外觀設計與開箱
雖然之前我哋亦試過上一代嘅三星 Galaxy Tab S8 Ultra，但再次拎起呢部 Galaxy Tab S9 Ultra 嘅時候，仍然覺得呢部平板超級大，畢竟同常見嘅 10 吋平板相比，14.6 吋嘅屏幕尺寸真係大咗好多。整體尺寸有 208.6 x 326.4 x 5.5mm，重量亦有 732g。不過呢款平板嘅機身厚度極薄，令人印象深刻，拎起嚟唔會覺得好笨重。另一個比上代好嘅重點係，Tab S9 系列平板加入咗 IP68 防水防塵嘅機身設計，連 S Pen 都具備 IP68 防水防塵（Keyboard 套裝並無防水防塵㗎，唔好自己走去試防水，以免有損失）。呢款平板可以擴大使用範圍，例如可以放心地拎去廚房睇住食譜煮嘢食，甚至可以一邊浸浴一邊用平板追劇。而且防水防塵設計係繼 SONY Z 系列之後，喺旗艦平板市場好少見嘅功能，令 Tab S9 Ultra 相對其他平板更加令人放心。
而呢款平板嘅出眾之處係可以配合其他配件，實現唔同嘅使用模式。盒裝內除咗平板本身，仲有專屬嘅鍵盤配件同 S Pen，用家可以好似筆電咁，喺類似 Windows 介面嘅 DeX 模式下處理文件，相當方便。另外，一般情況下，只要拎起吸附喺平板上嘅S Pen，就可以喺待機模式下即時用 S Note 功能做筆記，而且用家亦可以善用內置且可免費試用一年嘅 GoodNotes 進階筆記應用程式，同埋可免費試用半年嘅 Clip Studio Paint 繪圖程式，滿足筆記、書寫同埋進階繪圖嘅需要。
▲ 除咗平板本體，還內含 S Pen 與專屬鍵盤與背蓋。
▲ 結合專屬鍵盤後，其 DeX 介面可以令 Tab S9 Ultra 好似筆電咁去操作，對於有文書處理需求嘅使用者嚟講相當方便。
▲ 背蓋仲有收納 S Pen 嘅位置。
▲14.6 吋大屏幕，其實單手拎嘅話會幾辛苦，但咁大個芒視覺體驗係好爽，而屏下指紋辨識嘅區域，就喺屏幕嘅右側位置。
▲背蓋設計相當簡約，可以見到兩側嘅天線配置，而鏡頭左側則是收納 S Pen 嘅地方，用磁吸方式吸附，好容易拎落嚟用。
▲雖然屏幕尺寸好大，但呢款平板機身非常薄，只有 5.5mm，右側機身配置兩個喇叭同埋 Type C 充電插槽。
▲左側一樣有兩個喇叭，形式上下雙立體聲的組合，唔理點樣拎住都好，都唔使擔心會有遮蔽出聲孔嘅問題。
▲ 呢個角度睇，望落真係超級薄。機底位置有配合鍵盤組使用嘅孔洞同埋金屬接點。
▲頂部有電源鍵、音量鍵、麥克風同埋 SIM /記憶卡合一的卡槽 (Wi-Fi版則不支援 SIM 卡）。
▲前相機有雙鏡頭，分別為一般鏡頭與超廣角鏡頭。
▲取出卡槽的狀態，支援記憶卡方便使用者擴充儲存空間。
▲屏幕關閉嘅情況下，只要取下 S Pen ，就可以快速啟動 S Note 進行書寫，緊急需要做筆記嘅時候非常方便。
▲ S Pen 係內建電池的，平時只要吸附喺平板機背位置，就可為 S Pen 進行充電。
影音與續航
Tab S9 Ultra 搭載 2960 x 1848 解像度嘅 14.6 吋 Dynamic AMOLED 2X 屏幕，支援 HDR10+ 同 120Hz 嘅高更新率，同三星旗艦智能手機使用嘅屏幕一樣出色。呢款平板嘅顯示效果唔單止大，而且細緻度同顯示效果都非常優質，絕對唔係一般使用 LCD 屏幕可以比擬嘅。因為 AMOLED屏 幕嘅黑色可以達到更加接近真實嘅黑色，高對比度嘅特性令呢款平板用嚟觀賞影片嘅立體感特別出色，HDR 嘅顯示效果亦非常唔錯。實際體驗過實機之後，我覺得呢部平板可以稱得上係 Android 平板中嘅頂級顯示屏幕，尤其 Tab S9 Ultra 所搭載嘅喇叭音質非常出色，加埋有四喇叭設計，無論係音質定係音量，已經唔係一般手機可以比擬到嘅水平，幾乎已經達到筆電或者小型藍牙喇叭嘅水平。用嚟觀賞影片或者打遊戲嘅音效表現都非常唔錯。
▲用呢部平板嘅屏幕睇片好爽，除咗尺寸大， Dynamic AMOLED 顯示品質，無論喺顯色、亮度、細緻度方面，都十分出色。
