雖然紅米 Note 8 Pro 所用嘅係 MTK G90T,大家見到 MTK 呢三個英文字母,已經忍唔住卻步,但事實上用落係咪真係咁差呢?我唔係用嚟玩食雞,不過間唔中玩下近期幾 Hit 嘅 Mario Kart Tour,體驗係相當流暢,唔會有任何窒嘅感覺,反而早兩日拎返之前用 S855 處理器嘅 Lenovo Z6 Pro 出嚟玩,玩 Mario Kart Tour 會有少少控制不順。初步試玩紅米 Note 8 Pro 呢幾日,個人覺得暫時對佢嘅效能都算滿意。
不過,對我嚟講更重要嘅,係手機續航表現,始終我都唔係啲鍾意成日用尿袋叉電嘅人 (但偏偏我出街會袋住 3-4 舊尿袋,以備不時之需 )。而關於續航部份,版主會用 GeekBench 4 應用程式來進行測試。點解係用 GeekBench 4?主要原因有二:
1) 雖然 GeekBench 5 已經推出咗,但續航測試仲未有,暫時只能用返舊版本。
2) 因為我哋大部份手機都有做 GeekBench 4 續航測試,正因為這樣,我哋數據上可以更有比較性,用數據去比較在相同的運作條件下,大家的續航成績。
而根據 GeekBench 4 續航測試,紅米 Note 8 Pro 得出的成績有:
每次進行 GeekBench 4 續航測試,版主都會先將手機充電至 100%,屏幕亮度設至 0%,再開啟飛航模式,以減低影響結果的因素。經過大約 9 小時 31 分,紅米 Note 8 Pro 嘅 4500mAh 電池終於耗盡,而得出成績有 5740 分,根據我哋測試過嘅數據,呢個成績同用 S855 Plus 嘅黑鯊遊戲手機 2 Pro 相若 (S855 Plus 得分約 5820),成績算是不錯,滿足一天使用,問題理應不大。
至於在版主實際使用上,雖然我唔係用紅米 Note 8 Pro 作為主機,主要都係搭九巴打下機,平時由大埔出旺角大概 1 小時嘅路程一直玩住 Mario Kart Tour,落車大有 92% 左右,而且並無網友所講會發熱嘅情況。
呢個成績,網友又點睇呢?
紅米 Note 8 Pro (64GB) 在文章發表時,建議零售價為 $1699,按這裡有詳細規格及最新賣價。
紅米 Note 8 Pro (128GB) 在文章發表時,建議零售價為 $1899,按這裡有詳細規格及最新賣價。