最近有外媒報導指出，OPPO 同埋 OnePlus 可能會喺歐盟嘅主要市場撤離，當中包括英國同埋德國，而有位爆料人 Max Jambor 嘅 Twitter 都表明，法國同荷蘭都可能受影響。甚至見到有啲媒體講到，OPPO 同 OnePlus 退出歐洲市場！講到好似好大件事，但實情原來並唔係退出成個歐洲市場，主要受影響嘅範圍只係喺德國。
事實上過去 6 個月入面，OPPO 同 OnePlus 喺德國都面臨住好重大嘅挑戰，主要係因為 Nokia，呢度講嘅 Nokia，並唔係 HMD Global，而係講緊網絡服務供應商，喺上年即係 2022 年嘅 8 月，Nokia 就提出咗專利訴訟，表示 OnePlus 同埋 OPPO 都喺佢哋嘅手機度，用咗佢哋品牌嘅 5G 技術，但就未有支付專利使用費，而因為德國法院都支持 Nokia，禁止咗 OPPO 同埋 OnePlus 喺德國賣手機，所以呢兩個品牌想唔退出德國市場都唔得！
如果你上去 OnePlus 德國官網度睇，你會見到佢哋公司最新推出嘅產品，有 Buds Pro 2，有 OnePlus Pad，但就無手機。
而喺一份提供畀 Android Central 嘅聲明入面，OPPO 同 OnePlus 都已經確認咗，佢哋兩間公司將會繼續服務現有歐洲市場，並會喺未來幾個月推出新產品！不過，就算 OPPO 同 OnePlus 無畀德國禁止出售手機，佢哋又喺歐洲市場銷售，又係唔係真係賺到錢呢？
來源：Android Central