有 Google 支援!小米盒子下周襲港,定價過 $500?

左定坤 (Cho Ting Kwan) 2016-11-02 20:53 | 數碼影音
剛剛收到來自小米的邀請函,表示在 11 月 8 日,將會在香港舉行新品發佈會,並以「雙十一」為主題。雙十一,亦即係「光棍節」,每年一到呢個時候,唔少廠商都會趁機推出一連串促銷優惠,務求清貨。而小米今次舉行「香港雙十一新品發佈會」,會否都會公佈今年的新優惠呢?不過,見到「新品」兩隻字,都知道小米仲有新野抵港,會係啲乜呢?手機?抑或......聽聞會有小米盒子,而且仲係美國果種添喎!睇下文啦!

Mi Box(Facebook).jpg

在邀請函上,小米表示「讓傳媒朋友一同體驗小米智能家居產品」,是甚麼「智能家居產品」呢?有可能係「米家空氣淨化器 Pro」,暫時未能確定。不過版主聽聞,發佈會當日,還會首次在香港推出小米盒子,而且仲要係美國賣果個版本。點解要強調美國版本呢?因為美國賣果個小米盒子,是採用了 Android TV 平台,亦即是支持 Google 服務。不難猜測的是,會有 Google 商店,可以更方便地下載 App,能夠直接使用熱門串流程式如 Netflix,並可以下載 Google Play 上的遊戲。

小米盒子配備了四核心 ARM Cortex-A53 處理器以及 Mali 450 圖像處理器,內置 2GB DDR3 RAM 以及 8GB eMMC 快閃記憶體,並支持 60fps 4K 影片、Google 語音搜尋、Google Cast 等功能。售價方面,美國定價為 US$69,折合港幣約 $535。來到香港幾錢未知,不過如果都係呢個價,網友覺得係貴還是平呢?另外,當日小米亦會宣佈旗艦新機小米 5s Plus 正式抵港,又會賣幾錢呢?記得留意當天的文章了!

最新新聞