中原減價 限量 8 件都賣唔出？細舖最平五千有找入手 Sony Xperia 5-III

左定坤 (Cho Ting Kwan) 2022-04-19 18:10 | Sony

提到中原，我哋講得最多，應該係佢哋嘅手機特賣區。不過除咗特賣區，似乎都無乜誘因我哋會去中原買嘢，多數要買手機，都會去衛訊；買家電，就去豐澤；買相機，都會揀蘇寧或者百老匯。除非，佢哋真係賣得好平啦。最近派咗消費券，佢哋又效法其他大舖搞優惠，其中將 Sony Xperia 5 III 減價，限量 8 部喎！但估唔到放咗全日，都仲有得賣，即係都賣唔出。與其要同人「搶」，其實出面呢部手機五千有找㗎咋！所以話，買機之前，真係要格清楚價錢先得！

由即日起至 2022 年 4 月 21 日，中原就限時兼限量，將 Sony Xperia 5 III 減價至 $5999 喎，嘩好抵呀，仲要得 8 部，點知放咗全日，都見到仲有貨，仲係 $5999，即係連 8 部都賣唔出。一定唔係中原問題啦，實係只係價錢唔合網友心水啫，一定係，除非唔係。



其實，出面細舖比起中原呢個「限時限量」嘅價錢更平更抵，首先睇下行貨，最新賣價約為 $5480，相比中原呢個價錢仲要平多 $500，而如果想再平啲，水貨最近更落到 $4950，又再平多 $500，咁如果真係想買機，你會考慮去邊度買機呢？

規格方面，Xperia 5 III 採用咗 6.1 吋 OLED 屏幕，配備 Qualcomm Snapdragon 888 處理器，內置 8GB RAM 以及 256GB ROM，電池容量為 4500mAh。相機部分，Xperia 5 III 具有 12MP 三鏡頭，分別為標準、超廣角、潛望式望遠變焦鏡頭，而前置鏡頭則為 8MP。