減價 30%:日本 Yamaha TW-E3A 平價 True Wireless 藍牙耳機開箱

YKer 2021-04-23 11:31 | 數碼影音
每次有朋友問有無價錢唔超過 500 蚊、最少要支持 aptX 傳輸制式、又唔要雜牌貨 True Wireless 藍牙耳機的時候,我都只能夠拋出 Nokia E3500 呢款。 但最近唔小心發現左 Yamaha 都有款平價真無線藍牙耳機七折發售中,最重要係個樣好睇,唔會有支棍伸落黎咁醜樣。 廢話少講,貨已到手立刻開箱試玩!

fb.jpg

前言
老實講,True Wireless 耳機絕大部分都係貼牌代工,意思係品牌本身無廠無生產技術,要委託耳機工廠協助設計和生產,而高通、聯發科都有自己一套完整的方案比廠家採用,所以好多人話品牌唔太重要,反而要留意背後硬件。 但亦都老實講,戴住出街,最重要唔係音質,係個樣同品牌呀! 見到你個耳機伸條棍落黎,但又唔係蘋果耳機就會一律當成山寨貨;見到你耳機樣子不錯但乜牌子? Sorry,聽都未聽過呀 ~ 上面呢個情況都係絕大部分女性朋友提出的要求,必須係出名牌子、耳機樣要夠靚、價錢要平,至於耳機音質? 真係 WHO FXXKING CARE 呀!

先講翻今次主角係 Yamaha TW-E3A,絕對就係符合上面所講的要求,第一、佢係日本 Yamaha 品牌;而每次講到 Yamaha 時候,男性朋友會話佢唔係電單車廠黎嗎? 而女性朋友會話,佢唔係做樂器嗎? 

WhatsApp Image 2021-04-23 at 11.29.03.jpeg

其實兩者都係正確,Yamaha 就係一個不務正業的日本企業。 涉及的行業多到數唔晒,而且可以無任何關聯。熱心的台灣網友就整理左 Yamaha 技能樹圖片比大家參考下,而最黐線係佢每樣都做得似模似樣。好喇,翻黎耳機部分,先講七折係邊度入手先,呢款耳機我極度懷疑係得香港某琴行獨家代理之餘,而且係獨家發售,以 688 元定價下降到 468 元 ,配合網上消費回贈卡會再平多少少。


開箱
photo6057348354037361880.jpg
▲ 無錯,今次入手是粉紅 PINK LADY,所採用的方案係 「QCC3026」,支持 Qualcomm TrueWireless Stereo Plus,可以單獨左右耳機使用。

photo6057348354037361881.jpg
▲ 盒身已表明支持高通 aptX 傳輸編碼,聲音係會好多 SBC 和 AAC 少少;畢竟擁有較多的資料流量一般代表音質可以更好。

photo6057348354037361882.jpg
▲ 而防水 IPX5 已經係 True Wireless 耳機的基本盤,TW-E3A 亦自然具備通話、語音助手之類整套高通 OEM 方案的功能。

photo6057348354037361883.jpg
▲ 果然,日本公司的設計真係靚好多。

photo6057348354037361884.jpg
▲ 簡易版說明書都設計到相當有藝術特色;列出隨機附送的配件。

photo6057348354037361885.jpg
▲ 亦教埋你點樣快速配對。

photo6057348354037361886.jpg
▲ 仲講埋點充電,其實係相當簡單;耳機本身播放最高 6 小時,加埋電池盒獲得額外 18 小時最高續航力。


耳機本體
photo6057348354037361887.jpg
▲ 盒仔細細但估唔到印刷品有咁多份,包括詳細操作說明、保養書、質檢證等等。

photo6057348354037361889.jpg
▲ 原裝配件額外送多三組耳膠、以及送一組擁有固定翼設計的耳機矽膠套,當然少不了一條 USB-C  充電線。

photo6057348354037361891.jpg
▲ 最大路的雙金屬點充電盒設計,盒內已預留足夠空間比你切換成原裝附送的任何形狀耳膠。

photo6057348354037361892.jpg
▲ 放左落去如上圖,會有充電狀態顯示。

photo6057348354037361893.jpg
▲ 而盒身 USB-C 充電口隔離都有一個充電指示燈。

photo6057348354037361894.jpg
▲ 耳機代工企業係台灣志豐,是一個相當老牌、專做耳機喇叭的代工企業。

photo6057348354037361896.jpg
▲ 買黎送比女女時候,有埋個規格表就一目瞭然。


實測短評
真無線 True Wireless 藍牙耳機主要都係出街用,如果無 ANC 主動降噪的話,在戶外環境中聽落去無太大差異,音量是否足夠大聲先最重要。單耳機 6.3g 重量黎講算係重量級,但換來的是更舒服的矽膠觸感,實測佩戴足 2 小時都未有不適。 本 YK 耳朵應該係屬於正常成年男性耳朵結構,掛 ~

音質方面,耳機本體屬於半耳道式,物理隔音效果相當出色,重低音效果並無太大流失,聽女歌手中高頻聲線相對清晰。如果你耳朵可以主動式活動的話,會令耳機稍微鬆動,會影響聲頻表現,而呢個亦都係所有耳道式耳機會遇到的情況。 所以,我就改用帶有固定翼矽膠套,問題得以完美解決。

採用高通 aptX 藍牙編碼,音質固然只係比 SBC / AAC 好少少,肯定完全無辦法同有線耳機比。 而放棄音質換來無線纏繞的方便,呢個先係 True Wireless 的真理。而實測上交通工具例如巴士、渡輪中,未出現頻段干擾、斷流等問題,高通晶片係呢方面做得確實比較好。總括而言,本 YK 係相當滿意幾百蚊貨仔可以擁有咁高質素的體驗。

photo6057348354037361897.jpg

Yamaha TW-E3A 有獨家 Apps 配合,但正如上圖你見到,只有電量提示、自動斷電時間及 Yamaha 獨家的聽覺保護機能。 到底乜野係 Listening Care 技術呢? 官方所講「當聆聽音量較小(低音壓)時,音訊訊號的低頻和高頻需要相對較高音壓才能獲得平衡並容易被聽到。簡而言之,這代表您需要更大的音量才可聽到低頻和高頻。然而,Yamaha 針對這個問題開發了一種截然不同的解決方案。」而實際上如果係安靜的環境中,確實會發現音量細的時候 TW-E3A 會幫你推大少少高頻和低頻音域,但當你主動推高音量,呢個效果就會越來越弱。


通話實測
本 YK 係強烈不建議用任何 True Wireless 藍牙耳機通話,因爲天生限制係收音距離,你把口講野但收音係耳朵位置,從物理角度考慮你覺得有可能收得清楚嗎? 除非你耳朵伸多一條野出去,儘量接近把口,情況就好似各種出名話音清晰的藍牙耳機,你留意到都會係伸條野出去。 
 

▲ Anyway,我都做左一個錄音實測比大家參考,萬一有需要 hand free 通話,到底個音質會差幾多,大家心中有數。


結論
簡單一句,如果未嘗試過 True Wireless 真無線藍牙耳機的朋友,想入手一款樣靚、價平、大品牌之選,咁 Yamaha TW-E3A 減價後 468 元售價值得你考慮,純出街聽野體驗相當出色,物理隔音效果顯著,而一貫日系 Yamaha 暖聲底都可以係呢個入門耳機中感受得到。 但其實仲有一個測試未完成,就係幾時會整唔見粒耳機,以後有結果我先再同大家分享 ~
 

最新新聞