不嬲小米嘅 T 系列都係主打高性價比，喺親民嘅價位提供接近旗艦級嘅效能同影像體驗。今次實測嘅 Xiaomi 17T Pro，唔單止換咗 MediaTek 最新一代 3nm Dimensity 9500 處理器，最受注目嘅升級肯定係加入咗五倍嘅 Leica 潛望式長焦鏡頭，仲要喺保持 8.25 毫米厚度嘅情況下，塞入咗 7000mAh 大容量矽碳電池，喺效能、影相表現同續航力方面都有升級。跟住落嚟就同我哋一齊實測啦！
機身設計與握持感
一上手 Xiaomi 17T Pro，最先留意到嘅係佢喺機身重量分佈同大電量之間攞到個好平衡。雖然配備咗 7000mAh 嘅超大電池，但機身重量控制喺 219 克，厚度大約 8.25mm。機身中框用咗高強度鋁合金材質，邊緣仲做咗好幼細嘅微弧切角，呢個微小嘅弧度令到手指揸住嗰陣有唔錯嘅過渡感，整體手感好好。
外觀視覺上，我哋影嘅深紫色版本喺光線照射下會反射出細緻嘅金屬光澤，機身中框嘅磨砂工藝處理都提升咗整體視覺嘅精緻度。後置相機模組嘅體積同高度比上一代收斂咗，唔會顯得太過突兀，平放喺枱面嗰陣嘅傾斜角度都改善咗。而且機背用咗磨砂處理，唔容易印指紋，對外觀有潔癖嘅用家會更容易keep住部手機乾淨。
▲機身設計簡約，除咗我哋影嘅深紫色之外，仲有深藍色同黑色兩個版本。
▲底部有 SIM 卡槽、USB-C 同喇叭，都支援 eSIM。
▲側邊有音量鍵同 Gemini 快捷鍵。
1.5K 144Hz 護眼屏幕
Xiaomi 17T Pro 用咗 6.83 吋 1.5K（2772 x 1280） AMOLED 屏幕，最高支援 144Hz 更新率。日常用嗰陣，680 億色嘅顯示規格加埋 DCI-P3 廣色域，令到色彩呈現夠飽滿又唔會過度飽和。而且因為支援 1.5K 解像度，文字邊緣同圖像細節嘅銳利度都非常足夠。加上有自適應更新率，喺畫質同耗電之間攞到個唔錯嘅平衡。
▲ 屏幕出廠嗰陣已經貼咗保護貼，平面屏幕設計要搵啱用嘅保護貼都比較容易。
屏幕有高達 3500 尼特嘅峰值亮度，喺正午烈日直射下影相或者睇 message，屏幕內容都一樣睇得好清楚，對比度都 keep 得幾好。而喺暗光環境下，屏幕支援最低 1 尼特嘅極低亮度，對習慣喺臨瞓前玩手機嘅用家嚟講真係一大福音。
▲ 高亮度屏幕就算喺戶外大太陽下影相，屏幕都可以睇得清清楚楚。
小米今次特別強調嘅「Xiaomi Vision Care」護眼方案，融合咗醫療同精密工程技術，仲過咗德國萊因嘅四重護眼認證（包括智慧護眼、低藍光硬體解決方案、無頻閃同節律友好認證。喺實際長時間睇電子書嘅測試入面，佢嘅 DC 調光同藍光過濾機制喺視覺上確係可以帶嚟比較溫和、唔易眼酸嘅直觀體驗。當然護眼技術只係輔助，為咗眼睛健康，我哋都係建議避免長時間喺無光源嘅黑暗環境入面望住屏幕。
Leica 五倍潛望長焦實測
相機係今年 Xiaomi 17T Pro 嘅升級重點，採用嘅超廣角、長焦三鏡頭系統入面，最令人關注嘅係等效焦距 115mm 嘅 5000 萬像素 Leica 五倍潛望式長焦鏡頭。喺光線充足嘅日間環境下，呢粒長焦鏡頭展現咗光學變焦應有嘅硬實力。相對於同價位機種常見嘅主鏡頭數碼裁切方案，17T Pro 喺五倍、甚至透過 AI 演算推進到十倍變焦嗰陣，畫面嘅細節紋理、建築物邊緣嘅線條依然相當清晰，幾乎冇出現數碼過度銳化嘅邊緣白邊，色彩表現都忠實還原咗 Leica 經典嘅過渡。
▲ Xiaomi 17T Pro 用超廣角、廣角、長焦三鏡頭，滿足唔同情境嘅拍攝需求。
▲ 拍攝介面可以快速切換 0.6x、1x、2x、5x、10x 變焦，無論用邊粒鏡頭影，色調表現都非常相近。
長焦鏡頭實拍
