2019 年區議會選擇，你要做嘅六件事
001: 上網查資料
相信各位選民應該收到政府寄畀大家嘅選舉通知書，裡面應該有齊你可以揀嘅候選人資料，仲有你要去嘅投票站位置。如果你乜都收唔到，或者你唔見咗，唔緊要，去呢個網站揾資料就得。
▲ 呢個網站就係: https://www2.voterinfo.gov.hk/bd_reovi/OVIES/jsp/mob/ 。按入揀個人選民。
▲ 攞出你嘅身份證，係表格上寫入中文及英文名，仲有身份證號碼。有一個叫中文姓名電碼，你張身份證，如果你個名係三個字，就會有三組有四個數子嘅組合，就係中文姓名電碼啦！ 最後跟住指示，輸入認證碼。
▲ 系統會叫你揀申報時嘅住址。佢用 Multiple Choice 要你揀，即係只有一個係啱嘅答案。
▲ 資料 OK 後，就會見到你是那一區嘅選民，投票站地址，仲可以 call 地圖出來，幫你 locate 投票站位置。
002: 帶人帶身份證正本
去投票，要帶乜? 你本人，仲有你張身份證。網傳帶身份證副本都得，其實係錯，一早已取消咗。所以要記著: 一定要帶身份證正本，一定要帶身份證正本，一定要帶身份證正本，好重要，要講三次。咁張選舉通知書，又駛唔駛架? 有就最好，無都 OK。
003: 一早去投票?
官方投票時間係，上午 7:30 至晚上 10:30，共十五小時。有網上留言話，越早去越好，因為怕政局混亂，隨時關門，無得投。呢個想法，版主唔 Comment。我講 Fact，其實根據選舉委員會嘅說明:
- 11 月 24 日(星期日) 的投票時間為上午 7 : 30 至晚上 10 : 30，總投票時數為 15 小時。
- 如當日有投票站因突發事件無法運作，而投票可於 1.5 小時內恢復，投票站嘅開放時間會於同一日作相應延長，即係唔會晚上 10:30 收工，之前關閉幾耐，佢開番幾耐，但唔會多過 1:30 小時，即係點都會唔會遲過半夜十二點關門 。
- 如果投票站未能於 1.5 小時內恢復運作，有關投票站嘅投票會押後至 12 月 1 日 (星期日)。而係後備投票日，投票站開放時間以宣布停止運作嘅時間起計，至晚上 10 時 30 分結束，投票時數維持 15 小時。
- 假設投票站係下午 2:30 關閉超過 1.5 小時，即到下午 4:00，該區投票會推遲至 12 月 1 日，但當日開放時間會由下午 4:00 開始，至晚上 10:00，總之總投票時間會一樣有 15 小時。
- 關閉投票站，係每一個投票站計算，只要投票開始咗，應唔會全港投票站，同時段一齊關閉。
004: 關手機關手機關手機
入去投票站之前，記得關手機，記得關手機，記得關手機，投票站裡面不可以響手機更加唔可以影相架。
005: 唔駛急慢慢揀
攞咗選票，你要進入無人睇到你嘅投票格投票。你要做嘅，就係喺你揀嘅心水候選人旁嘅方格，蓋上 V 字印。網傳呢個印嘅墨水，好易化，化左係張選票，就會失效。版主唔知係咪真，但你可以咁樣做 : 蓋印之後，等一等，等到墨水乾先攞返出去，對摺選票，再放入投票箱。
▲ 個 V 要蓋係候選人名字左面嘅圓圈裡面。選票亦不能有污穢。
其實，法例無規定投票格嘅使用時間，你係裡面想清想楚先去揀，等個選票印仔乾晒先去將選票掉入投票箱。
006: 保私隱，大家都係平民
認真嘅，投票係好個人嘅事，唔駛同人講你投乜人，亦唔駛著衫話畀人知你嘅政治取向。呢排黑白藍紅都可能代表某些政治取向，其實你著番平時嘅衫去投票咪得囉。
有人問你投乜人，輕鬆答佢: 「呢個係我嘅私隱，唔需要話你知」就得架啦！