OnePlus 12 香港一月賣！國際版賣價比大陸版貴 原因係咁
左定坤 (Cho Ting Kwan)
2023-12-19 20:31
|
Oneplus
講到 OnePlus 呢個品牌，當 Oppo 接手後，直以嚟 OnePlus 都係主打外國市場，雖然香港都有一啲 Fans，但相對其他步步高系列品牌，都仍然係偏向小眾。本身有部份嘅 OnePlus 手機，喺豐澤網店可以買得到，但最近有消息指出，OnePlus 嘅大佬 OPPO，會自己接返 OnePlus 嚟做，喺香港賣機，而最新推出嘅 OnePlus 12，將會喺一月賣街。香港大約賣呢個價，比大陸版價錢高，點解會咁，睇下文啦！
版主收風 OnePlus 12 香港一月賣
根據版主收風，OnePlus 12 一月會喺香港開賣，會賣 16GB RAM + 512GB ROM 版本 (無 24GB RAM)，建議零售價會大約係六千中，之前豐澤有得賣，係因為有香港公司做代理，但 2024 年開始，會變返由 OPPO 自己接嚟做，喺香港賣 OnePlus 手機。不過，記得好多年前點解我會咁鍾意 OnePlus 手機，主要係因為以前佢哋係用仿 Pure Android 嘅系統，但而家嘅 OnePlus，已唔同曬，到底最終我會唔會可以重新有當初「愛的衝動」，真係要有機會再試過先知。
點解國際版會比大陸版貴？原因居然係咁......
你可能會問，點解 OnePlus 12 國際版，會比起大陸版貴咗唔少？我就問過業界人士，佢就表示聽聞 OnePlus 大陸版裝唔到 Google，就算裝到，都好似唔畀開超過 5 個 App，所以香港賣嘅國際版，會比起大陸版貴咁多。淨係呢個理由，都值得畀貴啲價錢，去入手國際版 － 當然，品牌選擇咁多，要揀都仲有好多選擇，除非你係真 Fans。另外，因為而家 OPPO 會接返嚟賣 OnePlus 手機，所以亦都意味住，2024 年 OnePlus 會喺香港有更多型號推出。呢個消息，對於網友嚟講又係唔係好消息呢？
