小米 Note 頂配版開箱！ 能否成為效能皇者？
目前來講，小米 Note 頂配版在香港開賣真係可以話遙遙無期，係大陸小米雖然為呢部機定的價錢只係 2999 人仔，但在小米官網購買的話仍然需要預約先可以買到（大家輪過米應該明有多難），所以要入手實在不是一件容易的事。講返手機的規格，同 Le 1 Pro 一樣，小米 Note 頂配版都係支援中港 3G 同 4G 的（係沒有電信的 CDMA ），再加上有雙卡雙待，對經常往返中港的朋友來講算係再多一個選擇。另外，今次版主試玩的大陸水貨版本已經有繁體中文，但係 Google Service 就要店家日後再安裝啦。另外，係規格上，小米 Note 頂配版作為目前小米規格最強的手機，除左 4G 雙卡外，屏幕都有 5.7 吋 2K 解像度 IPS 屏幕，處理器就係 Qualcomm S810 2.0GHz 八核配合 4GB RAM ，內置容量多達 64GB 但就不能插卡。係相機方面就用上左 Sony 的 1300 萬像素支援 OIS 防手震相機同埋 UltraPixel 400 期像素前鏡頭。電池就係不可換式的 3090mAh 電池。
▲ 小米 Note 頂配版係用上黑色包裝盒，當中都提到小米 Note 支援頻段支援香港 4G 。
▲ 配件不算多，只得 USB 線、充電器同埋說明書。
▲ 正面小米 Note 頂配充滿「小米風格」，即係左上角的 MI 字樣同 Menu 、Home 與 Back 「三天皇鍵」。
▲ 係鏡頭方面，可以見到小米 Note 頂配版係有點「突出」。
▲ 3.5mm 插口位置位於機頂，而 USB 插口同喇叭就係機底。
▲ 音量鍵同開機鍵都係機身右邊，同 HTC One M9 的按鍵報置一樣。
▲ 小米 Note 頂配版係支援雙卡，sim 卡槽 1 係 Nano Sim 而 sim 卡槽 2 就係 Micro Sim 。
▲ 機背予人感覺相當簡潔。
▲ 同樣係玻璃材質機背，我地將 S6 Edge 白色版同小米 Note 頂配版作個對比，大家又覺得邊隻色討好啲呢？
▲ 以 5.7 吋大屏幕來講，小米 Note 只係厚 7mm ，實在不錯。
講完規格就要講下手機的外型同手感啦！作為小米 Note 頂配版的主要特徵，係顏色上呢部機只係得白色機身版本，而金屬邊框就係金色的，是否好看實在見人見智，但個人覺得如果有多隻色揀同埋沒用金色作為邊框顏色就會較好。係造工方面其實大陸廠牌技術發展得相當迅速，即使係用左前後雙玻璃面同埋金屬邊框再加上高屏估比，對於小米來講都不是甚麼問題，手機整體感覺相當扎實。用上玻璃機身有甚麼缺點相信大家都知道，就係手機機背會變成「指紋掃瞄器」，影響觀感。但因為小米 Note 頂配版用左白色的關係，版主試用後發現同現時所用的 Galaxy S6 Edge 白色版一樣，沾上指紋亦不會很明顯，算是值得高興的。至於有甚麼不足呢？版主個人就仍然稍嫌金屬邊框有點刮手，但整體手感同版主而家用緊的 S6 Edge 相比實在好唔少。
提升至 2K 解像度屏幕！可視角度不錯色水偏冷
來到屏幕比較方面，係呢部份有點可惜的是版主手頭上並沒有大芒手機，只能用同樣係 2K 解像度的 S6 Edge 作為對比了。係屏幕上小米 note 頂配版係提升到 2K 解像度後表現可以話係滿意但並非完美，主要原因係在光度上仍然有改善的空間，當然係其他方面好像細緻度同可視角度來講，小米 Note 頂配版實在沒有甚麼可挑剔地方。
▲ 可視角度上小米 Note 頂配版係低角度下也沒有偏色等的問題。
▲ 對於不能分辨 FHD 同 2K 解像度的版主來講，小米 Note 的屏幕沒有甚麼可挑剔的地方。
4 片石墨散熱可以解決 S810 高溫問題？小米 Note 效能測試！
有關小米 Note 頂配版的效能，其中一個不少人討論的地方就係用到 2K 芒，仲要係 S810 同 4GB RAM 。不少人都擔心會否有過熱的問題，但小米就強調佢哋用左四片石墨的設計去散熱。雖然之前 ePrice 都做過一次小米 Note 頂配版跑分，除左成績不錯之外也沒有過熱的情況，但係今次版主試玩後就對所謂的石墨散熱有點保留了，一齊睇睇！
▲ 一開始用安兔兔跑分，係 4GB RAM 加持下小米 Note 頂配版輕易上到 59329 分呢個高水平。
▲ 係 Vellamo 跑分方面，小米 Note 頂配版一樣有著亮麗的表現。
▲ 係 Basemark 2.0 上面，有著 2K 屏幕下仍然有 58.96 FPS 呢個成績算係很好了。
▲ 講到 S810 的過熱問題，其實版主覺得在小米 Note 頂配版上仍然係有點「熱辣辣」的情況，係跑完 Vellamo 同 Basemark 2.0 後（第一次安兔兔跑分在稍早時間做好所以不計算在內），手機機背已能感受到有點辣手了。為左睇下佢會否即時沖上 60 度版主即時再跑一次安兔兔，可以見到小米 Note 頂配版分數大跌一萬，相信是做到降頻的措施。
Sony 1300 萬像素 F2.0 光圈鏡頭，日拍表現如何？
不知大家有沒有留意到，其實小米 Note 頂配版同樂視的 Le 1 Pro 係規格上係有不少相似之處的。之前提到相機方面小米 Note 頂配版有 F2.0 大光圈 1300 萬像素主鏡頭。初步使用之後，係相機開啟速度同埋對焦反應兩方面都不算出色（比起 S6 Edge ，但要求也可能太高了）。由於時間關係，版主只係做到日拍部份，以下係少許可以作參考的照片。
總結：各方面都是大廠旗艦水平，四千頭的小米 Note 頂配版能否吸引到你？
總括來講，初步試玩完小米 Note 頂配版後版主真的很難找到有甚麼明顯的不足。（除左主觀的不喜歡金色邊框襯白色機背外）係造工、屏幕等都有旗艦應有的質素。只係在效能上即使小米用左不少方法去改善 S810 所散生的發熱情況，但感覺上仍不覺得跟其他 S810 手機有明顯的分別。在售價方面，之前版主提到水貨小米 Note 頂配版在價錢上是便宜了，約為 $4080 。大家又有沒有興趣在小米 Note 頂配版於香港正式推出時入手呢？留言講講意見吧。在文章發佈時，小米 Note 頂配版仍未有香港定價，按這裡有更詳細規格。
嗚謝及查詢：國內手機代購