$600 有找 6.71 吋大芒 + 五千大電！小米紅米 A3 香港開賣

左定坤 (Cho Ting Kwan) 2024-03-18 19:26 | 小米

以前講到千幾蚊嘅手機，雖然平，但唔係咁容易用得落手，然而今時今日，即使係一部千幾蚊嘅手機，其實一般使用都唔會太差，得益於處理器、RAM、ROM 等方面嘅提升。咁一部幾百蚊嘅手機，又可唔可以做到「夠用」呢？小米香港推出咗一部賣價只需 $600 有唔使嘅紅米 A3，唔單止有 6.71 吋大芒，而且仲有 5000mAh 大電，而且個樣望落去幾靚仔，唔似一部幾百蚊嘅手機。想知詳情，睇下文啦！

紅米 A3 平價抵港 $600 有找

小米喺香港推出咗一部超平價嘅入門手機：紅米 A3，即日起在香港有售，建議零售價為 $599。一部 $600 唔使嘅手機，可以有乜特別賣點呢？除咗講樣之外，5000mAh 大電應該都會係佢嘅賣點之一，但只支持 10W 充電速度。紅米 A3 採用咗 6.71 吋高清大屏幕，解像度為 1600 x 720，配備 MTK Helio G36 處理器，內置 3GB RAM 以及 64GB ROM。

另外，紅米 A3 用上咗 800 萬像素嘅主鏡頭以及 500 萬像素嘅前置鏡頭，並支持 AI 臉部解鎖以及指紋解鎖，同時支持 4G + 4G 雙卡雙待。顏色方面，紅米 A3 有午夜黑、星空藍以及森林綠三種顏色選擇。