告別窄芒！16:9.5「闊直板」手感極爽
平時啲手機比例去到 20:9 甚至 21:9，部機長到好似電視遙控器咁，揸就容易揸，但睇網頁、睇波、睇股票圖表真係「縮埋一嚿」。呢部 HUAWEI Pura X View 最吸引嘅就係呢塊 6.39 吋 OLED 螢幕，採用全新嘅 16:9.5 闊直板比例，解像度有 2232 × 1320 。四邊等窄黑邊：黑邊得 1.05mm 咁窄，正面望落去近乎成塊玻璃咁。機身闊度有 87mm，睇 PDF、股票走勢圖或者打橫玩遊戲，可視面積大咗成截。以前鍵盤粒掣細到成日打錯字，依家闊芒設計兩隻手姆指飛快打字都唔怕按錯隔離，真係就手好多。
6.68mm 薄到似張紙，居然塞到 7000mAh 核電
平時話部機又薄又輕，大家第一時間一定聯想到電量肯定倒水啦。但今次華為將機身厚度壓到得 6.68mm，重量亦得 201g 左右。最誇張嘅係，佢用咗新一代高密度矽負極電池，喺咁薄嘅機身入面居然夾硬塞咗舊 7000mAh 超大電池！仲支援 66W 有線快充加 50W 無線快充。加上有齊 IP68 同埋防高壓熱水嘅 IP69 級別防水防塵，粗用淋雨都完全冇有怕，呢部機根本唔使帶尿袋出街！
2 億像素 XMAGE 鏡頭 影相交足功課
除咗個芒夠特別，影相硬件一樣無偷工減，主鏡頭用咗 2 億像素超聚光主鏡（RYYB、F1.8 大光圈、有 OIS 光學防手震）長焦鏡頭係 5000 萬像素潛望式長焦（F2.6 光圈、OIS、3.7 倍光學變焦）。仲有 800 萬像素超廣角微距，再搭多個第二代紅楓原色鏡頭校色。 處理器部份，用咗 Kirin 9030S 晶片，配合 6400mm² 超大 VC 均熱板，行 HarmonyOS 7 系統，順滑度極高。首批水貨搶先到貨！三款容量開價一覽
HUAWEI Pura X View 啱啱開賣第一日就畀人掃咗超過 18 萬部。香港水貨舖第一時間拉貨返嚟，目前先達場內嘅報價如下：● 12GB RAM + 256GB ROM：HK$7,680
● 12GB RAM + 512GB ROM：HK$8,780
● 12GB RAM + 1TB ROM：HK$10,980
來源：三禾電器