 年華為係智能手機相關嘅範疇,成績如何?邊部手機最好賣?一齊睇睇。文末仲有彩蛋,就係 EMUI 10 升級消息,華為 Fans 要留意!

huaweiEMU10.jpg

\先睇睇華為集團條大數

喺 2019 年華為預計全年銷售收入會超過 8500 億人民幣,跟上一年比較,增長咗 18% 左右。喺 2019 上半年,華為消費者業務銷售 (即係 Smartphone、平板電腦諸如此類啦) 收入有 2208 億人民幣。而華為集團收入總共有 4013 億人民幣,以手機為主嘅消費者業務收入佔咗 55.0%,可見呢部份嘅業務,係華為嚟講係好重要嘅。

智能手機業務

喺 2019 年,華為智能手機業務保持增長,預計全年發貨量超 2.4 億部,穩居全球第二架!其中,Mate 同埋 P 系列嘅旗艦智能手機,全球發貨超 4400 萬部,同早一年比較,增長超過 50%!

根據 IDC 數據 (專門調查不同產品銷量嘅機構) ,截至 2019 年 11 月 24 號,HUAWEI Mate 30 系列上市 60 日,全球出貨量 700 萬部以上,較 Mate 20 系列推出嗰陣,增長咗 75%!喺 2019 年第三季, 華為全球市場佔有率達到 18.6 %,發貨量比起早一年增長 28.2 %,排名第二。同期蘋果嘅份額係 13%。華為喺嘅中國市場份額,達到歷史新高,去到 42% 㗎!

而根據華為內部統計,截至 2019 年 10 月 22 號,2019 年華為手機全球發貨量突破 2 億部,比 2018 年 提前了 64 天。1 至 10 月嘅智能手機出貨量比之前一年增長咗 26%。至於中檔系列 Nova,截至 2019 年 7 月 30 號,累計發貨量,都超過 1 億部。可見,華為喺 2019 年,旗艦跟中檔智能手機,都賣得好好。

mate30pro.JPG
▲ HUAWEI Mate 30 Pro

全場景生態發展
華為消費者業務,喺 2019 年提出咗「1+8+N 全場景智能化生態戰略」,手機配搭 AI 音箱、平板電腦、電腦、穿戴設備、車機、AR/VR、智能耳機、智能屏幕等等,再結合照明、保安系統、環境等 IoT (萬物聯網) 設備,創造智能家居、智能車載、運動健康等,令用家享受係不同嘅場合,都感受到智能生活嘅好處。

截至 2019 年 9 月,華為嘅 HiLink 智能家居平台,已經跟全球 260 多個品牌合作,覆蓋超過 5000 萬用家同埋超過 1.4億 IoT 設備。呢嗰華為智選生態旨在為合作夥伴提供聯合創新平台,名為「方舟實驗室」。目前,華為終端全球註冊開發者已超過 107 萬。

華為雲服務生態使用者都超過 5.7 億,覆蓋全球 170 多個國家跟地區。華為應用市場AppGallery自 2018 年 4 月 喺全球範圍正式上架以來,全球月活躍用戶已經超 4 億。

華為消費者業務雲服務總裁張平安喺 2019 年華為開發者大會宣佈「耀星計畫」全面升級,從 10 億元人民幣增至 10 億美元,並且從中國市場推向全球開發者,加速激勵跟扶持全球開發者,推出更多創新服務。

華為品牌價值
福布斯全球品牌價值榜 100 強,華為列係第 97 位,亦係唯一上榜嘅中國企業。喺 2019 年 10月,國際品牌諮詢機構 Interbrand 發佈 2019 年全球品牌 100 強榜單,華為再次成為中國唯一上榜品牌,排名 74。

EMUI 10 升級消息

睇完華為喺智能手機相關業務嘅威水史,係咪覺得,用華為手機都好威威呢!咁就要聽埋呢個好消息,華為一系列智能手機,好快或已經可以升級建基於 Android 10 嘅 EMUI 10 系統,一齊睇睇以下嘅時間表啦!

EMUI10.jpg
▲ EMUI 10。 
 
手機名字 由 HiCare 不限量開放 全網開放
HUAWEI P30    1 月開始逐步推送
HUAWEI P30 Pro    1 月開始逐步推送
HUAWEI Mate 20    1 月底開始逐步推送
HUAWEI Mate 20 Pro    1 月底開始逐步推送
HUAWEI Mate 20X    2 月中旬開始逐步推送
HUAWEI Nova 5T    1 月底開始逐步推送
HUAWEI P20 1月初  3 月中開始逐步推送
HUAWEI P20 Pro 1月初  3 月中開始逐步推送
HUAWEI Mate10 1月初  3 月開始逐步推送
HUAWEI Mate10 Pro 1月初  3 月開始逐步推送
HUAWEI P30 Lite 1月中  3 月開始逐步推送
PORSCHE DESIGN HUAWEI Mate 20    1月底開始逐步推送
 
 
 
 
 
 
 
 
 
 
 
 
 
 



資料由華為提供

最新新聞