左右展開接近 U 型摺法 終於有獨立外屏保護柔性屏
今次嚟到深圳旗艦店，親手將部 Mate XT 2 攞上手，我第一個感覺係：今代個設計真係合理好多！之前我已經用過第一代 Mate XT，玩過上代嘅朋友都知，上一代係用「Z」字形摺法，外摺嗰截柔性屏經常外露，放喺枱面或者擺落袋好難得到完整保護。今代 Mate XT 2 改變咗摺疊設計，改為左右兩邊展開，更接近 U 型摺法。上手操作嗰陣，要先打開其中一邊、再打開另一邊，先至完全攤開成部三摺機。摺埋嗰陣正面係一塊 6.5 吋獨立外屏，比上代大咗 0.1 吋，展開之後就係一塊 10.2 吋 3K 大屏幕，機身厚度維持喺 3.5mm。內外屏各自獨立，內屏柔性屏收晒喺入面，安全感確實好過上代唔少。
第二代天工鉸鏈同三折疊玄武架構
耐用度方面，今代換上第二代天工鉸鏈同三折疊玄武架構，現場資料顯示抗跌提升 90%、抗衝擊提升 100%，就算喺 1.2 米高度跌落都頂得住，外屏抗刮能力亦提升 16 倍，抗濕能力提升 30 倍，仲支援埋 IP58 同 IP59 防塵防水。現場我試咗白色同錦紫兩部真機，側邊都有非凡大師徽章。我自己就比較鍾意紫色版本，因為佢機背用咗錦纖維編織材質同經緯紋理，摸上手帶有立體紋理，手感同平滑嘅白色版本完全唔同，鏡頭模組亦採用咗星鑽設計。
現場實試靈盾防窺：用手指輕點兩下背屏即開
今代 HUAWEI Mate XT 2 另一個我好期待嘅功能，就係摺疊屏首發嘅「靈盾防窺屏」。以前 Samsung 喺直版機出防窺嗰陣，我已經覺得摺機更加需要，因為展開成 10.2 吋咁大個芒，企喺隔離好易睇晒你部機。今次實機操作，只要喺完全展開狀態下，用一隻手指輕點兩下背面屏幕，或者喺頂部下拉控制中心，就可以即時開關「屏幕防窺」。設定入面亦有「始終開啟」、「打開受保護應用時開啟」同埋「關閉」三個模式，亦有偷看偵測提醒。
我喺現場切換到始終開啟之後，正面睇個芒只係稍微暗咗少少，依然睇得好清楚；但當我企喺側面角度望過去，成個屏幕就變暗睇唔到內容。除咗硬件防窺，發佈會仲示範過將左右兩邊屏幕向內收起、只用中間塊芒嚟做物理遮擋。另外手機展開之後，用手指按住機側指定位置仲可以做 ECG 心電分析，同埋支援有隔空操控功能嘅 M-Pen 3 Mini 筆同旋轉支架保護殼。
Kirin 9050 Pro 實機多工：開三個 App 左右滑動極順
我手上試玩呢部 HUAWEI Mate XT 2 係 16GB RAM 配 1TB 儲存空間，行 Kirin 9050 Pro 晶片。資料指整體性能比上代提升 42%，Maleoon GPU 導出 4K 片快咗 40%，天通衛星通訊速度都快咗 40%。喺 10.2 吋大芒上面，我試玩咗全景多窗、分屏同懸浮窗。喺邊緣拉出應用程式，最多可以同時開三個 App，喺視窗之間左右滑動切換或者隨時轉全屏，反應好順暢，用嚟開 WPS Office 做嘢十分就手。
第三代紅楓原色鏡頭
相機方面用咗第三代紅楓原色鏡頭，色彩還原度去到 95%，配備 5,000 萬像素主鏡（支援 F1.49 至 F4.0 連續可變光圈）、4,000 萬像素超廣角鏡頭，同埋 5,000 萬像素潛望式長焦鏡頭，支援 3.5 倍光學變焦、7 倍光學品質變焦同長焦微距。充電方面，發佈會未有提及實際電池容量，但店員現場查規格表示支援 66W 有線快充同無線反向充電，無線充電具體速度就暫時未有公佈。
▲ HUAWEI Mate XT 2 三摺機嘅售價，可以 Click 番呢篇文，送上有聲有片嘅 Video 評測