五千中至強電競平板 REDMAGIC Astra 2 首創液冷散熱配 185Hz 高刷屏 行貨發售包郵到港

左定坤 (Cho Ting Kwan) 2026-08-11 14:00 | 網絡消息

電競手機品牌 REDMAGIC 推出新一代細螢幕電競平板 REDMAGIC Astra 2。今次新機繼續打磨極致效能，唔單止換上頂級處理器，仲加入業界首創嘅液冷散熱系統，同時公開咗全球早鳥優惠同開售日程，香港亦在網上發售地區之列。

雙晶片分工維持高幀率

REDMAGIC Astra 2 採用 Qualcomm Snapdragon 8 Elite 處理器，配合自家研發嘅 RedCore R4 電競晶片。呢粒協同晶片專門處理畫面超解像度提升、插幀、觸控優化同埋低延遲音效，將部分運算工作分擔出去，令主晶片可以長時間保持喺高峰效能，減少過熱降頻嘅情況。機身還採用了 AquaCore Cooling System 2.0 液冷散熱系統，入面注入咗伺服器級別嘅氟化冷卻液。機背採用透明設計，可以睇到內部嘅液冷結構同 RGB 燈效。儲存配置方面，最高提供 16 GB RAM 同 512 GB ROM。

185Hz 觸控屏同雙 USB 介面

螢幕方面，新機配備 9.06 吋 2.4K OLED 螢幕，支援 185 Hz 刷新率同 2,000 Hz 觸控採樣率，屏占比達 90.1%，峰值亮度為 1,600 nits。電池容量為 8,300 mAh，支援旁路供電。機身設計比較特別，設有兩個 USB 接口，側邊嘅 USB 2 接口支援 40 W 充電，方便橫握打機時插線；主要嘅 USB 3.2 接口就支援 75 W 充電、10 Gbps 資料傳輸同埋影片輸出。機身同時具備 IP54 防水防塵等級同 Corning Gorilla Glass 3 防刮玻璃。
 

開售詳情同香港價格參考

官方而家提供早鳥預訂，買家支付 1 美元或歐元或英鎊訂金，就可以獲得 30 美元 / 歐元 / 英鎊折扣、80 W 快充頭同埋限定鑰匙扣：代金券預訂：2026 年 8 月 10 日優先購買：2026 年 8 月 2  5 日全球公開發售：2026 年 8 月 26 日海外官方建議售價由 US$699 美元 (約 HK$5452起 ) （12GB + 256GB），REDMAGIC  官網接受香港區用家購買，有興趣網友可到官網訂購。