香港定價方面，vivo X300 Ultra 提供 16GB RAM + 512GB ROM 及 16GB RAM + 1TB ROM 兩個版本，售價分別為 HK$12,999 及 HK$13,999。512GB 版本提供草原綠、雪峰白、火山黑三色，1TB 版本則有草原綠及火山黑。價錢去到萬三級別，當然唔算親民，但如果你係為影相同拍片而買手機，今次 X300 Ultra 的硬件規格的確係擺明衝住高階攝影玩家而來。
這篇文章入面，版主就會同大家做個上手評測，讓大家看看這部手機是否有吸引力。
機身設計有相機味，鏡頭模組存在感好強
vivo X300 Ultra 第一眼望落，最搶眼一定係機背的大圓形鏡頭模組。今代設計繼續有濃厚相機味，金屬鏡頭環加上機背拼色處理，成部機好明顯唔係走輕薄低調路線，而係想話畀你聽：影相先係主菜。草原綠同火山黑相對沉實，雪峰白就比較有辨識度。實際手感方面，鏡頭模組突出係預咗的事，就算加上保護殼，放在枱面都未必可以完全平放。不過買得 Ultra 影像旗艦，相信大家都明白，機身厚薄同重量好多時都要讓位畀鏡頭、感光元件同防震結構。
6.82 吋 2K 螢幕，睇相剪片都夠晒用
X300 Ultra 正面配備 6.82 吋 2K ZEISS Master Color Display，解像度為 3168 × 1440，支援 1 至 144Hz 自適應刷新率、100% P3 色域、10.7 億色顯示，以及局部峰值亮度 4500nits。規格上已經係現時 Android 旗艦第一梯隊。日常睇相、剪片、睇 HDR 影片，呢塊 AMOLED 螢幕的亮度、細緻度同色彩表現都相當討好。144Hz 刷新率就要留意，唔係所有 App 都會長開，主要係支援的遊戲或者特定場景先會用到。不過即使當一般旗艦 120Hz 螢幕咁用，流暢度同觀感都已經好足夠。
雙 2 億像素 ZEISS 相機，焦段選擇好有性格
相機先係 vivo X300 Ultra 最大賣點。今次三鏡全線 ZEISS 認證、全線大底、全線 OIS，包括 14mm 超廣角、35mm 主鏡，以及 85mm 長焦鏡。其中 35mm 主鏡用上 Sony LYTIA 901，達 2 億像素、1/1.12 吋感光元件；85mm 長焦同樣係 2 億像素，採用 HP0 Ultra-Sensing Sensor，感光元件尺寸為 1/1.4 吋。最特別係，vivo 今次主鏡選擇 35mm，而唔係一般手機常見的 23mm 或 24mm。35mm 視角影街拍、人像、日常生活會更有相機感，畫面壓縮感自然啲，亦冇咁容易影到太多雜亂背景。缺點係如果你習慣手機一拎起就乜都影晒入畫，初初可能要適應一下；但對鍾意攝影的人來講，35mm 其實好有味道。
不同焦段測試：
更多照片：
85mm 長焦係靈魂，唔係陪跑鏡
好多手機都有長焦鏡，但質素經常同主鏡有明顯差距。X300 Ultra 的 85mm 長焦就唔係普通陪跑鏡，2 億像素加 1/1.4 吋大底，再配合 Gimbal-Grade APO Telephoto、3° OIS 防震同 60fps AF Tracking，規格上相當誇張。實際使用方向上，85mm 最適合影人像、寵物、舞台、街拍細節。高像素帶來的好處，唔係單純數字好睇，而係裁切空間更大，影完之後再重新構圖都仍然有足夠細節。人像方面，85mm 焦段本身已經比一般廣角主鏡自然，面形變形少，背景壓縮感亦更似相機。
外接增距鏡玩法，令 Ultra 更似一套攝影系統
