大鋪最平 Smartphone 仍然由 Nokia 包辦！ Lumia 530 Dual SIM 八舊水唔使！
心水清的朋友應該都已經估到，幾百蚊要搵部 Android 手機係相當困難的一件事來，所以今次可以比紅米 2 更平的手機就係講緊一眾 Nokia 年代的 Windows Phone 啦！首先登場的就係 Lumia 530 Dual SIM ，呢部 Lumia 530 而家睇返個規格又真係幾弱雞。除左唔支援 4G 之外（不過係有雙卡的），屏幕都只係得 4 吋 480 x 854 解像度，處理器就係 Qualcomm S200 1.2GHz 配 512MB RAM 而且內置容量只有 4GB （好在支援最大 128 GB microSD 記憶卡）。相機方面就係有 F2.4 光圈的 500 萬像素主相機。規格唔多掂就唯有用平價搭夠啦！減完價之後 Nokia Lumia 530 Dual SIM 賣價只係需要 $788 ，平過紅米 2 ！
▲ 係減完價之後， Lumia 530 Dual SIM 去到 $800 有找，真係幾難搵到俾佢更平的手機。
規格較強，價錢貴一舊水！Lumia 630 Dual SIM 平小米 11 蚊！
如果嫌 Lumia 530 Dual SIM 只係得 Qualcomm S200 同埋 4GB ROM 真係唔知點用的時候，可能以下呢部會比較好少少嘅。同樣一齊減到千元樓下嘅機就係 Lumia 630 Dual SIM 。作為一部平價手機，只係得 3G （不過都有雙卡）同埋個 4.5 吋芒只有 854 x 480 解像度就預左，但係處理器上比 Lumia 530 Dual SIM 好，有 Qualcomm S400 1.2GHz 配 512MB RAM 同埋 8GB ROM （同樣支持最高 128GB 記憶卡擴充）。而相機方面都係得支援 Nokia Pro Cam 功能的 500 萬像素主鏡頭。規格比起 Lumia 530 Dual SIM 好，價錢當然都係比較高啦， Lumia 630 Dual SIM 係減完價之後都比紅米平，只需 $888 ，平 $11 蚊！
用信用卡買機係有平，但 Lenovo A606 又是否抵買？
講完一堆平過紅米的 Windows Phone ，對 Windows OS 避之則吉的朋友們相信都會講晒粗口。要搵比紅米 2 更平的 Android 手機又唔係無可能嘅，近日某大鋪就做緊信用卡優惠，可以用 $879 入手一部 Lenovo 手機。果部就係版主曾經提過， Lenovo 用來挑機小米的 A606 。雖然用左優惠之後 A606 會比紅米 2 平廿蚊，不過規格上就真係差得遠啦， A606 除左個 5 吋芒得 480 x 854 解像度之外，處理器上就用左 MTK 的 MT6582M 1.3GHz 配 1GB RAM 同 8GB 內置容量（但最多只支援 32GB MicroSD 記億卡）。相機就有800 萬像素主鏡頭及 200 萬像素前置鏡頭，電池就係 2000mAh 。其實咁計法好似紅米 2 仲抵玩啦⋯⋯
▲ Lumia 630 Dual SIM 而家賣緊 $888 ，可惜唔支援 4G 。
▲ 雖然價錢唔算好貴，不過版主個人就覺得因為規格問題都唔算吸引。
總括來講，大家可以見到其實目前要係市面上搵到比紅米 2 更平的手機真係相當唔容易，而且對手規格都真係麻麻地。版主一開始都唔明點解紅米 2 係香港推出時仍然要「輪米」，原來真係有原因嘅。大家又覺得一眾平價手機之中有邊部機係值得推介呢？快啲留言分享下啦！
在文章發佈的時侯，Nokia Lumia 530 Dual SIM 賣價為 $788，按此看詳細規格和最新賣價。
在文章發佈的時侯，Nokia Lumia 630 Dual SIM 賣價為 $888，按此看詳細規格和最新賣價。
在文章發佈的時侯，Lenovo A606 賣價為 $1,099，按此看詳細規格和最新賣價。