Redmi Note 15 Pro+ 開箱！手感真係唔錯
今次 Redmi Note 15 Pro+ 嘅包裝設計幾搶眼，大大隻紅色字寫住型號同主要賣點，一眼就知部機有咩勁。打開盒，除咗手機本體，小米都好有誠意咁跟足 100W 快充火牛同充電線，唔使另外買，呢點已經係加分位！
▲ 包裝盒好搶眼，重點功能一目了然。
▲ 跟機附送 100W 快充火牛，夠晒良心。
上手第一感覺，係部機嘅手感比上代更圓潤。今次 Pro+ 版用上 6.83 吋四曲面螢幕，邊框做得極窄，視覺衝擊力好強。曲面設計令握感更貼手，就算機身唔算細，拎喺手都唔覺得「掗拃」，長時間打機或者睇片，手掌虎口位都冇咁易攰。而且螢幕已經預貼好保護貼，又慳番一筆。
▲ 四曲面螢幕加極窄邊框，睇片、打機視覺效果一流。
▲ 我手上嘅「摩卡棕」係素皮版本，冬天摸落去暖笠笠，又唔會沾指紋，正！
機背方面，我手上呢部係「摩卡棕」素皮版本。對我呢啲手汗多嘅人嚟講，素皮真係救星！唔單止防滑，拎上手有一種高級嘅溫潤感，同玻璃機背係兩種風格。鏡頭模組沿用置中對稱設計，凸起程度難免，但階梯式處理望落都算順眼。
最大賣點：IP68 防水防塵 + 超耐摔！粗用首選？
講到今代最大升級，一定係 耐用性。Redmi Note 15 Pro+ 不單止有 IP68 防水防塵，可以應付日常淋雨甚至意外跌落水（當然唔好特登試啦），更重要係佢聲稱好「捱得摔」！官方話用咗高強度玻纖背板、康寧 Gorilla Victus 2 玻璃，同內部多重緩震結構。簡單講，就係意外跌親部機，屏幕同主板冇咁易「內傷」。對於版主我呢啲成日「手滑」嘅人，或者係需要喺戶外、工地環境工作嘅用家，呢個設計真係好實際。
另一個超實用功能係 AI 濕手觸控 2.0。試過洗完手未抹乾，或者煮飯時手油油，直接掂個芒都操作到，解鎖、掃頁面都好靈敏。對於成日要喺戶外奔波，或者好似我咁鍾意邊沖涼邊聽歌嘅人，真係方便好多！
▲ 螢幕有水珠、灑水都無問題。
1.5K 曲面螢幕 + 立體聲雙喇叭
螢幕質素方面，呢塊 6.83 吋 1.5K AMOLED 芒，亮度夠高，戶外睇一樣清晰。而且有 3840Hz 高頻 PWM 調光，夜晚熄燈後睇手機，對眼睛刺激細好多，護眼效果唔錯。
▲ 設定入面可以自訂更新率，不過用預設「自適應」就已經好流暢。
音效方面，佢用上真正對稱式立體聲雙揚聲器（唔係用聽筒扮嗰隻），聲量夠大，低音幾有力。試過喺廚房開住水喉聽歌，啲聲都依然夠晒響。呢個配置睇戲、打機嘅臨場感，喺同價位手機中算係交足功課。
▲ 機頂同機底都有獨立喇叭，形成對稱聲場。
性能續航：7s Gen 4 夠用有餘，6500mAh 電量誇張！
性能方面，Redmi Note 15 Pro+ 用上 Snapdragon 7s Gen 4 處理器，我手上係 12GB+512GB 版本。日常用嚟上網、睇片、玩下《Pokémon GO》或者《原神》（中畫質）都好流暢，而且散熱做得幾好，長時間打機都冇燙手感。跑分呢啲例行公事都做下，大家參考下就好：
▲ 安兔兔跑分約 79 萬，屬中階水準。
▲ Geekbench 成績。
不過，部機最誇張係佢個 6500mAh 超大電池！版主試過一日內重度使用，包括影相、導航、睇 YouTube、間中打機，到夜晚返到屋企都仲有電，「一日一充」對佢嚟講毫無壓力，電量焦慮？唔存在！配合 100W 快充，差一陣就夠用大半日，仲支援反向充電，可以當流動電源救急。
▲ PCMark 成績。
2 億像素主鏡頭實拍：成像紮實，2x / 4x 裁切好用！
相機係另一大亮點。主鏡頭用上同 Xiaomi 17 Ultra 長焦鏡頭同款嘅 2 億像素 HP2 感光元件，支援 OIS 光學防震。日拍成像細節豐富，色彩還原討好。最好玩係佢支援 2 倍同 4 倍無損變焦（in-sensor zoom），等於多咗兩個實用焦距。實測發現，2 倍變焦畫質好紮實，用嚟影人像或者食物特寫好方便；4 倍變焦雖然有少少演算法修飾，但分享上社交媒體絕對夠用。人像模式虛化效果自然，膚色都算靚。至於 800 萬像素超廣角鏡頭，用嚟影風景或者大合照都夠用。
前置鏡頭升級到 3200 萬像素，自拍清晰，美顏效果自然，仲可以玩 0.8x 廣角自拍，一班 friend 自拍都唔怕唔夠位。
▲拍照介面就會顯示 1x、2x、4x 變焦，最遠到 30x。
▲1x 拍攝，等效焦距約 23mm。
▲2x 拍攝，等效焦距約 46mm。
▲4x 拍攝，等效焦距約 92mm。
主鏡頭實拍：
小結：實用主義至上！耐用、長氣、影相掂
總括嚟講，Redmi Note 15 Pro+ 唔係一部追求極致性能嘅手機，而係一部將 「實用」做到極致 嘅全能機。IP68 防水防塵同強化機身結構，令你可以更安心咁帶住佢去任何地方；6500mAh 怪獸級電池徹底解決電量問題；2 億像素主鏡嘅成像質素同多焦段玩法，絕對超出對呢個價位嘅期望。如果你係追求性價比、需要一部「唔使就住用」、可以陪你上山下海嘅耐用手機，又或者係從舊款手機升級，想要全方位均衡體驗，Redmi Note 15 Pro+ 絕對係目前中階市場一個極之吸引嘅選擇。網友又覺得，IP68 防水係咪你買機嘅必須條件呢？