Samsung Tab A 10(2016)未到， 7 吋版先有減
有留意平板的朋友都知道， Galaxy Tab A 系列一樣係主攻入門平價市場，規格並不算特別出色，但勝在有獨特的賣點。好似 Samsung Galaxy Tab A 8.0 LTE 以及 Samsung Galaxy Tab A 9.7 LTE 都係支援中港 4G 全網通，而且更支援 S Pen，所以即使規格「弱雞」少少，都仲算係頗受歡迎。但最新一代的 Samsung Tab A (2016) 7 吋版本，某程度上係個規格大倒退。只得 WiFi 版之餘，規格仍然停留係 1280 x 800 屏幕解像度。處理器都只係得 Qualcomm S410 再加 1.5GB RAM 同 8GB 內置容量，即使支援最大 200GB Micro SD 卡，但實際可用記憶體得返 4.3 GB 恐怕無乜人接受到。相機主鏡頭只有 500 萬像素、前鏡有 200 萬像素都係意料之內，電池係 4000mAh 都唔算係大問題。最慘係 Tab A (2016) 7 吋版是不支援 S Pen 的，兩個大賣點在新一代齊齊唔見晒，實在驚人。
雖然係規格、賣點上乏善足陳，但 Tab A (2016) 7 吋版作為 Samsung 出品，係大鋪方面雖然都有減價，但又唔算好多。只係由原價 $1698 「即減 $100」變為 $1598，呢個價錢同深水埗而家細鋪賣價都相當接近，所以是否值得入手，都係一個問題。
▲ 面對 Samsung Tab A (2016) 7 吋版，個人覺得真係有種新不如舊的感覺呢！
Sharp SH05G 再抵港！最型 7 吋通話平板？
再來講下日系平板，今次要講的 Sharp SH05G 其實不是新產品。而且早係 2015 年 9 月已經到香港開賣過，不過當時定價相當高，而且貨源短缺，所以好快就已經無貨。近日有細鋪再度引入呢近收到 4G、可以打出打入，而且有窄邊框的 SH05G。係規格上 SH05G 其實算係唔錯，有 7 吋 FHD 芒、處理器是 Qualcomm S810 配 2GB RAM 以及 32GB 內置容量，相機就係 800 萬像素主鏡頭配 210 萬像素前鏡頭。電池容量就係 3900mAh 。價錢方面，過左大半年，售價當然有回落，而家要價 $4180，唔知大家又點睇呢？留言講講吧！
▲窄邊框可以話係成部機的最大賣點，好小可見有平板類別產品有咁細部呢！
▲ SH 05G 其實可以話係「日系 MediaPad X2」，可以用到 4G 之餘亦可打出打入。