Sony XZ、X Compact 大舖反應一般，LG V20 推出後減價機會大？
目前來看，各廠商下半年旗艦新機之中，唔計 iPhone 7 / 7 Plus，版主個人覺得就以 Sony 手機最生性。點講好呢？始終好與唔好，呢啲野好主觀，我覺得好，網友未必會 buy，所以過多的個人意見，我就唔講咁多。至少在手機設計上，對比 LG V20、Google Pixel，我會認為 Sony XZ、X Compact 贏幾條街。而 XZ、X Compact 衰在咩呢？3GB RAM 版主個人覺得唔係大問題，但衰在性價比唔夠高，大舖一出，分別只係即減 $300 同 $400，實在是太少，XZ 依然是處於五字頭的價位，賣 $5398，而 X Compact 則賣 $3798。
▲ Sony XZ 大舖價為 $5398，而 X Compact 則賣 $3798。
平過大舖最多 $600！細舖新低價，跌穿心理關口未？
版主行場的時候，跟大舖 sales 傾開，職員猜測，Sony XZ、X Compact 之所以減咁少，係因為想睇下市場反應先，如果市場反應欠佳，可能在 LG V20 推出之後，就會調整賣價。據悉 XZ、X Compact 大舖開賣之後，反應、銷量只是一般，估計會調整賣價的機會很大。不過，距離 V20 開賣至少仲有大半個月，版主都唔想等落去。唔洗等大舖減價，XZ 在深水埗細舖已經跌穿五千價位，最新賣價約為 $4780，比大舖便宜超過 $600。而 X Compact 亦都跌到約 $3380，平過大舖 $400。呢個價錢，跌穿網友心理關口未？
▲ 細舖 Sony XZ 平過大舖 $600，網友覺得，呢個價跌穿了心理關口未？
上台出機會更抵？Sony Xperia XZ 瘋劈 $1300！
戴定頭盔先，其實呢個已經唔係 news，版主想講嘅係數碼通的客戶簽約價，只需 $4398，就可以購得 Sony Xperia XZ。不過點解唔係 news 都要提呢？因為數碼通呢個客戶簽約價確係抵玩，唔似其他出機 Plan 咁，要捱貴月費。就算你選用 $88 貼心智能手機月費計劃 (另加每月 $18 行政費)，都一樣可以優惠價出機。唯一缺點係，SmarTone $88 的月費計劃，網絡速度不高於 384kbps，而且唔能夠 Wi-Fi Tethering + 點對點傳輸，但好處就係，可以享有 12 個月 SmarTone 「爆芒換新」服務。如果網友能夠接受以上的缺點，其實 SmarTone 目前應該仍然比細舖更抵玩，網友又點睇呢？
Sony Xperia XZ 在文章發表時，大舖賣價為 $5398，按這裡有詳細規格及最新賣價。
Sony Xperia X Compact 在文章發表時，大舖賣價為 $3798，按這裡有詳細規格及最新賣價。