開箱！8 + 128GB 頂配版魅族 16th
▲ 說實的，還以為作為 2018 年魅族最重點機款，會有更霸氣的包裝呢～
▲ 魅族 16th 配件一覽，USB-C 線、火牛、sim卡針有齊，仲有一個「清水殼」，但主要只包機背
▲ 跟機火牛輸出最多可以去到 24W，官方提到 30 分鐘就能為手機充電 67% (留意，香港推出時，當然會配番一個 UK 三腳充電器)
▲ 先來觀賞下白色版魅族 16th 正面同背面
魅族 16th 超窄邊框比 S9 去得更盡！
首先正如之前版主阿坤都提到，魅族目前只會將 6 吋芒的魅族 16th 引入香港，而今次版主手上的 sample 就係 8GB ram / 128GB ROM 魅族 16th 白色版。以外型來講，魅族 16th 係設計上正如佢哋今次口號「不亂設計就是最好的設計」，輕同薄就係魅族 16th 其中一大賣點，只得 7.3mm 厚同 152g 重，配合 6 寸 18:9 屏幕，單手操作亦相當輕鬆。外觀上你好難一下子對魅族 16th 有好深刻印象，不過替工版主都覺得有兩個值得一提嘅地方：首先就係魅族 16th 維持係保持高屏佔比（91.18%) 嘅情況下唔用「M 字額 (瀏海屏) 」，而做法同 Samsung Galaxy S9 相似，上下邊框仍然保留而且保持對稱，係滿街都係「iPhone X copycat」嘅情況下保持自我，個人覺得係值得欣賞。另外就係，仔細比較過黑 / 白兩色之後，替工版主會強烈建議有意入手嘅朋友，選擇黑色版！雖然以技術上而言，機面用上白色面板係有相當難度，因為魅族 16th 除前鏡頭之外，將機頂部份有多個 Sensor 連埋呼吸燈都隱藏了，令外觀變得更簡潔。不過白色最大問題就係，視覺上震撼力弱多了，即使你知道左右邊框只得 1.43mm，上下邊框得 7mm，換言之比起 Galaxy S9 更出色，但因為白色嘅顯眼，你仍然會感受到邊框切切實實嘅存在，甚至有點礙眼。機背方面黑色版本有著近似鏡面一樣效果，雖然係一個指紋受集器，但替工版主係現場上手比較過後就認為，黑色版魅族 16th 看起來更旗艦機款應有的高貴感覺，白色版相對上則略為平實，無乜特色。
▲ 官方連4個角都有標榜係「6段孤度」的「最大R角」，另外單純以白色面板計，魅族 16th 算係相當簡潔了
▲用上 mBack 2.0 操作方式就會見到機底有一條 mBack 橫條了，另外相信大家明白到點解替工版主不斷提到白色版本不如黑色版好，因為邊框再窄都好，係白色面板之下視覺上仍是很突出呢⋯⋯
▲ 魅族 16th 只有三個實體按鍵，一眼睇晒，就係開關同音量鍵啦
▲由於並不支援 Micro SD 卡，所以從 sim 卡插槽都可以見到，係做到真雙 SIM 㗎
▲天線主要集中係機面同機底部份
▲機底保留了 3.5mm 插口，同時留意魅族 16th 係擁有一對立體聲喇叭的
▲ 白色版本的機背相當簡潔，相機方面魅族用了 1200 萬像素與 2000 萬像素的雙鏡頭組合
▲白色版本的機背並不容易沾上指紋，但就算不上令人眼前一亮
▲受惠於魅族 16th 的輕與薄，單手操作下仍然相當輕鬆，當然缺點同時都係略嫌有點太輕，無咩實在感
首度搭載 Qualcomm 旗艦處理器 贏在「銅管液冷」？
作為魅族首部用上 Qualcomm 頂級處理器嘅旗艦，官方對魅族 16th 當然是寄予厚望，事實上係發佈會現場試機環節，替工版主都能夠做到 29 萬分以上嘅成績，比起官方數據高之餘，從安兔兔數據看來亦更勝一眾 S845 旗艦。可惜當版主用返軟體不是正式版本嘅國際版魅族 16th，又再來一次跑分，最高都只能做到 28 萬左右。可以提一提係魅族為左提升使用體驗，除左係軟件上落左功夫，同時亦用上「銅管液冷」散熱，效果如何，最好真係透過打機去實踐，可惜時間所限，玩唔到「食雞」，唯有稍後有機會補上了！
▲ 利用非正式的魅族 16th 國際版本， 29 萬超強跑分也不復再了，不過，廿七萬，廿八萬都係 S845 嘅跑分水平，代表最高規格嘅效能。
▲ 於連續讀寫 Sequential Read 一欄，見到過 700mbps 嘅讀數，代表呢部機，都係用上 UFS 2.1 嘅 ROM，傳送大型檔案時，會感覺好快好爽。要睇平時操作運作，ePrice 嘅大師 YK 叫我睇下 Random Write 隨機讀寫，這個跟廠嘅軟件設計有關，21.9MB/s 嘅讀數，跟 ePrice 最近為 S845 CPU 手機嘅評測得出嘅分數相約，代表平時運作，都跟傳統手機大廠，有類似的速度感。
IMX380 高水準相機模組
