維基 HKTV 已 Out! 樂視 Letv 揸 Fit 人莫總: 我地要做 OTT 第一
|
數碼影音
豪言 001 : 我要做全港第一
樂視 Letv 係 1/6 係香港舉行大型發布會,高調地宣佈全面進軍香港劇集。小弟有幸跟樂視 Letv 香港區揸 Fit 人:樂視 Letv 亞太區總裁莫翠天對話,莫總明言:「目標係一年後成為第二大收費電視節目供應商。佢仲話要做香港第一 OTT 供應商。」莫總補充,睇唔到目前香港有咩具龐大實力既對手,認為達成目標的難度不大。睇黎莫總真係好有信心。
▲ LeTV 樂視其實已經開拍香港網絡劇,並以掹走天線做口號,連 TVB、ATV 都要挑埋機。
豪言 002 : 我地好香港化 跟維基各有各做
其實我係現場好懷疑,一個空降香港既過江龍,點樣迎合香港人口味,殺出血路呢?莫總神秘地笑左笑,跟著就話樂視 Letv 由登錄香港到今日,每個月都升級同修整產品平台既細節,務求全面香港化。佢仲話,聽到網民反映想睇香港人既電視劇,所以會投資製作香港劇集。我問:「認真同維基既 HKTV 打對台?」 莫總回應:「搞 OTT 電視需要大量經驗,樂視已經有十年經驗,非常了解用戶對 UI 操作和節目的需求。」至於會否跟維基 HKTV 合作?莫總回應:「暫時都係各自發展。」
▲ 樂視開劇比一班香港本地實力演員,係記者會力推邵音音與魯芬 BB !
豪言 003 :我地會投資六十億
目前樂視 Letv 兩成收入靠月費,其他靠廣告,對於未來香港樂視 Letv 發展計畫,莫總豪氣地話:「已經預算三年投資 60 億購買劇集和開拍本地劇等。」網友最關注當然係,究竟有幾多野可以睇?莫總懶神秘話:「呢層大可以放心,下半年會重槌出擊,包保大家有驚喜咁話 ,會比大家見到一個更完整既樂視生態 ! 」唔通係引入打通節目地區封鎖 ? 係就快 D 啦,不過相信都只能 FF ,不會成真。
▲ 發佈會後 Letv 立即攪左個論壇,連中大新聞系院長馮應謙 (左三) 都要講幾句:「宜家 D 人轉晒睇網絡片,越來越少人再坐定定係電視前面啦。」
豪言 004 :我地想跟亞視合作,但不看好傳統電視台市場
早前盛傳樂視會出手救亞洲電視,我當然要問清楚 Letv 會唔會阻止 ATV 完成歷史任務啦。結果莫總話:「樂視無打算投資亞視 ,現階段雙方正努力商議合作的可能性,方向會係亞視既資源如後期製作、甚至大氣電波用來推廣樂視內容!」 但莫總坦言,Letv 只是發展節目平台,採購和投資節目,並非要成為傳統電視台。佢亦不看好傳統市場,認為香港有一兩間電視台已經很足夠。
豪言 005 : 有需求,就買體育內容
每次提到樂視 Letv,網友一定問有無波睇先,咩波都好啦 ? 我帶住呢條問題問莫總,希望佢可以造福下我呢 D 波迷,唔使捱貴波 ! 莫總突然笑左出黎:「其實知道好多網友鍾情體育直播,但體育直播係另一個發展範疇。如果樂視收集到有一定的用戶需要,就會考慮向「波」發展。」我打算日日寫意見書給莫總,唔知「一萬人要求 Letv 播英超、NBA」最後會否願望成真呢?
▲最後送上樂視 Letv 近排主推嘅內容,大家一齊回應一下,係咪你口胃啦。
究竟香港樂視會否打得入本地觀眾既日常生活呢?佢又可唔可以淘汰傳統電視台呢?網友們又點睇呢?