芒細咗，手感會好咗？紅米 6 有 5.45 吋芒，無 M 字額
除咗小米 8，今日仲有另一部手機抵港，佢就係紅米 6。外觀上今次沒有「抄考」iPhone X，唔使見到 M 字額瀏海屏，對米粉來說應該算係好消息。而在之前發佈會上都有講過，因為有唔少用戶反映紅米 5 機身太大，所以今次紅米 6 就由舊代嘅 5.7 吋，改用 5.45 吋，屏幕比例保持 18:9，配合高屏佔比，令機身大小相等於傳統嘅 5 吋手機。另外，紅米 6 用上了「小楊柳腰」設計，版主拎上手又覺得的確手感幾好，幾舒服。
▲ 紅米 6 用上了 5.45 吋 18:9 芒，屏佔比有 80.5%，不過版主覺得條邊依舊有點粗。
▲ 屏幕上方具有 500 萬像素前置鏡頭。
▲ 可以見到屏幕用上了圓角設計。
▲ 機背採用了金屬材質，版主剛巧手上有藍色同金色，俾大家睇下。。
▲ 一千蚊左右就有雙鏡頭，算係一個賣點，兩個鏡頭都是 1200 萬像素，其中一個鏡頭主要用作人像拍攝。
▲ 機背下方除咗有小米 logo，仲會見到有個喇叭。
▲ 機身右側會有音量鍵以及開關鍵。
▲ 而左側則有真三卡插槽。
▲ 機頂會有 3.5mm 耳機孔。
▲ 而機底則有 microUSB 插槽。
▲ 用上「小楊柳腰」設計，對於手細嘅版主來說，手感的確是幾舒服。
首發 MTK Helio P22 處理器，效能真係好過舊代 S450？
今代的紅米 6 棄用了 Qualcomm 處理器，改用了 MTK U，是現時第一部用上 Helio P22 的手機。論頻率，舊代紅米 5 用上的 S450 處理器，只有 1.8GHz，而今代的 Helio P22 則有 2.0GHz，理論上效能會相對提升；論功耗，舊代紅米 5 的 S450 處理器，用上 14nm 制程，而今代的 Helio P22 則用上 12nm 制程，理論上會相對更省電。不過，真正用落係唔係如理論般咁慳電，因為版主都無機在手，未能試到俾大家知。而在現場有限的時間內，版主只能用安兔兔跑分軟件，簡單測試一下紅米 6 的效能。
▲ 結果是 75750 分，數字上來看確實是比舊代高出 20000 分左右，其中進步得最多的，正正就是 CPU 的分數，然而在 GPU 的成績來看，卻比起舊代低，似乎如果用來打機的話，會比起紅米 5 更為吃力。不過，$1000 左右買部手機，應該都唔會 expect 用來打機，基本使用如果用得一兩日，應該都係一個不錯的結果。唔知網友又點睇呢？
紅米 6 (3GB + 32GB) 在文章發表時，建議零售價為 $999，按這裡有詳細規格及最新賣價。
紅米 6 (4GB + 64GB) 在文章發表時，建議零售價為 $1299，按這裡有詳細規格及最新賣價。