以相機表現而言，魅族向來算唔上係 Android 廠牌之中最頂級，大致可以話中規中矩，而今次魅族 16th 重點就放係同樣為魅族 15 所採用嘅 IMX380 感光元件，配合四軸光學防手震、首度加入嘅全自動 HDR 、三倍無損變焦，同埋廠方亦提到魅族 16th 擁有全新 AI 場景識別功能。來到實際環境，魅族 16th 效果又如何？係只得短時間嘅實拍之下，替工版主目前得出嘅結論係魅族 16th 同上代魅族 15 水準相當，並未有好明顯提升，恐怕要同價位高出一大截嘅 Android 旗艦相比，會略有差距，但考慮到價位還不到四千蚊，表現都算係恰如其分。室內場景實拍
▲魅族 16th 有能力輕易分別到食物從而轉換場景，拍出來的相片比現實再要美！但大家放大來「聞相」的話，還是會有見到一點油畫，不過顏色上整體而言都算討好
室外黑夜場景火拼 魅族 15 Plus
▲ 其實可以見到魅族 16th 與其上一代 15 plus，兩部手機都能係一個「肉眼都睇唔到咁清」嘅昏暗環境下交到貨。而兩者係色調上是有幾明顯分別的，15 Plus 較為濃烈而 16th 就較為明亮。
屏下指紋 + 全新操作模式 mBack 2.0
魅族手機向來以自來「小圓點」自豪，即使有一段時間小圓點改為 mBack 按鍵，但佢哋一直都堅持係機面加入 Home 鍵或者指紋掃描器。要迎合「全面屏」潮流，佢哋終於都要作出改變啦！魅族 16th 其中一大賣點正係加入「屏下指紋」，以香港來計目前就只有華為 Mate RS 同埋 vivo NEX 、 X21 擁有呢項賣點，而係價錢上後兩者明顯要高出一截（X21 更加只有 S660 處理器，算唔上旗艦呢），魅族 16th 就成為「全港最平屏下指紋」手機。首次使用當然要登記指紋，過程同以往亦無不同，過程相當簡單快捷。魅族官方提到，其屏下指紋技術已達到相當成熟嘅程度，擁有 99.12% 識別成功率以及識別速度快至 0.25 秒。替工版主原先諗住為大家試足 100 次，睇下係咪真係咁強勁，不過念頭好快打消了。因為實際用起來，如果初時你未熟習的話，要一次就能成功解鎖，著實不容易，建議大家係解鎖時，盡量將手指對準感應器範圍。不過當習慣了之後，魅族 16th 解鎖速度之快，過程之爽，同埋當中帶俾你嘅新鮮感以及虛榮心，是會令人上癮的！可以預期，往後屏下指紋定會成為主流，而魅族 16th 嘅使用體驗相信可以作為一個標準呢。
用上全面屏，魅族亦唔係單純用返 Android 三天皇鍵咁簡單，而係加入左 mBack 2.0 同埋「手勢導航」兩種操作方式，mBack 2.0 用法大致上同 iPhone X 如出一轍，輕按底部 mBack 橫條返回，底部兩邊向上推進入多工畫面，值得一讚係用力按一下 mBack 橫條等於按一下 Home 鍵，直接回到畫面，算係容易上手嘅操作方式。「手勢導航」相對上較難上手，係屏幕邊緣短滑一下係返回、係屏幕邊緣長滑一下回到主畫面，而長滑再停留一陣就進入多工畫面，集慣左或者會係一種好暢快嘅使用方式，但要時間熟習也未免太煩了，替工版主都係會推介用返 mBack 2.0，直覺又爽快！
▲ 可以見到，係平時拿起手機嘅時候，屏下指紋指示都會出現，等大家可以輕鬆就好位解鎖
▲使用上，只要試多幾次，知道屏下指紋掃描器壓位置，就容易解到鎖了
▲ 魅族為首部「全面屏」魅族 16th 準備了兩種全新操作手法，講真要炫耀嘅話，當然是用手勢導航最型。但係 mBack 2.0 操作上就相當有魅族手機影子，個人更喜歡
總結：一部以平取勝的 S845 旗艦 無 NFC 是大問題
講咗咁多，如果回到最基本問題，就係魅族 16th 到底是否值得買，替工版主都覺得係一個相當唔容易答嘅問題。從規格、定價甚至係各種新加入嘅特色，無疑魅族其實係相當有心機。試想下只 sell「旗艦殺手」，即係毫無特色嘅 OnePlus 6 最平都要賣 $3998，魅族 16th 已經有得玩埋屏下指紋，效能從數字上而言甚至更好，仲可能同樣價位已經玩到 8GB RAM + 128GB ROM 了，能令人唔心動嗎？奈何魅族就係喜歡「缺憾美」，相機表現係爭得咁勁嘅環境下，影得唔錯，但有好大嘅進步空間，呢一點相信消費者都能理解，但缺少咗 NFC，呢項由 Google Pay 去到八達通等等都會用到嘅功能，想必會令好多人即時打消入手念頭吧？其實係中國大陸以外嘅市場，NFC 真係好重要，好重要，好重要，要講三次，希望魅族想繼續打歐洲市場嘅話，至少係國際版，加回 NFC 吧在文章發表時，魅族 16th 香港上市日期未定，有關中國大陸嘅賣價，請按呢到，按這裡有詳細規格及最新香港賣價。