主鏡頭部分係 5000 萬像素，用咗 Light Hunter 950 感光元件（1/1.31 吋、f/1.67 光圈），日拍表現就唔使多講喇，對焦速度快，畫面色調同整體表現都非常出色。喺高反差場景入面，主鏡頭對路燈同招牌霓虹燈嘅眩光抑制表現優異，暗部嘅雜訊處理都相當乾淨，可以呈現出色彩飽和而且層次分明嘅夜景相。另外仲有一粒 1200 萬像素超廣角鏡頭，可以用嚟捕捉大景，或者將細空間影得更闊落嘅感覺。
主鏡頭實拍
喺相片編修功能入面提供多種 AI 執相方式，譬如話影完相之後覺得構圖有啲窄，可以透過 AI 擴圖功能嚟令張相嘅範圍變大啲，生成嘅內容會自動根據畫面情境補上，做得都幾自然。
魔法消除入面嘅去人功能都做得越嚟越好，可以準確咁認出路人，生成嘅內容都好自然。
另外仲有 Live Leica Moment 功能，影相嗰陣只要開著動態照片模式，影完之後就可以將張相變成 GIF 或者影片檔 save 低，特別適合用嚟紀錄寵物可愛嘅一刻，或者生活特別嘅時刻。Leica Live Moment 支援後置鏡頭嘅所有焦段（包括今次主打嘅潛望長焦），而且每張動態相片都可以保留經典嘅 Leica 水印。
影完相之後喺相簿度撳編輯，可以選擇倒放或者來回效果，另外可以選擇 export 做 GIF 或者影片。
▲好似咁樣，可以整成得意嘅 GIF 圖！
系統仲內置咗拼圖模組，可以快速組合成動態拼圖 share 去社交平台，而且一樣可以選擇 output 做 GIF 或影片檔。
▲揀幾張相、影片或者動態照片之後，根據唔同 file format 可以整成拼圖或影片。
天璣 9500 處理器，旗艦級效能表現
喺硬件效能方面，Xiaomi 17T Pro 用咗 MediaTek 最新一代嘅 3nm 製程 Dimensity 9500 處理器，全大核嘅 CPU 架構配埋 LPDDR5X 同 UFS 4.1 儲存組合，喺跑分軟件入面確係跑出咗旗艦級嘅數據水準。日常用嗰陣，無論係做多工處理、開好多網頁、高畫質影音串流定係打機，操作反應都非常快，一啲遲鈍感都冇。
▲Geekbench 測試 CPU 單核分數係 3018、多核分數係 9533，GPU OpenCL 測試係 22,990，表現非常出色。
Xiaomi 17T Pro 內置 IceLoop 散熱系統，就算長時間打機、喺戶外影相拍片，手機溫度都唔會升得太多，最多都係有啲微溫，但溫度上升嘅感覺相對平緩，冇去到辣手嘅程度。
續航力係 Xiaomi 17T Pro 另一個大賣點，多得矽碳負極材料技術嘅進步，內置嘅 7000mAh 高密度電池喺實際續航測試入面表現出色。透過 PCMark 工作 3.0 實測，電池續航力由 100% 跌到 20% 要 23 個鐘 5 分鐘，對於中度使用嘅返工返學一族嚟講，Xiaomi 17T Pro 要頂到差唔多兩日嘅使用時間，喺唔開慳電模式嘅情況下係完全冇問題嘅。
充電方面，Xiaomi 17T Pro 支援 100W 有線 HyperCharge 同 50W 無線 HyperCharge，跟機會包埋充電器。而且 Xiaomi 17T Pro 支援 100W 嘅 PPS 充電協議，即係話出街就算唔帶小米專屬嘅私有協議充電器，用市面上支援高功率 PD/PPS 規範嘅第三方火牛，一樣可以有幾快嘅充電速度。對於要出差、去旅行或者多部機共用充電器嘅情況下，充電兼容性都係好重要嘅。
小結
用咗一段時間之後，Xiaomi 17T Pro 嘅整體表現幾令人滿意，佢唔係一味咁追求樣樣都有嘅全能旗艦規格，而係將硬件配置啱啱好設計喺特定實用需求上面。整體嚟講，Xiaomi 17T Pro 提供咗一個特色鮮明嘅選擇。對於睇重長效電力、鍾意光學長焦構圖，而且喺預算上追求務實回報嘅用家嚟講，Xiaomi 17T Pro 絕對係一個好值得考慮嘅選擇。