平玩磨砂芒！$2800 有找入手華為 MatePad 11 PaperMatte 版本 左定坤 (Cho Ting Kwan) 2024-03-20 17:42 | Huawei 平板電腦嚟講，版主自己係用緊 iPad mini 5，但事實上其實上年有部平板電腦，我係好感興趣，佢就係華為 MatePad 11 PaperMatte，話明 PaperMatte，即係佢個屏幕好似紙咁，有少少似市面上嘅電子書，磨砂面又唔會反光，尤其喺陽光底下，都可以清楚見到內容，即使無 Google 加持，但我會覺得就設計嚟講，算係相當吸引。最近留意到原來呢部平板電腦，而家只係二千幾蚊就買到，呢個價錢，係咪都幾抵買呢？ 華為 MatePad 11 PaperMatte 網店 $2800 有找 呢部華為 MatePad 11 PaperMatte，喺上年 9 月嘅時候香港推出，當時建議零售價 $3288，最大賣點係個芒，用上霧面屏幕，就咁望落去就好似用咗磨砂保護貼咁，觀看畫面內容相當舒服。而 MatePad 11 PaperMatte，而家 SmarTone 網店最新賣價只係 $2788，呢個價錢唔知大家又有無興趣呢？ 華為 MatePad 11 PaperMatte 硬件規格 規格方面，華為 MatePad 11 PaperMatte 版本，採用了 11 吋全面屏，具有 2.5K 解像度，並支持 120Hz 刷率，率先採用防眩納米蝕刻技術，可消除 97% 干擾光，閱讀書籍或觀看影片課程時，有效減少屏幕反光眩光，降低視覺疲勞。彩色繪本模式有效還原書本原彩，享受紙感畫面，令閱讀更專注。MatePad 11 PaperMatte 版本更獲德國 TUV Rheinland 無反射認證、低藍光認證，以及無閃屏認證，亦獲 SGS 低視覺疲勞金標認證。
