$1800 10.5 吋大芒平板!酷比魔方 X Game 開箱評測 + 打機表現分享

左定坤 (Cho Ting Kwan) 2022-01-07 19:07 | 網絡消息
內文.jpg

版主早前就同大家分享過,酷比魔方香港會推出一部主打遊戲嘅平板電腦,連個名都以遊戲命名,叫做 X Game。但價錢就相當平,$1800 都唔使,就已經可以買佢返屋企,另外仲支持手寫筆同埋鍵盤,不過就需要另外加購,價錢已經喺上一篇文有 update。而版主我都已經向代理借得呢部平板電腦,同大家做個開箱之餘,亦會睇吓性能如何,順便都試埋打機。

酷比魔方 X Game 開箱

有人話,我部手機都可以打機,咁點解要買遊戲平板呢?對於手遊嚟講,屏幕愈大,可以顯示嘅畫面就愈多,操作體驗亦都會愈好。而酷比魔方 X Game 就採用咗 10.5 吋全高清 IPS 全視角屏幕,支持 100% sRGB 色域顯示,1920 x 1280 解像度配合全貼合技術,對於平板電腦嚟講,佢嘅顯示效果喺同價位嘅平板電腦嚟講,算係唔錯。

值得一提嘅係,X Game 雖然唔係全面屏,但四邊嘅邊框窄度都相同,對於強逼症嘅人嚟講,望落去都係幾舒服。另外,佢仲支持全屏手勢、屏幕關閉手勢等常見嘅手機操作習慣,整體嚟講相當好用。今次 X Game 最大特點就係佢仲支持 4096 級壓感手寫筆,你可以喺平板上繪畫、寫字、簽名等等,千幾蚊仲支持手寫筆,係有驚喜,就算另外加購都唔係貴,不過可惜版主就無借得呢枝手寫筆,就無辦法同大家分享,到底手寫筆表現係咪順暢。

至於 X Game 嘅整體設計上,算係相當輕薄,機身後蓋用上金屬材質,整體厚度約為 7.95mm,在機背可以見到五個金屬觸點,用來連接 X Game 嘅專用磁吸鍵盤。而背面右上角具有一個 8MP 鏡頭以及閃光燈,側面則有卡槽,支持 4G SIM 以及可插 microSD 卡。而平板嘅兩側可以見到有四個喇叭,立體聲效果相當唔錯,用來玩遊戲同埋追劇,都算係夠用,而且音量相當大聲。
 
Screenshot_20220110-170409.png

配備 MTK Helio P90 處理器,酷比魔方 X Game 性能、續航跑分速測

既然叫得上遊戲平板,X Game 配置方面相當重要,然而 X Game 所用的處理器,並無想像中咁勁,配備咗 MTK Helio P90 八核心處理器,呢粒處理器用上咗 12nm 制程,整體性能同 Qualcomm Snapdragon 710 可以鬥下,但極其量可以話係一部性價比高平板,叫做遊戲平板就似乎誇張咗少少。另外,平板內置 8GB LPDDR4x RAM 以及 128GB ROM。我們就用了安兔兔跑分、AndroBench 5 以及 GeekBench 4 Battery Test 進行評測,以測試平板 CPU、GPU 的性能、ROM 的讀寫速度以及電池的續航能力。

安兔兔評測測試結果總分為 195090 分,當中的 CPU 成績有 47148 分,而 GPU 成績為 37010 分,見到有外媒可以跑到 27 萬多,正常唔應該會相差咁遠,而之後版主再跑多次,最終成績都係 19 萬多。

AndroBench 5 方面,連續讀取以及連續寫入速度分別為 519.73 MB/s 以及 189.55 MB/s,而影響流暢度、使用體驗的隨機讀取以及隨機寫入速度,則分別為 142.13 MB/s 以及 26.9 MB/s,呢個速度並唔係快,使用流暢度方面會有影響。

至於 GeekBench 4 Battery Test 成績,則為 4620 分,作為一部擁有 7500mAh 電池的平板電腦,卻居然只有 4620 這個分數,說明大電並不一定有用,省電能力似乎更重要;根據 ePrice 內部測試記錄,成績僅比擁有 3020mAh 的華為 Y6s 好少少 (華為 Y6s 成績為 4345 分)。
 

酷比魔方 X Game 實際打機表現

上面分享完跑分,純粹係將佢處理器的性能表現具體化畀大家睇,但實際作為遊戲平板合唔合格,都係需要以實際手感去判斷。雖然而家少咗人玩 PUBG mobile,不過版主自己半夜時間都仲係會同固定隊友一齊玩,所以我都係下載咗 PUBG mobile 試玩一下,畢竟 PUBG mobile 對性能需求都頗大,用嚟測試可以更容易睇到有無咩不足。值得一提嘅係,X Game 仲支持六軸陀螺儀,特別喺玩食雞果陣,理論上可以令遊戲操控體驗更好。

在玩 PUBG Mobile 嘅過程中,我係開啟咗遊戲入面陀螺儀嘅功能,並將幀數設置至「高」。而畫質方面,使用 X Game 玩 PUBG Mobile,只能設置到高清,去唔到「HDR 高清」、「超高清」甚至「UHD」,所以遊戲時如果唔開鏡望遠處嘅敵人,會覺得唔係太清,出現起格嘅情況。開始遊戲時,會發覺跳傘差不多落地的時候,會有啲卡頓,幾秒就卡一卡,呢樣幾影響遊戲體驗,不過後來我入返遊戲嘅設定,將「流暢自我調整」啟用,情況就有啲改善。

整體嚟講,我只能夠針對遊戲畫質同流暢度,去評論呢部平板嘅遊戲體驗,因為最終玩遊戲嘅感覺,都係需要時間去適應,畢竟我平時玩開 PUBG Mobile,都係用 ASUS ROG Phone 5 玩,而好少會揸住平板電腦去玩,所以呢點會出現唔習慣,而呢種唔習慣令我唔能夠好客觀咁講,遊戲手感好與壞。但相信遊戲畫質同流暢度,喺打機嚟講都係相當重要,針對畫質同流暢度嚟評分,若果 10 分為滿分,我會畀 5 分,並唔係十分好,但千八蚊唔使打到機,又好似唔可以要求太多,叫做合理範圍,只係如果要稱作「遊戲平板」,就稍為言過於實。

8d1ddd98c37b4e96a0653ed69074b045.jpeg

小結

呢部 X Game 賣點唔係相機,所以我都無特登去試影相,主要針對佢賣點「遊戲平板」來進行測試,試效能、試打機,結果在安兔兔評測跑分結果,似乎達不到應有的成績,而 Geekbench 4 結果則顯示,即使是坐擁 7500mAh 大電池,亦不見得可以有好長嘅續航時間。至於實際打機,似乎並無法處理像 PUBG Mobile 這類性能需求較大的遊戲。但衡量到這只是一部千八蚊有找的平板電腦,其實呢個成績又似乎係合理,並唔可以挑剔太多,純粹是我對「遊戲平板」有過高的期望,加上睇過一些外媒評測,講到又試食雞又試王者榮耀,表現好好,但最後同自己實測結果有落差,導致有少許失望吧。不過,只要你調整一下心態,其實佢係一部千八蚊有找,可以支持到手寫筆 + 鍵盤嘅經濟實用平板,再唔係做 Zoom 開會用機,都係一個唔錯選擇嚟。

鳴謝駿裕科技借出平板實測

最新新聞