OPPO、OnePlus 被傳敗走歐洲市場?真相大揭!受影響只有呢個地方

左定坤 (Cho Ting Kwan) 2023-03-28 17:42 | Oneplus
2015 年 9 月,版主我初入行加入 ePrice,嗰陣我算係實習生,當時版主 Keith 第一部畀我試,然後叫我寫文嘅手機,係 OPPO N3,我到而家仲好有印象,最大賣點係佢可以 206 度自動旋轉嘅鏡頭,變相影景自拍都用同一個相機,令自拍質素表現更好。而呢部手機實情係 2014 年發表嘅,諗返起當年嘅手機都算幾創新,唔似而家咁千篇一律。佢仲有個「兄弟」叫 OnePlus,同樣步步高集團旗下中國手機品牌,除咗喺中國市場好勁,而且都仲有打入歐洲市場。不過,最近有傳 OPPO 同 OnePlus 會退出歐洲市場,到底中間係咪有乜誤會?睇下文啦!

FB.jpg

最近有外媒報導指出,OPPO 同埋 OnePlus 可能會喺歐盟嘅主要市場撤離,當中包括英國同埋德國,而有位爆料人 Max Jambor 嘅 Twitter 都表明,法國同荷蘭都可能受影響。甚至見到有啲媒體講到,OPPO 同 OnePlus 退出歐洲市場!講到好似好大件事,但實情原來並唔係退出成個歐洲市場,主要受影響嘅範圍只係喺德國。

事實上過去 6 個月入面,OPPO 同 OnePlus 喺德國都面臨住好重大嘅挑戰,主要係因為 Nokia,呢度講嘅 Nokia,並唔係 HMD Global,而係講緊網絡服務供應商,喺上年即係 2022 年嘅 8 月,Nokia 就提出咗專利訴訟,表示 OnePlus 同埋 OPPO 都喺佢哋嘅手機度,用咗佢哋品牌嘅 5G 技術,但就未有支付專利使用費,而因為德國法院都支持 Nokia,禁止咗 OPPO 同埋 OnePlus 喺德國賣手機,所以呢兩個品牌想唔退出德國市場都唔得!

如果你上去 OnePlus 德國官網度睇,你會見到佢哋公司最新推出嘅產品,有 Buds Pro 2,有 OnePlus Pad,但就無手機。

而喺一份提供畀 Android Central 嘅聲明入面,OPPO 同 OnePlus 都已經確認咗,佢哋兩間公司將會繼續服務現有歐洲市場,並會喺未來幾個月推出新產品!不過,就算 OPPO 同 OnePlus 無畀德國禁止出售手機,佢哋又喺歐洲市場銷售,又係唔係真係賺到錢呢?

來源:Android Central

最新新聞