11 吋與 13 吋雙尺寸選擇，橫向鏡頭設計更就手
首先睇睇外觀同屏幕，全新 iPad Air 繼續提供極致便攜嘅 11 吋同埋擁有更大屏幕空間嘅 13 吋兩款尺寸畀大家揀。機身顏色方面就備有藍色、紫色、星光色同埋太空灰四款靚色。雖然外觀上睇落變化唔大，但佢延續咗極受歡迎嘅橫向機身邊緣 1200 萬像素 Center Stage 前置相機設計，配合埋橫向立體聲揚聲器，無論係開 FaceTime 視像會議定係打橫睇片都更加就手同震撼，當中 13 吋型號嘅音質更加係特別出眾。M4 晶片強勢加持，狂谷 12GB RAM 谷盡 AI 效能
效能絕對係今代 iPad Air 嘅最大賣點！新機跳級配備咗 8 核心 CPU 同 9 核心 GPU 嘅 M4 晶片，比起配備 M3 嘅型號最快可達 30%，如果同 M1 型號比更加係快高達 2.3 倍。而且佢嘅 9 核心 GPU 仲支援第 2 代硬件加速網格著色同光線追蹤引擎，打機畫面嘅光線同倒影效果極其逼真。為咗迎接 Apple Intelligence 嘅龐大運算需求，Apple 今次非常慷慨，將全新 iPad Air 嘅統一記憶體（RAM）大幅躍升 50% 去到 12GB，記憶體頻寬亦增至 120GB/s！配合埋比 M1 快 3 倍嘅 16 核心神經網絡引擎，無論係用《Goodnotes》等 app 嘅內置 AI 功能，定係應付日常嘅繁重工作都游刃有餘。
全新 N1 與 C1X 晶片，連線速度大躍進
除咗核心效能，Apple 亦為新機嘅網絡連接帶嚟大升級。iPad Air 首次配備 Apple 自家設計嘅 N1 無線網絡晶片，全面支援 Wi-Fi 7、藍牙 6 同埋 Thread 連接。連接 5GHz Wi-Fi 網絡嗰陣效能更佳，連帶「個人熱點」同「AirDrop」都更加穩定。至於流動網絡型號，就配備咗同 iPhone 17e 一樣嘅 Apple C1X 數據機，5G 傳輸速度比 M3 型號快達 50%，同時仲可以降低高達 30% 能源消耗，確保擁有全日嘅電池續航力，並繼續支援方便嘅 eSIM 功能。
完美支援 iPadOS 26 與一系列專業配件
新機預載咗最新嘅 iPadOS 26，加入咗具有 Liquid Glass 半透明效果嘅精美新設計，以及可以輕鬆切換 app 嘅全新強勁視窗系統。配合 Apple Intelligence，用戶可以享受到更強大嘅私隱保障同埋實用 AI 功能。配件方面，新一代 iPad Air 繼續完美兼容極致體驗嘅 Apple Pencil Pro、抵玩嘅 Apple Pencil (USB-C)，以及備有黑白兩色、採用精妙懸臂設計嘅精妙鍵盤。
香港賣價與發售詳情
講到大家最關心嘅定價，今次全新 iPad Air 繼續提供 128GB、256GB、512GB 及 1TB 四款儲存空間配置。售價方面，11 吋 Wi-Fi 型號售價由 HK$4,599 起，Wi-Fi + 流動網絡型號由 HK$5,799 起；而 13 吋 Wi-Fi 型號售價由 HK$6,299 起，Wi-Fi + 流動網絡型號則由 HK$7,499 起。大專院校師生更可以享有教育優惠價，11 吋同 13 吋分別只需 HK$4,199 同 HK$5,899 起。新機會喺 3 月 4 日（星期三）開始接受預訂，並且會喺 3 月 11 日（星期三）正式發售。四千幾蚊就有 M4 晶片、12GB RAM 兼且支援 Wi-Fi 7 同埋 Apple Intelligence，今代 iPad Air 真係可以話係誠意之作。大家對呢部新平版又有咩睇法？會唔會即刻撲去預訂呢？