開好多個箱
Lenovo 呢款平板定位相當聰明，規格係避開三星平板，但又能夠補充到市場上的缺口，想買平板的用戶黎講，多一個平價但不失質素的選擇。本 YK 建議各位網友，可以先閱讀之前有關三星 Tab S7 平板的評測，因爲 Tab S7 系列和 Lenovo Tab P11 Pro 外觀上真係好似，連配件玩法都相當接近，可以話係睇住三星黎打。 但，能否打得贏呢？
▲ Lenovo Tab P11 Pro 原價係 4999 元淨機身，但如果真係直接賣呢個價無疑是 GG 左，隔離三星旗艦平板 Tab S7 都係 4988 元規格完勝。但如果黎到大鋪聯手劈價的 2999 元又唔同講法 ~ 難怪立刻賣斷市，大家要買就要等補貨。
▲ 速遞朋友一聲叮噹，貨就到我手上；咁吸引的價錢令到 Lenovo Tab P11 Pro 又好似再靚仔左好多。
▲ 賣點都相當清晰：超輕薄、2K 屏幕、杜比視覺 + 聲效、JBL 加持四喇叭，一睇就知道係睇片爽歪歪的產品。
▲ 配件有火牛和充電線，還有卡針。 係呀，手上這部 Lenovo Tab P11 Pro 係 LTE 平板黎。
▲ 好耐未見過有手機、平板廠商會係充電線放魔術收整帶，線材造工亦相當好。
▲ 火牛支持 5V/3A、10V/2A、12V/1.67A 三種輸出模式。
▲ 11.5 吋 OLED 屏幕擁有 2560 X 1600 解像度，自動模式下最高亮度達到 500nit 高光，同時擁有高達 108% NTSC 色域及支持 HDR10，並獲得 Dolby Vision 加持！
▲ 比較特殊係有兩個 800 萬像素前置鏡頭，可以做出實用性唔高的虛擬景深效果。
▲ 左邊是 11.5 吋屏幕的 Lenovo Tab P11 Pro，右邊是 11 吋屏幕的三星 Tab S7；兩者窄邊框設計都差不多，當然前者整體機身會大多一個碼。
▲ 數值上 Tab P11 Pro 厚度是 5.8mm，而三星 Tab S7 厚度是 6.3mm； 而前者電量達到 8600mAh，後者只有 8000mAh，睇落去當然是 Lenovo 優勝，但續航力呢？ 嘻嘻。
▲ 機背頂部有信號天線塗線，而全金屬外殼質感相當好，冰冷磨砂質感好爽。
▲ 機身印有「Dolby VISION ATMOS」字樣，代表 Tab P11 Pro 不論是喇叭聲效和視覺效果上，都擁有杜比系統加持，開住喇叭睇電影會有相當好的體驗。
▲ 配備 1300 像素自動對焦鏡頭和 500 萬像素超廣角鏡，都係跟足三星的配置，但鏡頭質素大家就唔好太高要求，平板的攝影用途主要都係拍攝紙本文檔， Tab P11 Pro 的鏡頭尚可勝任此類拍攝工作。
▲ 機身左右兩側各有 2 組喇叭，電源鍵同時身兼指紋識別器。
▲ 話明係 LTE 平板，自然支持插卡和插卡：分別是 SIM 卡和 microSD 卡。
▲ 但需要留意係，電源鍵盤的設計相當貼近角落，而且跟音量鍵分開在不同方向，我經常摸唔到 / 摸錯開關。
▲ 獨立式音量鍵按壓感清脆，值得留意係電源鍵盤做成「平邊對齊」，不容易因爲放在袋內而誤觸開關。
▲ 機身另一側具備 USB 3.2 Gen 2 的 USB-C 接口及另外兩個獨立喇叭；呢部平板係支持反向輸出電力，可以幫其他手機充電。
▲ 至於旗艦平板電腦一般都擁有金屬接點（連接官方專用鍵盤），Tab P11 Pro 亦都擁有。
官方配件一覽
機體固然係主角，但官方是否有足夠配件支持亦相當重要，例如保護套，鍵盤，手寫筆呢三大護法，能夠大幅度增加用戶生產力。 Tab P11 Pro 有齊呢堆必備配件，全套三件需要另外加錢，699 + 199 + 499 = 1188 元就有齊鍵盤、保護套、觸控筆三寶了。 呃，我上面條算式係無計錯，因爲官方打包買係有折扣架！
▲ 官方出品的 Precision Pen 2 支持 4096 級壓力感應，呢隻筆夠粗，同一般六角掃描用鉛筆手感相當近似，握筆感非常正。
▲ 打開就會發現三件頭，分別是筆體、矽膠套、固定架。
▲ 固定架裝係保護套後方，而筆體就套落去矽膠套。
▲ 而矽膠套要用撕開粘貼固定在固定架上，咁就組裝完成。
▲ 但需要留意係，筆體係要充電，充電位置要打開尾部的矽膠蓋，插條 USB-C 入去就可以了；雖然官方聲稱續航力達到 100 小時，但一無電就要充，對於我呢種懶人黎講，PEN 要充電就是唔方便。
▲ 官方 Tab P11 Pro 的套係有兩種，第一種屬於上圖的「純套體驗」，保護套可以作爲支架使用。
▲ 呢款套正面保護性相當高，因爲擁有高硬度和防刮的凹凸矽膠粒面設計。
▲ 背部採用磁吸方案，同三星做法一樣，放埋去就自動吸實，鏡頭位亦完美 FIT 好。
▲ 呢款套係擁有三段式摺疊功能，大家相當熟悉架啦，可以做站立支架，方便放係檯面睇片用。
▲ 官方套仲包多一塊屏幕保護貼比大家用，相當貼心。
▲ 呢款純套的厚度唔算厚，圖中上方係 Tab P11 Pro 加套的效果，對比圖中下方加左鍵盤套的三星 Tab S7 平板； 本 YK 相當喜歡 Tab P11 Pro 加純保護套的手感，揸上去夠薄但好穩定，保護程度令人相當有安全感。
