旗艦級設計，最薄機身配強勢散熱
今次 Phone (4a) 系列分咗標準版同 Pro 版兩款。先講高階啲嘅 Phone (4a) Pro，佢採用咗精密工藝打造嘅金屬一體成型機身，厚度壓縮到得 7.95mm，係 Nothing 有史以來最薄嘅手機。雖然薄咗，但散熱無妥協，配備咗 5300mm² VC 均溫板散熱系統，仲具備 IP65 防塵防水等級。顏色方面，Pro 版除咗經典嘅銀色同黑色，仲加入咗好有突破性嘅金屬粉色。至於標準版 Phone (4a)，透明設計就強調功能性，上半部凸顯鏡頭同全新嘅 Glyph Bar，下半部就展示內部結構。機身具備 IP64 防護等級，顏色選擇更加豐富，有黑、白、透視藍同柔和粉四款。
中階機罕見：高達 140 倍變焦嘅潛望長焦相機
講到今代最大嘅升級，一定係相機！Phone (4a) Pro 竟然喺中階機價位，塞入咗 Sony LYT700c 大尺寸 OIS 主鏡頭，同埋 5000 萬像素 3.5 倍 OIS 潛望式長焦鏡頭。官方話佢可以提供高達 140 倍嘅變焦能力，係 Nothing 有史以來最遠，亦係同級產品中最強。而標準版 Phone (4a) 嘅相機組合亦都好豪華，同樣配備 5000 萬像素 3.5 倍 OIS 潛望式鏡頭同 5000 萬像素 OIS 主鏡頭。兩部機都由 TrueLens Engine 4 驅動，支援 Ultra XDR 照片，Pro 版更支援 4K Ultra XDR 錄影，呈現類似 Dolby Vision 嘅 HDR 效果。相機仲加入咗 AI 照片橡皮擦同動態照片 (Motion Photos) 等實用功能。Glyph 燈效再進化，更光更細緻
Nothing 手機嘅靈魂——Glyph Interface 當然都有升級。Phone (4a) 引入咗改良版 Glyph Bar，亮度比上代提升咗 40% 達到 3500 nits，並且可以作為拍照或錄影時嘅柔和補光燈。而 Phone (4a) Pro 就更加誇張，搭載由 137 顆 mini-LED 組成嘅旗艦級 Glyph Matrix，覆蓋面積增加咗 57%，亮度達 3000 nits。就算無實體 Glyph Button，廣受歡迎嘅 Glyph Toys（例如計時器、電池顯示）都全面支援，並整合到 AOD 隨顯螢幕入面。1.5K 靚芒配 Snapdragon 7 系列處理器
屏幕方面，Phone (4a) Pro 配備 6.83 吋 AMOLED 屏幕，支援 1.5K 解析度同 144Hz 更新率，峰值亮度更高達 Nothing 史上最亮嘅 5000 nits。標準版則配備 6.78 吋 AMOLED 螢幕，同樣有 1.5K 解析度，支援 120Hz 更新率同 4500 nits 峰值亮度。兩款機都用上康寧 Gorilla Glass 7i 防護玻璃。處理器方面，Pro 版由 Snapdragon 7 Gen 4 驅動，AI 能力大幅增強；標準版就用上 Snapdragon 7s Gen 4，提供顯著更快嘅資料速度。兩款機都內置 5080 mAh 電池，支援 50W 快充，30 分鐘就可以充至 60%。系統預載基於 Android 16 嘅 Nothing OS 4.1，介面更乾淨直覺，並加入咗 Essential Search 等實用 AI 工具。官方仲承諾提供 3 年 Android 系統更新與 6 年安全性修補程式。香港賣價與開賣詳情
睇完規格，大家最關心一定係價錢！提供黑、白、粉紅、藍四色選擇嘅 Nothing Phone (4a)，建議零售價為 HK$3,699，將於 3 月 21 日起發售。至於提供黑、銀、粉紅三色嘅 Nothing Phone (4a) Pro，建議零售價為 HK$4,499，將於 3 月 28 日起發售。兩款手機都可以喺連卡佛、1O1O、csl、豐澤等指定零售商買到。用三、四千蚊就玩到潛望式長焦加旗艦級外觀設計，大家覺得今次 Nothing Phone (4a) 系列夠唔夠吸引呢？