版主中伏記!DBS 信用卡被盗用!原來不少人都出事!

左定坤 (Cho Ting Kwan) 2020-10-31 13:10 | 科技新知
有睇開 ePrice,又有睇開版主文章,都知我通常都係寫一些同優惠有關,或者同香港本地相關的資訊。而今次我要分享嘅,唔係同手機有關,但就同大家生活息息相關,就係我要記低一單中伏事件!無啦啦我張 DBS 信用卡被人盜用,而後來發現,原來有不少人都出事!

FB.jpg

是咁的,話說有一晚 (無記錯係上星期一),版主諗住叫 Food Panda 食,點知突然間同我講,話交易失敗之類,果刻覺得有少少奇怪,但又無諗到被盜用呢個問題,諗住可能只係我遲咗還卡數啦。說來慚愧,我又傻下傻下,明明見到 $7XXX 卡數,我都無唯意,諗住照找咗佢 (因為版主不時都有用信用卡買嘢,自己都無乜留意到,以為自己真係洗咗咁多錢)。無奈

直至去到星期三,版主收到兩個來自 DBS 保安中心嘅 Miss Call,開始諗緊,無啦啦 DBS 保安中心打畀我做乜呢?但因為 Miss 咗 call,我就等佢再打嚟先。夜晚沖沖下涼走去碌電話,突然心血來潮想 Check 下 DBS Omni,望下我到底洗咗乜錢,先發覺出現咗好多好多單嘅 $788 嘅洗費,而且全部都係「APPLE.COM/BILL ITUNES.COM」,下意識第一時間,喺度諗:死啦,會唔會係 Apple Pay 出事。

螢幕快照 2020-10-31 下午1.10.24.png

但後來身邊有唔少人提醒,應該唔關 Apple Pay 事,係信用卡公司即係 DBS 嘅問題,可能系統畀人 Hack 所以我啲卡資料被盜用?唔知,呢層可能真係要 DBS 自己先知。但我發覺原來都唔少 DBS 用家出事,似乎係大規模被盜用,都有網友反映佢都瀨嘢,令我意識到 I am not ALONE。

螢幕快照 2020-10-31 下午1.20.57.png

打返電話畀 DBS,原來保安中心指出發現我戶口有可疑交易,不斷碌同一個金額的消費,所以已經第一時間停咗我張卡,呢個正正就係點解我星期一當晚會叫唔到 Food Panda 嘅原因。

而去到今日,事件又進展成點呢?啱啱再打電話去了解過,因為我已經找咗筆數,但 DBS 保安中心仲未處理到果筆被盜用嘅款項,所以唔能夠將我找咗果筆錢退返畀我,表示預計 11 月 15 日左右,先會將筆錢入返落我信用卡,到時有個 BALANCE 之後,先再打返電話同佢哋講,退返張支票畀我咁話喎。

最後,問及其實佢哋有無得 Check 到係乜人盜用信用卡,佢哋表示保安中心都有調查緊,至於需唔需要報警,DBS 表示其實佢哋就唔建議報警,不過如果你覺得有需要都可以照報。唔知有無 ePrice 網友用緊 DBS 信用卡,都係苦主之一呢?


快啲將呢個消息 Share 畀身邊用緊 DBS 信用卡嘅朋友,提醒佢哋快啲 Check 下自己 DBS Omni,睇下有無出現唔屬於你嘅交易。
 

最新新聞