未來華為平板電腦：支援 On Device AI Agent 技術架構 + MCP 接入功能
首先，在這場分享會中，華為表示現正積極開發 On Device AI Agent 架構，核心建立喺用家嘅個人情境 Personal Context 上，包括將平板電腦及不同華為設備入面嘅日曆、相簿、筆記等個人資料串聯起來，透過 On Device 嘅 AI Agent 系統能夠跨應用嘅自動化分析，並作出不同嘅 AI 工作。重點是 AI 作業之後，數據保留喺平板內處理，唔洗將資料送上雲端，創造一個安全嘅個人工作空間。
實際應用點樣發揮 On Device AI 呢？ 內置係未來華為平板電腦嘅 AI Agent 可以做到定時排程任務，例如喺每日朝早，系統可以自動搜尋過去 24 小時嘅特定資訊，並自動生成 HTML 格式嘅匯報。另外，AI Agent 亦具備文檔生成能力，可以直接輸出 Word、Excel 試算表同 PowerPoint 簡報。華為同時表示，未來用於華為平板電腦嘅 AI Agent 可以接入外部 MCP（Model Context Protocol）服務嘅能力。MCP 有如上網瀏覽器使用嘅 Extension，可以在互聯網上如 Github 揾得到，用作增強不同 AI Agent 處理工作時嘅能力，例子包括做到調用外部圖表工具撰寫日報等相關功能。華為平板電腦相關嘅 AI 升級功能，預計喺 2027 年初率先喺亞太等地區推出。換句話講，未來華為平板電腦，就算係國際版，都會支援呢排最熱門，AI 界日講夜講嘅 AI Agent 功能，為用家做出不同自動化嘅工作流程。
明年推出音樂創作軟件全球版本
華為同步更新咗旗下多項生產力軟件嘅推進時間表。HUAWEI Notes (華為筆記) 嘅 AI 筆跡美化功能現時支援中英雙語，計劃喺出年擴展到 10 至 15 種以上語言；10 月份下將會推出即時語音轉文字功能，支援多位發言者分離辨識同多語種混雜辨識。另外，華為筆記亦正式整合字節跳動旗下 AI 教育應用 Gauth，提供圈題逐步解題功能。華為自研嘅專業音樂創作軟件早前喺 6 月喺中國展開測試，內置虛擬樂器同 AI 輔助工具，確認會喺下個月喺中國正式推出，並預計喺 2027 年推向全球市場。
HarmonyOS PC 生態出海 未來或有國際版
喺硬件同底層架構方面，活動現場透露咗多項未曾公開嘅規劃。產品線主管指出，華為計劃喺未來兩個月內喺中國市場推出全新形態嘅折疊屏 PC。底層晶片方面，除咗現有嘅桌面級處理器之外，2027 將會推出效能更強大嘅新一代桌面晶片。對於海外市場拓展，華為高層首次明確表示，現時主要喺中國市場銷售嘅 HarmonyOS PC 生態將會走向海外，並計劃逐步進軍東南亞等亞太市場。