X300 Ultra 另一個有趣位係支援 ZEISS 外接增距鏡，包括 200mm 及 400mm 等效焦距玩法。400mm Equivalent Telephoto Extender Gen 2 Ultra 採用 4.7x 放大，重量約 248g；200mm 版本則為 2.35x 放大，重量約 153g。呢類配件唔係人人都會日日袋住出街，但對鍾意影演唱會、運動、雀鳥、遠景的用家，實用性比想像中高。當然，加咗外接鏡之後，部手機已經唔再似普通手機，而係更接近一套輕量攝影系統。你要方便，它未必最方便；但你要玩味同遠攝能力，X300 Ultra 的確比一般旗艦行得更前。
影片規格同樣進取，全焦段 4K 120fps 好吸引
X300 Ultra 唔止影相強，拍片規格都相當進取。官方列明支援 Multi-Focal 4K 120fps 10-bit Log Video、4:2:2、APV Codec、ACES Integration、3D LUT Monitoring，同時支援 Multi-Focal 4K 120fps Dolby Vision Video 及 4K 120fps 慢動作。最值得留意係「Multi-Focal」呢點，因為好多手機雖然話支援高規格拍片，但通常只限主鏡，超廣角同長焦就會降級。X300 Ultra 明顯想將三個焦段都變成可用的創作工具，對拍 Vlog、活動、旅遊紀錄或者短片創作的人來講，彈性會高好多。
收音方面，手機設有四咪高保真立體聲收音，並支援不同錄音場景，亦可以配合 Bluetooth TWS 耳機或無線咪使用。對真正拍片的人來講，收音其實同畫質一樣重要，vivo 今次有照顧到呢部分，值得一讚。
Snapdragon 8 Elite Gen 5 加 6600mAh，旗艦硬件齊晒
性能方面，vivo X300 Ultra 採用 Snapdragon 8 Elite Gen 5，配合最高 16GB RAM 及 1TB 儲存空間。官方資料顯示，處理器採用 3nm 製程，最高時脈達 4.6GHz。無論日常使用、影相後處理、4K 影片拍攝，甚至高畫質遊戲，硬件規格都係現時 Android 旗艦級別。電池容量為 6600mAh，支援 100W 有線 FlashCharge 及 40W 無線 FlashCharge。以 6.82 吋 2K 螢幕、雙 2 億像素相機同高階處理器來講，6600mAh 電池算係相當有安全感。重度拍攝一日仍然會食電，但至少唔係得個相機規格勁，續航完全跟唔上。
IP68 / IP69 防水防塵，USB 3.2 傳輸都有
作為 Ultra 旗艦，X300 Ultra 亦支援 IP68 及 IP69 防塵防水。不過官方都有講明，手機唔係專業防水設備，日常使用都唔建議刻意浸水，尤其係海水、飲品、熱水呢類環境更加要避免。另外，手機支援 USB 3.2，官方標示最高可達 10Gbps 傳輸速度。對經常拍 4K 影片、Log 片或者大量相片的用家，快傳輸其實好重要，因為 Ultra 手機影像檔案可以好大，USB 規格唔夠快會好痛苦。
總結：唔係人人需要，但相機玩家會好心動
vivo X300 Ultra 國際版唔係一部人人都需要的手機。它機身大、鏡頭突出、價錢高，配件玩法亦比一般手機複雜。但如果你本身就係鍾意影相、拍片，會在意焦段、色彩、長焦、人像、Log 影片同後期空間，X300 Ultra 的吸引力就好明顯。HK$12,999 起的售價，已經唔可以用普通旗艦手機標準去睇。它更似一套以手機為核心的 ZEISS 影像系統：35mm 主鏡有性格，85mm 長焦有實力，外接增距鏡有玩味，影片規格亦夠專業。對一般用家來講，它可能太誇張；但對手機攝影玩家來講，X300 Ultra 國際版今次終於來港，絕對係 2026 年最值得留意的 Android 影像旗艦之一。