三個小米 4K TV Stick 比親生仔好的優點
當日同大家分享小米 4K TV Stick 價錢稿，我記得有網友就留言，$469 點解唔買 Google Chromecast with Android TV 呢？我覺得有三點，可能係入手小米 4K TV Stick 好過親生仔嘅原因：(1) Google Chromecast with Android TV，都係有條線吊住，而我鍾意小米 4K TV Stick，就係因為佢係好似插 USB 手指咁，直接插落去電視個 HDMI 位度，雖然最終你都係需要透過 microUSB 線插駁電源，但我會感覺舒服少少 (如果你電視有 USB 插槽，都可以將利用電視嚟輸出電源，咁就不用特意用火牛)。
(2) 小米 4K TV Stick 雖然係小米，但至少係香港行貨，有咩問題要尋求支援都算係方便，而 Google Chromecast 香港官方並無推行貨。
(3) 第三點其實我起初無乜留意，反而係網友會特別關心嘅地方，就係 Google 親生仔無 AV1 硬解，而小米 4K TV Stick 就有。而乜嘢係 AV1？佢係一種編碼格式，好處係當你觀看 AV1 格式嘅影片內容時，會改由 GPU 去進行解碼嘅動作，有助減輕 CPU 負擔，令系統更加穩定同流暢。而 Netflix 是其中已支持 AV1 編碼的影音平台。
小米 4K TV Stick 開箱評測
而以下，我會一邊同大家開箱這隻小米 4K TV Stick，一邊加插少少我個人嘅感覺。
包裝盒外觀。
包裝盒底部顯示預載 Netflix、YouTube、Google Play 等平台。
右側有教你 3 步使用 TV Stick 的方法。
左側告訴你內裡的配件。
包括 TV Stick、遙控器、HDMI 延長線、火牛以及 microUSB 線。
小米 4K TV Stick 的外觀。
HDMI 插槽。
機身有 microUSB 插槽，用來接駁電源。
接駁電源，並將 TV Stick 插到電視 HDMI 插槽即可。
再看看遙控，有呢啲按鍵，不過方向鍵好易痴塵。
仲有可以即入 Netflix、Prime Video 的按鍵。
▲ 一切接駁完後，開始試玩。你會見到，都係一般 Android TV 介面。
▲ 第一件事係連接 WiFi。版主另一件有用嘅小米 Android TV 裝置，就係三千幾蚊果個投影儀，但奇怪嘅係，個投影儀係偵測唔到我屋企 5GHz 嘅 WiFi，而今次呢個小米 4K TV Stick，並無呢個問題，好順利咁搵到「Ah Kwan 5G」。
▲ 支持 Google Assistant，可以透過語音搜索或者播放音樂、影片。
▲ 我試過就咁講「單身即地獄」，佢會幫你搜尋呢套節目嘅介紹，但就唔會幫你播放，或者無播放呢個選擇。
▲ 所以如果你想直接叫佢播放，你要講清楚「播放『單身即地獄』」，咁佢就會話「OK，幫你開緊 Netflix」。
▲ 佢遙控器有個掣，係進入 PatchWall，入到去藍色一片無嘢睇，有點奇怪。其實我唔太知呢個係乜 app，但應該一般人嚟講，平時都唔會用到。
如上面嘅圖，都知道版主間房係用 Hisense 嘅 Smart TV (無計，為咗平，選擇咗佢)，最麻煩就係無 Google，好多嘢想睇但都睇唔到，除非你自己下載 apk 去 download，但我就係啲比較嫌麻煩嘅嘢，要下下用 apk download，我會索性電視都唔開，就算要睇，都係開小米個投影儀，射去天花板睇。
小米 4K TV Stick 睇個名，都知佢係支持 4K 解像度，不過我部電視最高淨係支持 720p 高清，4K 對我來說得物無所用。另外，小米 4K TV Stick 亦支持 Dolby Vision 以及 Dolby Atmos 技術，並支持 DTS HD 技術，喺聲畫部分都會有唔錯體驗。
規格部分，小米 4K TV Stick 用上四核心 CPU 以及 Mali G31 MP2 GPU，內置 2GB RAM 以及 8GB ROM，運行 Android 11 作業系統，使用時需要用上兩粒 3A 電池。
網友簡單 Q&A
當初版主同大家做報價時，見到有網友會有點提問，所以能夠答到的地方，我會盡答。Q: 開機會不會要睇成堆廣告先可以用？
A: 不會，開機 load 一陣，就會直接進入 Android TV 介面。
Q: 安唔安裝到黃藍 Viu？
A: 藍 Viu 安裝同睇到，但黃 Viu 唔得。
Q: 可否另外 Play mkv 檔？
A: 據官網規格表顯示，影片格式支持 MKV、MPG、MPEG、DAT、AVI、MOV、ISO、MP4 以及 RM。