▲ 戲肉來了，官方另一款套：二合一鍵盤套裝！
▲ 盒內就是一個磁吸鍵盤 + 無段式磁吸支架；兩件配件都採用類牛仔布質感的物料，粗糙不滑溜的手感，官方宣稱呢種物料表面是擁有一定防水能力。
▲ 無段式調整角度，最大開合角度目測都達到 160 度。
▲ 雖然 Lenovo 宣稱「具有 18mm 間距大小、3mm 字母鍵間距和 1.3mm 按鍵行距」，但實際打落去同 Tab S7 的小鍵盤相若，而鍵盤觸感反而係三星更舒服。
▲ 左側是三星 Tab S7 的鍵盤，而右側是 Tab P11 Pro 的鍵盤，大家可以見到後者係大成個碼，亦可以好似 Tab S7+ 鍵盤套咁加多一列功能鍵。
▲ 同樣裝好鍵盤套，左邊的 Tab P11 Pro 厚度其實跟右邊三星 Tab S7 鍵盤皮套相若，而且 Tab S7 原裝套就有個位直接收埋隻 S Pen，但 Tab P11 Pro 就要另外加係外面，這些都反映左細節位係會差少少。
▲ 需要留意 Tab P11 Pro 鍵盤的磁力接位強度不足。如果你好似我咁，會攞住個平板本體四圍走而令鍵盤「吊吊揈」的話，咁你就要小心喇！ 因爲磁力不足鍵盤係會分離跌落地；而 Tab S7 係無呢個問題。
性能測試
Lenovo Tab P11 Pro 並沒有採用旗艦處理器，但採用的是效能都相當不錯的高通 S730G 八核心處理器，配備 6GB RAM 和 128GB ROM 儲存空間。 官方一開始售價 4999 元係仲貴過三星 Tab S7，但三星用 8 系旗艦處理器、120Hz LCD 芒、仲要係 8GB + 256GB 的組合。咁 Tab P11 Pro 用 S730G 性能表現又如何呢？
▲ 整體得分是 278719 分，呢個得分差距 Tab S7 所用的 S865+ 當然差成倍喇。
▲ 而 Geekbench 5 測試單核心獲得 546 分，多核心獲得 1771 分；
▲ 大家其實見到多核心性能拍得住舊旗艦 S845 處理器。
▲ 而單核心性能係超越舊 S845 處理器，所以唔係 Tab P11 Pro 性能太弱，而係高通最近的 8 系處理器性能都係 OVER POWER 得相當厲害。
▲ 其實 730G 最大弱點係 GPU 性能，如果以「1440p Manhattan 3.1.1 Offscreen」測試結果睇，同 S865+ 對比係落後 2 倍；所以如果你打算用平板電腦，執行高 GPU 需求的工作就要留意。
▲ 美中不足係，Tab P11 Pro 係 Androbench 測試中，連續讀寫速度分別只係得 492MB/s 和 194 MB/s。 我 RECALL 翻大家記憶，幾年前的 UFS2.1 速度都有 700 MB/s 架，宜家新機存取速度講緊係過千架啦！ 但好在隨機讀寫速度分別有 136 MB/s 和 123 MB/s，意味住日常頻密存取資料操作都會比較流暢。
▲ 至於大家最期待的電力續航測試，8600mAh 電量在 Geekbench 4 中跑出 9192 分，但我原本以爲可以破萬分。
▲ 整個測試執行大約 16 小時，去到 10% 電量時處理器會自動降頻；呢個結果亦支持官方的說法：「可播放影片／正常日常使用長達 15 小時」。
針對平板的設計
大家都知道市場上 Android 平板如果超過 10 吋屏幕， 廠商一般都會幫佢加入仿筆電的操作界面，而 Lenovo 都不例外，幫 Tab P11 Pro 加入相關的界面轉換；而且官方亦有爲觸控筆設計加入相應的預載應用程式。
▲ 預載的軟件就係得咁多，一眼見到晒； 值得留意係官方專登加入「Bamboo Paper」和「Squid」兩款相當出名的 Apps，等大家可以係畫圖、寫 Notes 方面都用得著，一開箱就用得到。
▲ Tab P11 Pro 支持轉換成類筆電界面，同樣係狀態欄點擊切換就瞬間完成。
▲ 個界面最大特色係支持分割頁面、浮動視窗，但用落去就會「硬係差少少野」，主要係 UI 改良出黎未盡完善，起碼對比三星皇牌 DeX 界面依然有一大段差距，但勝在可以輕鬆開到浮動視窗，對於有需要左右睇野的用戶黎講絕對係好過無。
結論
上面分享左一連串詳盡的評測分析，Lenovo Tab P11 Pro 用料上絕對不馬虎，外殼造工紮實令人相當有驚喜。如果定位是旗艦價錢的平板，佢肯定唔適合，會比其他對手打爆。 但如果變成 2999 元，甚至 3500 元內到手的平板電腦，呢個定位可以話係暫未有對手（聽聞三星 Tab S7 Lite 黎緊 ~）。 金屬機、超大芒 + 大電的 LTE 平板，有 GMS 服務，官方亦推出完整的配件系列，最重要係我用落去覺得相當爽。 一部可以睇片打法時間，喇叭體驗絕對係頂級水平； 有時又可以出 email 交稿做文字輸入的工作，反正唔打機，一部聲靚芒大續航好的平板，就係好選擇。 而 Lenovo Tab P11 Pro 賣到三千有找，唔買佢仲可以買乜呢？