▲超大屏幕尺寸用來多工處理也顯得更符合邏輯，即使分割為雙畫面或三畫面，都還是有非常充裕且好用嘅顯示空間。
Tab S9 Ultra 雖然機身非常薄，但卻搭載了 11200mAh 容量嘅超大電池，畢竟要應付 14.6 吋超大屏幕顯示嘅功耗，自然需要更大嘅電池加持。而喺續航方面，我哋同樣透過連續播放線上高畫質串流影片嘅方式去進行測試。我哋將平板嘅屏幕自動亮度關閉、屏幕亮度與音量調整至 50% 左右，同時將屏幕更新率設定為最佳化，之後以 Wi-Fi 連網嘅方式連續播放 YouTube 高畫質影片一個鐘頭。
測試結果我哋發現電量從原本嘅 51% 下降至 43%，下降咗 8%，換算喺滿電情況下，平板可以連續播放 12.5 個小時，幾乎可以畀你用呢部高畫質嘅超大屏幕連續觀看超過六部電影。值得一提嘅係，呢塊屏幕調整至 50% 亮度嘅時候，已經相當光猛夠用，相信如果搭配簡單嘅文書處理等工作需求，要達成一日一叉應該唔係問題。
▲用呢個超大 14.6 吋屏幕嚟講，其續航測試表現唔錯，而且喺關閉自動亮度且亮度 50% 嘅情況下，屏幕亮度係非常光，如果係一般實際使用，預期會有更出色嘅續航表現。
▲建議各位可以戴上耳機嚟觀看呢條影片，體驗一下 Tab S9 Ultra 嘅喇叭大音量、高音質，甚至有低音效果嘅外放品質。
性能、遊戲與相機體驗
之所以文章嘅開頭我哋會用超旗艦嚟形容呢部平板，主要係因為佢搭載咗目前 Android 陣營最強嘅 S8 Gen 2 for Galaxy 處理器（亦即係 S8 Gen 2 加強版嘅意思），配合 12GB RAM/256GB ROM，幾乎就係目前 Android 平板最頂規嘅配置，性能表現唔需要懷疑，而且因為平板有更大嘅散熱面積，溫度控制表現亦相當令人滿意。
▲Geekbench 測試結果
▲3Dmark 測試結果
▲PCmark 測試結果
而搭配我哋頭先提到畫質表現非常出色嘅大屏幕，呢部平板除咗睇片過癮，用嚟打機亦都好爽，特別係嗰種畫面精緻度特別豐富嘅遊戲，透過呢個 14.6 吋大屏幕平板，可以有好多其他直立式手機、甚至大尺寸摺疊屏幕手機都畀唔到嘅細節同埋視覺體驗。
▲14.6 吋嘅 Dynamic AMOLED 2X 屏幕用嚟睇片，顯示效果甚至比一般筆電還要好！
▲比手機屏幕大上許多，玩一些很重動畫呈現嘅遊戲特別過癮，可以見到好多手機上無法實現嘅畫面細節。
▲大家可以透過影片嚟睇下使用呢款平板打機嘅畫面。
▲不過屏幕太大對於某些遊戲嚟講會比較麻煩，例如玩原神撿東西嘅時候，雙手點擊就會有些困難。
至於相機部分，Tab S9 Ultra 主相機部分搭載 1300 萬像素主鏡頭與 800 萬像素超廣角鏡頭；前相機則是 1200 萬主鏡頭搭配 1200 萬像素超廣角鏡頭，因此前、後相機用來視訊通話都好方便，無論係個人或者團體進行視訊嘅場景都能夠輕鬆應對。
▲前後相機都具備主鏡頭與超廣角鏡頭，不過一般平板鏡頭通常使用於視訊場景，以下我們就簡單提供幾張使用該平板所拍攝的成像，讓大家體驗一下其廣角的程度與成像品質。
 |
 |
 |
 |
 |
 |
結語：毫無懸念最強 Android 平板
雖然好多人同我一樣，睇到 Tab S9 Ultra 嘅價錢都會倒抽一口涼氣，畢竟就算 WiFi 版最平都要 $9688 起跳，唔係每個人都負擔得起。但係如果認真比較其他平板產品，你就會發現，呢部平板集合咗好多頂級嘅功能，包括「頂級處理器」、「超薄機身」、「S Pen 功能」、「超大 AMOLED 屏幕」同埋「可以連接鍵盤，變身成為筆電」。加埋 IP68 防水防塵功能，更加突顯Tab S9 Ultra 嘅獨特性。整體而言，用過呢部平板嘅體驗真係好出色，特別係屏幕顯示同性能表現，令人留下深刻印象。絕對係一部超級旗艦嘅 Android 平板，同 iPad Pro 媲美。如果你預算充足，平時鍾意 Android 系統嘅自由度，而且想要一部全面出色嘅旗艦平板，Tab S9 Ultra 絕對能夠滿足你多方面嘅需求。
