手機平板二用！超薄摺機 + LEICA 鏡頭！小米 MIX Fold 2 減價迎 MIX Fold 3

左定坤 (Cho Ting Kwan) 2023-08-08 21:41 | 小米

最近版主收到三星 Galaxy Z Flip5 以及 Galaxy Z Fold5，就急不及待即刻開嚟玩，兩部摺芒機二刀流，其實玩咗兩日覺得幾正，以前覺得大機麻麻，但呢排又玩得好開心，細機有細機用途，大機又有大機用途，當然我主要用途都係用來打機啦～市場上其實我仲想玩嘅摺機有好多，小米嘅 MIX Fold2，都係我好有興趣嘅摺機之一，主要原因係設計我覺得幾型幾靚，雖然行貨無賣，而水貨剛到港時仲要叫價五位數字，但隨住 MIX Fold 3 快要推出，MIX Fold 2 已經落價不少，想知最新賣價幾多，睇下文啦！

小米 MIX Fold 2 清貨迎 MIX Fold 3

小米 MIX Fold 2 水貨剛到港時，叫價過萬元，當然有錢人唔會覺得貴，對一般普通用家嚟講，買來當玩具又稍為奢侈。不過，隨住新一代 MIX Fold3 即將推出，現有 MIX Fold2 都已經減咗唔少價，而家市場最新賣價，見到有網店「國內手機代購」表示有清貨，最平版本八千頭入手，不過如果留意某格價網，旺角先達一間都算係信譽不錯的細舖，最新報價 $7950，跌穿八千關口，但如果大家對呢部 MIX Fold2 有興趣，可以先問下有無貨，真係無貨，至少知道仲有網店有清貨。

小米 MIX Fold 2 硬件規格

規格方面，小米 MIX Fold 2 像三星 Galaxy Z Fold5 一樣，都是手機平板二用的摺芒機，外屏係 21:9 比例嘅 6.56 吋芒，而內屏則係 8.02 吋嘅 AMOLED 芒，其中嘅最大賣點係手機好薄，展開只有 5.4mm，摺埋都只係 11.2mm，即使同最新嘅三星 Galaxy Z Fold5 摺機相比，都依然係好薄。而規格上佢係採用咗 Qualcomm Snapdragon 8+ Gen 1 處理器，內置最高 12GB + 1TB 版本，電池容量為 4500mAh。相機方面有 LEICA 認證鏡頭，分別為 5000 萬像素 IMX766 主鏡、1200 萬像素 IMX663 長焦 / 微距鏡以及 1300 萬像素超廣角鏡，前置鏡頭則為 2000 萬像素。